السلام عليكم ورحمة الله وبركاته
أنا بنتى عندها النهاردة سنة بالتمام والكمال وممرتش أصلا بمرحلة الحبو خالص ولسة لحد دلوقتى مش بتمشى ولا حتى بتقف لواحدها
على فكرة أنا عارفة إنها بدل الحمد لله سليمة عضويا مفيش خوف وكمان لمعلوماتكم أنا زوجى طبيب أطفال
بس أنا بؤمن بمثل إسأل مجرب ولا تسأل طبيب (طبعا لو سمعنى هيبهدلنى ) بس أنا بكتب من وراه وكمان الدكتور حاجة والأم حاجة تانية
أنا بس حابة أعرف لو حد بيمر بنفس التجربة أو مر بيها مع أى طفل من أطفاله قبل كدة
سؤالى هل الحكاية دى محتاجة منى إنى أدربها وأساعدها بشكل مركز شوية ولا هى لما تكون مستعدة هتقف وتمشى لواحدها
مع العلم إنها الأولى ليا وضميرى بيأنبنى إنى بحس إنها وحيدة وزوجى طبعا مشغول وبره البيت كتير وأنا فى الوقت إللى بكون مشغولة بشغل البيت بكون حطاها فى عربيتها أو مقعداها فى مكان آمن فى وسط اللعب بتاعتها وبشغلها قناة طيور الجنة هى بتحبها جدا يعنى بتتفرج شوية وتلعب بلعبها شوية بس الحكاية دى بتتكرر كتير فى اليوم بحكم إنى قاعدة لوحدى وبباها برا البيت
أنا مش عارفة هل قعدتها قدام التيليفزيون من ضمن أسباب تأخير المشى ولا ده عادى أصلها بتصعب عليا أسيبها لواحدها وأكون مشغولة عنها وفى نفس الوقت يكون الجو حواليها ساكت مفيش أى حاجة تشغلها علشان كدة بشغلها التيليفزيون ده غير إنها من النوع المتقلب المزاج بسرعة يعنى بتمل بسرعة ولو معملتش كدة مش هعمل أى حاجة من شغل البيت ولا هناكل ولا نشرب وهفضل قاعدة جمبها
ياريت حد مجرب يطمنى ويقولى المفروض أعمل إيه وهل إللى بعمله ده صح ولا غلط معلش طولت عليكم بس حبيت أشرحلكم الوضع بصورة كافية
الروابط المفضلة