مرحبا بالجميع
وخاصة ام سميه تعرفي انك دخلتي قلبي وخاصة لما قرأت توقيعك لأنه يشبه توقيعي...
ام هند الله يحفظ والدتك وكل امهاتنا يارب....
اخواتي قبل يومين زوجي كان عنده عمل وحتى على الغدا ماراح يجي
طبعا أنا خرجت الباقي من غدا امس بدل ماأطبخ وقلت اخلي اليوم للغسيل..
لكن بعد الظهر حسيت بصداع...بسرعه غديت أولادي وقلت لهم راح اخذ سوسو انومها معايا وماأبغى احد يصحيني قبل اذآن العصر...
المهم ماقدرت أنام إلا بعد جهاد وتعب وماصحيت إلاعلى مكالمة زوجي يقولي ان اخوه وزوجته جايين...المهم قمت بسرعه وصليت العصر وجري على المطبخ عشان اعمل الحلى والقهوه وصدمت لما شفت الصاله وغرفت الأولاد ،وناديت عليهم عشان يرتبوا غرفتهم ...
خالد:ماما انا اشيل الألعاب
زيزو:لاياماما هو اللي رمى الألوان ،هو يجمعها
أنا: طيب اتركو الألعاب ورتبوا الملابس اول...
بعد دقيقه..
زيزو:ماما هو مايشيل ملابسه
خالد: ماما أنا ماأعرف ارتب الملابس
زيزو: إلا ياماما يعرف أنا علمته
خالد:لاياماما انا ماأعرف بسرعه
انا: اوووه خلاص ، على غرفتكم ولا تساعدوني بس لاتشغلوني عشان أخلص بسرعه...
يدخلوا غرفتهم وانا اعمل الحلى وأفكر (ماعندي وقت والدنيا كأنها مهرجان التسوق...واغير ملابسي وملابس سوسو... )
وأثناء تفكيري يتصل زوجي ويقولي ان والدته واخته وحريم اخوانه3جايين...
الآن بدأت اشعر اني محتاجه مساعده....وفي هذه اللحظه جاء ولدي يشرب مويه فقلت (ياالله أولادي اللي انا فخوره فيهم بدل ماتقولوا نساعد ماما تجلسوا تلعب.. فين البر واللي يبغى الجنه )
(ماما انا قلتك ابغى أساعدك بس انتي قلتي روحوا الغرفه)
(لأنكم ماتفاهمتوا وضيعتوا الوقت بدون فايده )
(طيب ماما أنا اساعدك في تغسيل المغاسل)
اعطيته الإسفنجه وبدء يغسل
جا اخوه( وأنا ياماما)
اعطيته منشفه فيها شوية( داك بالصنوبر) وقلتله امسح الطاولات
طبعا شجعتهم وقلتلهم اني مبسوطه منهم وفخوره بيهم ..
وبعد ما خلصت من الحلى والقهوه، قلت (انا علي الصاله وانتوا غرفتكم ..مين يسبق و يرتب الألعاب ؟
ترتبة
مين يسبق ويجمع الألوان؟
تجمعت
مين يرتب الملابس؟
ترتبة
ولقيتهم يجروا على الصاله يرتبوها
وانا كملت الأعمال الثانيه من تغسيل الحمام-وانتوا بكرامه- وتغيير ملابس بنتي..
وبخرت البيت وفي هذه اللحظه دق الجرس وجا الضيوف...
معليش حكيتلكم قصة حياتي ، عشان تعطوني ملاحظاتكم....
واما انا فخرجت بعدة نقاط:
1- في الأوقات الحرجه لازم الواحد مايتوتر بلعكس يعتبر هذا اختبار سريع لإمكانياته.
2- تحويل الأوامر الثقيله الى مسابقه اولعبه.له فائده اكبر
3- اختصار الوقت في انجاز العمل بالنسبه للأولاد جاء نتيجة تدريب سابق..
4- وضع جدول خاص للأعمال-كما كنت أعمل سابقا- يساعد في التقليل من الفوضى التي تحدث بعد اللعب.
الروابط المفضلة