تويت
تجربتي مع ابني بتحفيظ القرآن { ضمن حملة خلينا نسعدهم }
رح احيلكون عن تجربتي مع ابني بحفظ القرآن والاعتماد على حالو بشراء الاشياء يلي بحبها هو
الأولاد عادة لما بيدخلو محل ألعاب بصير بدهن من كل شي موجود بالمحل
وهيك صار مع ابني
دخلنا لمحل الألعاب صار بدو يشتري لعبتين وتلاتة
وهو بالأصل مو مسموح إلا بلعبة وحدة إلو ووحدة تانية لأخو
وصار نقاش بيني وبينو طووويل وعرييييض كان بهداك الوقت عمرو 4 سنين
وهو مصر يشتري لعبتين وأنا أكيد ما في إلا وحدة
فاقترحت عليه اقتراح
قلتلو بتعمل حصالة وكل ما بتحفظ سورة من القرآن إلك 10 ليرات لحتى تجمع حق اللعبة يلي بدك ياها
قلي ماشي وافق وعجبتو الفكرة
كل يوم تقريبا أو يومين كان يحفظ سورة صغيرة من جزء عم والكبيرة شوي كان يبقى عليها 4 أو 5 أيام
وكان كل يوم يسألني أديش صارو المصاري ؟ بكفو للعبة ؟
وهيك لحتى جمع حق اللعبة يلي كان بدو ياها
كانت بسيطة ورخيصة وكان فيني اشتريلو ياها عبارة عن تلفون صغير على شكل تليتابيز بيحكي وبغني
طبعا صار هيك على طول كل ما يعجبو شي قلو احفظ قرآن وجمع وجيب يلي بدك ياه
مرة اشترى لاب توب للصغار تبع تحفيظ القرآن
ومرة قال ماما البسكليت تبعي صغيرة بدي اشتري وحدة أكبر وأعطي هي لأخي الصغير
وهيك ولله الحمد كل ما بدو شغلة بيعتمد على حالو وبجمع وبجيبها
مو بس على حفظ القرآن كنت أعطيه مصاري كمان لما كان يعمل شغلات منيحة ويرد عليي بدون ما عصب !<< لأنو عنيد كتير
الفكرة حلوة كتير بتخلي الأولاد يعتمدو على حالهن ويحسو بالمسؤلية شوي
وعدم التبذير بالمال
ولما بتكون اللعبة من مصاريهن الخاصة رح يحافظو عليا أكتر وأكتر
بتمنى ما كون طولت عليكون بالحكي
تقبلو تحياتي ...
مدونتي مطبخ ام مرمر و ليلو
تعليق