ابنى شقى جدا ومتهيألى الناس فى الشارع كله بيسمعوا صوتنا بالليل لما بنضربه ولا هو بيكون بيضرب اخواته بالرغم من الفارق السنى اللى بينهم
وياريته لما بيضرب اخواته بيسكت
بالعكس
بيزيد ومالوش قفلة يعنى مبيفصلش وأبوه بيكون نايم وبيقوم على صوته وبيضربه هو كمان لانه بيقوم مفزوع من صراخه المتكرر
امبارح استفزنى كتير وانا بحاول امسك أعصابى وفجأة ضربته بالقلم على وجهه
انا موش قادرة اقولكم بشاعة القلم ده كانت ازاى
نزل على جزء من رأسه وخده وطبعا اذنه
وغير صوت القلم نفسه
صدقونى انا ندمت
لانى اكتر واحدة عارفة بمخاطر الضرب على الوجه
لان بالوجه كثير من الاعصاب والضرب على الوجه قد يؤدى الى الشلل او يسبب انفصال لشبكية العين او يسبب فقدان السمع
انا فعلا ندمت وزعلت من نفسى اوى
لانه بكى بكاءا شديدا واشتكى من الم اذنه ودماغه
وطبعا انا بكيت بس موش امامه
وبعد شويه حاولت أصالحه مرضاش أبدا وكل ما احاول ميرضاش
وقاللى انا (مخامصاكى)على فكرة انا كتبتها زى ما قالهالى يعنى انا موش غلطانة
فى كتابتها
صدقونى انا خايفة بكرة يشتكى من حاجة فى اذنه او راسه خايفة قوى
ياريت انا مكررهاش تانى ولا اى حد يعملها لانه فعلا خطأ كبير واغلبيتنا يقع فيه وكفاية اننا بنلاقى فى صفحة الحوادث عن أباء قتلوا أطفالهم من الضرب وعند سؤالهم يقولوا انهم كانوا يؤدبون أبنائهم
ربنا يستر وربنا يخليهم ويهديهم أمين ويا ريت اى واحدة بتعمل اللى انا عملته
تندم زى ما انا ندمت
الروابط المفضلة