اخواتى و حبيباتى

انا قررت اكتب لكم تجربتى مع بنتى لسببين:

اولا لان المنتدي دا ليه فضل كبير اووي عليا من قبل حت ما اتجوز ياما استفدت منكم .. بالرغم ان ديه اول مشاركه فعليه ليا الا انى وربنا يعلم دايما كنت مشارككم بكل المشاكل و دايما كنت بستفيد منكم .. و لا يمكن انسى المعلومات الجميله اللى اخدتها من كل عضوات المنتدي ربنا يكرمكم يا رب.. وكنت واخده على نفسي عهد انى اول مشاركه لازم اشكر فيها صديقاتى في تجمع الامهات الجدد.. ربنا يبارك فيكم يا رب افدتونى جدا جدا .. جزاكم الله خيرا

اما بقى السبب التانى : فهو انى قرايت رساله لاخت هنا تستغيث لان بنتها مش بتنام و قضت على العلاقه بنها و بين جوزها و بصراحه اغرتنى جدا في اخر شكوتها بدعوتها للى يساعدها بالشهاده ... قلت اقولها تجربتى و اقولكم كلكم لعل و عسى ان حد تانى يستفاد و يدعى لى

انا اسفه للمقدمه الطويله ديه .. بس كان واجب عليا اقولها

المهم ...
اقرأوا تجربتى في الرد القادم

يتبع

انا يا اخواتى ام لاول مره ..مثل حال الكثيرات هنا .. اول ما استلمت بنتى في حضنى خفت جدا.... دي مسئوليه رهيبه ..دي بقى بنتى انا .. يا صالحه تدعي لى ياما طالحه تخلى الناس كلها تدعى عليا

فقررت ان من اول ايامها بنتى لازم تكون متربيه
هاتقولولى ازاي؟!!
..من اول يوم بنتى في سريرها ..مفيش تفاهم في النقطه ديه ... انا لو فكرت انيمها جنبى ببقى مرعوبه ..بخاف عليها ..فمبنامش.. ولو عيني غفلت .. اه و اه من لوم الضمير ..
فقررت انه مفييش حل غير انها تنام في سريرها ...
المشكله الكبرى اللى واجهتنى ..انها مش بتنام اصلا
اقصد يعنى يا دوب تنام على ايدي و اجي احطها تصحى ...بس مجرد ما ايدها تخبطها تصحى .. كنت هاجنن
سالت الدكتوره ( وبالمناسبه انا عايشه بامريكا و دكتورتى امريكيه) قالت لى عليكي و على اللفه !!!! والله يا جماعه اللفه المصري ديه .. قالت لى لو بنتك شباعنه و عايزه تنام و لفتيها ايدها مش هتتحرك و تزعجها .. و اول ما تجوع هاتصحى و تعيط
جربت و فعلا كلمها طلع صح ميه ميه...
جينا للخطوه الاكبر .. طالما بنتى بتنام ليه متنمش بليل بدل النهار
وهنا ثار عليا كل الناس بنت 10 ايام عايزه تنايميها بليل و تصحيها بالنهار.. مستحيل انتى بتحلمى و مش هيحصل ابدا

لكن ربنا بعت لى هديه .. امى.. حبيبتى ربنا يخليهالى .. قالت لى اجتهدي ومالكيش دعوه بالنتيجه .. ان شاء الله اصلا ميبقاش فيه نتيجه المهم انك اجتهتدي

وفعلا دا اللى حصل ..بالصبح نصحى من سته حتى لو بنتى نايمه من 3 الفجر هانصحى يعني هانصحى .. و صحيت بنتى الطيبه و متعرفش الخطه رضاعه رضاعه رضاعه .. وتنام شويه و تقوم ترضع لحد الساعه 11 استحمت و اتلفت و اتحضنيت و رضعت لحد 12 و نامت .. لحد 8 الصبح نووم متصل و لله الحمد
فضلينا اسبوع على دا الحال

وقررت انها بدل متنام 12 تنام 10 و تصحى 6 الصبح .. و قد كان .. ودا عشان الاقى متسع اقعد مع جوزي شويه.

بنتى عندها اربع شهور و لله الحمد بتنام الليل كله و ما بتصحاش الا اول ما يجي ضوء النهار

واجهتنى صعوبات كتير في الاول بس بفضل الله اتغلبت عليها .. بالصبر و اليقين بان الله لا يضيع اجر من احسن عملا

اهم حاجه التدريج يا بنات ..الطفل سهل ترويضه كل ما كان اصغر كل ما كان احسن ...

مستنيه اراكم و اسالتكم .. و يارب تكون تجربتى مفيده

اه نسيت اقولكم ان واحده واحده استغنينا عن اللفه .. وبما انه ميعاد نومها بقت بتنام

يعنى اللفه ديه بس مساعده في الاول

ما شاء الله تبارك الله
ربنا يحميها لك ويحفظها من كل سوء يارب
والله أنا أعانى من نفس المشكلة
توأمى مش بيناموا طول الليل واحد ينام الثانى يصحىيبكى يصحى اخوه
لكن الحمد لله على كل حال

ماشاءالله عليها
وفعلا بديتي مبكرا في تعليمها افضل
لاني انا بناتي التوم عمرهم سنة ونصف ولسا بيصحو في الليل وبفيقو بعض
والله تعبت من السهر بالليل والشغل بالصبح الله يعين كل الامهات

ما شاء الله
بارك الله فيك وفي بنتك ويجعلها من الصالحات ويقر عينك بها
تجربتك أثارت اعجابي وأول ما أولد هحاول خلي ولادي متربين من أول يوم
بإذن الله
الله المستعان

برافو عليكى والله
ان شاء الله اعمل كده مع بنتى

مشكوووره على الافاده

ما شاء الله عليك يااختي الله يهديها لك كمان وكمان بس انا ما فهمت ازاي بتلفيلها اللفه وعلى اي منطقه وايه فايدتها

ماشاء الله عليكي انا برده من انصار تنظيب البابي الصراحه الام بترتاح و البابي كمان انا كمان عملت زايك كده من البدايه و اما كامل 4 شهور نقلته في غرفته عشان يتعود و الصراحه الاطفال ولله لازم من البدايه يكون في نظام عشان يتعوده و الله يعيننا كلناااا اللهم امييييييييييين