جنني جوجو الأزعر! الله يحميه...أحياناً بحسه بفهم زينا الكبار ومتعمد يحطني بمواقف بتعمل وجهي زي حبة البندورة!!!
قلت أتحفكم بعمايله، وأسمع منكم عن أفلام أطفالكم اللي لسا ما فقسوا من البيضة وعملوا فينا العمايل!
السيد جوجو من صغره مطلعني كذابة يا سوادة وجهي، كان يعبي البيت صراخ من أول ما يفتح عيونه ويعمل زي صفارة الإنذار...لأ لأ...زي صفارة طنجرة الضغط...وبمجرد ما يزورني حدا ويسألني عنه وأحكيله مجنني يصير قمممممممممممممة الهدوء والذوق...والستات يسألوني: "كيف بتحكي عن ابنك شراني؟ ما شاء الله حوله...زي العسل!" محسوبتكم بتتخيلوا لوحة الألوان اللي بتصير على وجهها.........
زوجي كان يتصل علي...شو عاملة؟ أحكيله والله جواد باشا جنني...بمجرد ما يدخل باباه للسيد جوجو بتصير الضحكة على وجهه طولها نص متر (مبالغ بالوصف أكيد)!
ولما كان يا دوب شهر، كانت حماتي بمجرد ما تدخل يطلق حضرته صفارة الإنذار، وعلى طول حماتي توجه إصبع الإتهام "إبنك جوعان! رضعيه!!!" وأنا أكون ساعتها مرضعته! والمشكلة بخجل كتير أرضعه قدام حدا، والمشكلة الأكبر انها بتزعل ازا تركتها وقمت على غرفة تانية أرضعه...فأنا أصير بموقف لا أحسد عليه...
الصبح لما أجهزه بدي أبعته للست اللي بتركه عندها تا أروح على دوامي ، بكون غيرتله البامبرز وبدي أطلع، بروح حضرته طاجها بعيد عنكم !!! وأنا بكون تأخرت على دوامي ولسا بده يأخرني أكتر...من يوم ما صرت أم حطيت X على الإلتزام بالدوام الحمد لله!
ونهفته الجديدة : عودته أغيرله البامبرز كتير...بضل يبكي تا أغيرله اياها حتى لو كانت نضيفة، وبمجرد ما البسه الجديدة بروح طاجها...! يعني يا ماما على بالي أقاهرك، عندك مانع؟!
أكيد لأ يا عمري...
من جديد بطل يعترف انه الليل للنوم! الساعة 12:00 بيجي على باله يلاعبنا...ويالله، اسهري يا ماما ياللي بكره عندك دوام بكير!
يا جماعة ما بعرف ليه...كل عمايلهم بتبسطنا مهما كانت...كأنهم قطعة من قلوبنا...
أخواتنا المشرفات: ازا مو هادا المكان المناسب للموضوع، اعملوا اللي بناسبكم، مشكورات...
يلا يا أحلى أمهات، اتحفوني بشقاوة بيبياتكم الأمامير...
الروابط المفضلة