السلام عليكم ورحمة الله وبركاته
الحمد لله كل إللى يكتبوا ربنا علينا خير إن شاء الله
بس حبيت آخد برأيكم ومشورتكم وخبرتكم فى الموضوع ده .. أنا عارفة إنى من يوم ما ولدت حبيبة وأنا شغالة أسئلة أسئلة كتير يارب متكونوش زهقتوا منى
حبيبة أما كان عندها 7 شهور لاحظت أنا وأبوها إن عينيها الشمال ساعات قليلة بتنحرف عن مكانها شوية بس بترجع تانى بسرعة .. المهم روحنا كشفنا عليها على طول عند دكتور أخصائى فى الحول .. فحص نظرها لاقاه كويس وقالنا إن موضوع الحول ده بيحصل فى أطفال كتير وممكن يروح لوحده أو لو زاد أو مرحش لحد سنة ونص ممكن نعملها عملية بس مش هنعرف ناخد أى خطوة إلا بعد سنة ونص بس هى مش محتاجة نظارة لأن نظرها كويس
المهم بدأت الحكاية دى تقل خالص لحد ما راحت خالص تقريبا على الشهر التاسع لحد ما كملت سنة وبدأت ترجع تانى فقلقت عليها وقررت انى أكشف عليها تانى
روحنا للدكتور وعملها فحص لقى نظرها كويس بس عندها إستجماتزم قليل .. وقال إن ده ممكن يكون هو سبب حركة العين فلازم تلبس نظارة لأننا لازم نعالج أى عيب أو ضعف فى العين قبل ما نقرر أى قرار فى الحول .. علشان نعرف إن كان سببه ضعف فى عضلة العين أو بسبب الإستجماتزم
بصراحة أنا من إمبارح شوية أقول خلاص إيه المشكلة ماتلبس نظارة وخصوصا بعد ما شوفت أطفال كتير لبسين فى عيادة الدكتور بس بصراحة كلهم أكبر منها
وبعد شوية قلبى يتقطع وأقول إنها لسة بترضع وكمان لسة متعلمتش المشى أغلب وقتها بتقضيه بتحبى أو نايمة على الأرض وبتتقلب شمال ويمين فى كل الإتجاهات .. وخايفة إن لبسها للنظارة بدرى أوى كدة يأثر على لعبها وعلى شخصيتها ومتعرفش تعيش طفولتها أو تحس إنها مش زى باقى الأطفال
لدرجة إنى ساعات بفكر إنى ملبسهاش النظارة حتى على الأقل لما أفطمها وتمشى .. بس الدكتور بقول إن لو الحول بسبب الإستجماتزم عدم لبسها النظارة ممكن يزوده .. بصراحة حيرانة ومش عارفة أعمل إيه
ياترى تعرفوا حد مر بالظروف دى وتعامل معاها إزاى وتنصحونى أعمل إيه لأنى حيرانة ومش عارفة لو فى عمليات ليزر تصلح الإستجماتزم ده هل تنفع لسنها ولا لأ ياريت تفيدونى وجزاكم الله كل خير
الروابط المفضلة