اللى ابنها فى ابتدائى او روضة و مش بتشتغل ياريت تفيدنى

**om_maram** · 07-04-2009, 07:36 AM

السلام عليكم ورحمة الله وبركاته

الموضوع يا جماعة ان بنتى من ساعة ماراحت الحضانة و انا حياتى باظت

مش بعرف انام كويس و مش عارفة ارتب حياتى اصلا انا مش بحب اصحى بدرى

بحب السهر فبخليهم يناموا مثلا الساعة 9 او 10 بالكتير و اسهر انا مثلا

كحد اقصى عشان خاطرهم الساعة 1 صباحا او 2 و اصحى الساعة 5 نصف

صباحا يدوب عشان الحق صلاة الفجر قبل الشروق و اقعد اعمد السندويتشات

و بعدين اصحيهم هما 7 و بينزلوا 8 و نصف طبعا بنزلهم و اروح انام

اصحى 12و نصف على ما فوق اعلق على اللحمة مثلا تتسلق على ما ييجوا

بيجوا هما 1ونصف او 2 على ما يقلعوا و يعملو الواجب تبقى الساعة 5 تقريبا

يتغدوا و نقعد شوية و بعدين من الساعة 8ونصف 9 ادخلهم الغرفة بتاعتهم

استعدادا للنوم و كده يكون اليوم خلص طبعا الوقت ضيق مش عارفة ادخل اقعد شوية على النت

مش عارفة اوضب البيت و اقوم بالاعباء اللى كلكم عرفنها فياريت اللى عندها نظام تساعدنى بيه

نسيت اقول حاجة كمان اصلا انا بعانى من صعوبة فى النوم و بقالى 4 شهور ماشية

على مهدئات و منومات و تصدوقوا ساعات حتى المنومات مش بتجيب نتيجة

ياريت اللى ليها تجربة تقولى عليها لانى فعلا تعبانة و على فكرة قلة النوم

بتيجب لى اكئتاب و بتتعب الجهاز الهضمى بتاعى و كمان ببقى عصبية جدا

على اتفه الامور و كتير بضرب الاولاد و بصرخ فى وشهم و دا برضه بيضايقنى

و الله ساعات بضربهم و اقعد اعيط معاهم مش عارفة اعمل ايه

معلش طولت عليكم بس فعلا انا فى مأساااااااااااااااااااااااه

ياريت تقدروا تساعدونى

**om_maram** · 07-04-2009, 10:09 AM

وياريت يا جماعة اللى تعرف اسم دوا للبلغم احسن اولادى مش بيرضوا ياخدوا الدوا

و بيرجعوه و ادوية البلغم اصلا طعمها وحش جدا انا نفسى ساعات مش بقدر اخده

**azmiralda000** · 07-04-2009, 02:29 PM

السلام عليكم اختى ام مرام

اولا ربنا يفك كربك و يفرج همك باذن الله

اللى اعرفه عنك حبيبتى انك انسانة مؤمنة و قريبة من الله
ارمى حمولك على الله و اتركى المهدئات و المنومات
وحاولى تنفذى كلام ربنا
ربنا جعل الليل لباسا و النهار معاشا

يعنى انتى لو نظمتى مواعيد نومك و نمتى بدرى هتصحى بدرى و هيبقى عندك وقت فاضى كبير جدااااااا
طول ما اولادك فى المدرسة هتقدرى توضبى البيت و تعملى الاكل و تقعدى على النت
و تصلى و تحفظى قرآن
اشربى يانسون و بابونج الحاجات دى بتهدى الاعصاب و بتريح المعدة

هقولك على فكرة كل ما تتعصبى و تيجى تضربيهم قومى بسرعة اعملى اى حاجة تانية
لعمليهم كيكة مثلا و طلعى عصبيتك فى ضرب البيض و ساعتها هتنفسى عن نفسك و هما هيفرحوا اوى بالكيك
اعمليلهم بيتزا و معجنات للعشا و ممكن ياخدوها معاهم المدرسة
قومى كلى شكولاته
اتوضى لان الوضوء بيطفئ نار الغضب لان الغضب من الشيطان

بالنسبة لدواء البلغم فى لبوس اسمه توبلكسيل و مفعوله اسرع من دوا الشرب

ربنا يشقى اولادك و يهديهم لك و يهديك لهم و ييسر امورك يارب

**ام عبوده** · 07-04-2009, 07:33 PM

كنت حابه اقدملك نصيحه بس ما شاء الله الاخت يالي قبلي ما قصرت اختي انتي بس دخلتي اولادك على غرفهم ينامو خلي بالبيت نور خفيف وحاولي تنامي معهم ولو ما نمتي قومي اقرئي بالقران والنور خفيف وانتي تنامي فورا وحاولي ما تشربي شاي وقهوه بالنهار ولا تنسي تضعي قران بالبيت وخصوصا سورة البقره وان نشاء الله يهدي بالك ويريحك امين

**خيرزاد** · 07-04-2009, 10:08 PM

اسال الله اللعظيم رب العرش العظيم ان يفك كربك
انا يمكن بنفس المشكله لانى ما اعرف انام بدرى ا بدا
بس جرب انك ما تنامى بعد ما يمشو للمدرسه
هتلاقى نفسك اخر الليل خلااااااااااااااص لازم تنامى
اقولك على حاجه بعدما ينزلوا بالسلامه البسى وانزلى هاتى حاجاتك وطلباتك واعملى اكلك عقبال مايجوا
ربنا يصلح حالى وحالك

**ريدووو** · 07-04-2009, 10:31 PM

الله يعينك ويصلح حالك وحياتك ويصلح لك أولادك إن شاء الله

كلنا بنمر بالمشكلة دى أول ما الأولاد بيبدأو يدخلوا المدارس ويكبروا

أنا رأيى تبعدى عن المهدئات وتلجأى للأمور الطبيعية يعنى شرب الأعشاب زى ما قالت الأخت اللى قبلى ...
,انا بضيف على كده قراءة القرآن والدعاء وأكيد مع الإستمرار على الدعاء والورد اليومى من القرآن حياتك ستتغير بشكل كبير إن شاء الله

أولا إنتى بتصحى مثلا الساعة 5 وتصحى الأولاد الساعة 7 وبيمشوا 8.30 ...
بعد ما يمشوا إعملى جدول أعمال لنفسك يعنى أولا قراءة جزء هياخد منك حوالى نصف ساعة وتصلى ركعتين الضحى وتتوكلى على الله تبدأى فى شغل البيت ..

تحطى اللحمة تتسلق بدرى وتعملى أكلك ولو فيه أطباق تغسليها وتشغلى الغسالة ..وتقعدى عالنت شوية ...

ممكن تخلصى أكلك على أذان الظهر ...تروحى تصلى الظهر وتفردى ظهرك وتسترخى لغاية ما يرجع ولادك بالسلامة...

وتحطى الغداء بعد رجوعهم فورا أنا رأيى إنك بتأخرى غداهم جدا !!!!

وبعد الغدا أكيد هتبقى مرهقة من الشغل والطبيخ ...تروحى تنامى تنيمى أولادك
القيلولة دى مهمة جدا لكى ولهم لإستعادة النشاط
يعنى لو نامو الساعة 3 وصحيوا 4 أو 4.30 حلو جدا
هيقوموا نشيطين وإنتى كمان هتكونى أهدأ
هم يعملوا واجباتهم ويلعبوا شوية ....وفى خلال ذلك تكونى إنتى صليتى العصر وغسلتى مواعين الغدا ....
وبعد كده تجلسى مع ولادك تتكلمى أو تلعبى معاهم ....
وتعمليلهم اى حاجة بيحبوها والساعة 9 يبدأ التجهيز للعشاء والنوم ...
صدقينى لو عملتى كده هتلاقى نفسك على الساعة 11 بالكتير عايزة تنامى من مجهود طول النهار....وتقومى الصبح فايقة إن شاء الله

ولو حسبتى عدد ساعات نومك فى اليوم هتلاقيها حوالى أكتر من 8 ساعات...

بس أهم حاجة الدعاء وقراءة القرآن هى اللى هتهديكى....

والله يعينك ويخليلك ولادك ....

معلش أنا إتكلمت كتيرررررررر

بس اتمنى اكون افدتك...ولو بحاجة بسيطة...

بالنسبة لدواء البلغم معنديش فكرة والله ...الله يشفيهم ويعافيهم يارب...

**المشغولة دائما** · 08-04-2009, 11:00 PM

طيب انتى عندك من الساعة 9 وقت نومهم لحد ما تنامى الساعة واحدة كل الوقت ده بتعملى ايه ممكن تعملى فيه شغل البيت وتهدى نفسك فى الشغل علشان تعرفى تنامى من غير ادويه

**المشغولة دائما** · 08-04-2009, 11:04 PM

فى موضوع البلغم انا مجربة انى اضيف 1 معلقة عسل نحل طبيعى(مضمون) على عصير ليمونه وادوبهم فى بعض من غير ماء واخذهم على الريق كل يوم الصبح جميل جدا وحتى لو طعمه مز شويه من الليمون بس احسن بكتييييير من الدواء