السلام عليكم

عزيزاتي

من فتره ذكرت لكم عن طفل في العائلة

متأخر عن سنه .. يعني الآن عمره اربعة تقريبا تصرفاته تصرفات سنة ونص
السبب مجهول بالرغم من عرضه على عدد كبير من الأطباء

المهم أمه كان الله في عونها حايسة معاه حوسة الله العالم بيها
الآن تبغى تعلمه على الحمام فصارت تحطه بعد ما يأكل
وطبعا بيقضي حاجته في الحمام
بس ما يعرف يطلب هي توديه كل ما حست انه محتاج

المهم صارت تحطه وتروح تشوف أشغالها وترجع بعد شوية

المشكله إنه من خمسة أيام تقريبا جات لقته لاعب في اللي عمله وكمان مدهن جسمه

طبعا خرجت عن طورها ولطشته ... وبعد كم يوم أمس يعني عادها مرة ثانية وبرضو لطشته

السؤال كيف تقدر توصله معلومة إن هادا قرف وما يعيدها تاني ؟؟

لأنه ما بيفهم عليها

يووووووووووه لاتفكريني ..

اليوم في الصباح ونحنا بنستنى الباص ولد الجيران دعس في عملة كلب وبهدل الدنيا ولا سامعني وانا اقوله انتبه وشوف شكله مع البرد انطرش..

المهم نرجع لموضوعنا..

هي الام ماراحت مدرسة تعلمت طريقة المعاملة مع الاطفال المتأخرين ؟ انصحيها تروح والله ترتاح من بلاوي كتير حايسة فيها..

انا شخصياً مريت بنفس مشكلتها الحالية وكانو اولادي فاهمين ولا بيهم ولا ضربة ..ومرة وحدة قالت لي انه ولدها عملها في غرفته وجاب سيارة كبيرة وراح وجا فوقها ..وعبى الغرفة خطوط ..

معليش قرفتكم ..

انا شخصياً كانت تجيني صدمة تكتم انفاسي ..ويا تلاقيني انظف من غير ما اتكلم يا انفجر واقلب الدنيا صراخ ..

وهي تقول نظفت من غير ماتتكلم وجا ولدها قالها اسف قالت له روح عني انا زعلانة..

انصحها لما يروح الحمام تقوله يع وقرف ولما تشغل السيفون تقول راح اليع وزي كدا تقرفه منها وتسوي بوجهها انها قرفانة وعشان كدا نسويها في الحمام مانخليها علينا ومن دا الاسلوب طبعاً هذا الاسلوب نستعمله مع الصغار لما يكونو لسة بالحفايض وبما انك قلت هو الولد تصرفاته زي سنة ونص ان شاء الله ينفع معاه هدا الاسلوب..

شي اخير ذكريها بعظم اجر البلاء والصبر عليه ورققي قلبها على ولدها واكدي عليها انها ماتضربه ولما تشوفه مسوي لها مصيبة تتذكر الله وتستعين به وتعرف انه الله اذا احب عبداً ابتلاه ..وعظم الاجر مع عظم البلاء ..

وقوليلها حمرة الورد تقولك بالله ماتضربي ولدك..خاصة اذا تذكرتي تمسكي اعصابك .. وربي دمعتي واقفة في عيني وانا اكتب لك ..

انا ولدي سوا في البهادل وهو مافيه ولا شي ..وهي ولدها صاحب احتياجات خاصة ..

الله يصبرها ويعظم اجرها ولا يحرمها اجر الصبر ..

شي اخير اذا ماعرفت تلاقي مدرسة اعطيني اسم التشخيص حق الولد وانا ابحث لك عن مواضيع في النت وهي تقراها ربي ينفعها بها ..

غاليتي حمرة

يشهد الله إني أحبك فيه
في خاطري من زمان وطلعتها

بالنسبة لموضوعنا
حوصلها كلامك
وطبعا إحنا هنا في السعودية ما في مدارس زي كدا؟؟؟
تعتقدي فيه؟؟؟

والله الولد غلبان وحبوب بس الأم عندها مسؤليات كثير فوق راسها بنت أصغر ومن دون شغالة فأعصابها بتتلف أحيانا

بالنسبة لتشخيص الحالة اللي فهمتو منهم إن الدكاتره قالوا ما فيه شي

بس حرجع اسألها لو كان أعطوها اسم التشخيص


شاكرة ومقدرة لردك

الله يسعدك ياوقار يا أختي ..واحبك الله الذي احببتني فيه ..

دوبي راجعة من برة وشفت مكان وقائع الجريمة الصباحية ..قلبي لعب ..

مدري انتو فين في السعودية بالضبط لكن تعالي نبدأ باليي اعرفه ..

في مكة في مركز ام القرى للعناية الخاصة في شارع البشرى في العزيزية..لاصق في بيت اهلي ..

في جدة عندك مركز العون برضه للعناية الخاصة ..بس ما اعرف عنوانه ..

هده الدور مخصصة للاطفال المرضى اليي عندهم متلازمة داون خاصة بس هي صاحبتك لو راحت هناك وطلبت تتعلم او تشتغل متطوعة ان شاء الله تستفيد ..

اما عن المسؤوليات ربي يعينها ويعيننا والله كلنا عندنا اليي مخلينا مانعرف نحك روسنا .. الله يسهل امرها ويوفقها ..

انا جربت شخصياً اني اقعد مع وحدة من الاخوات جات من الشرقية تعالج اطفالها هنا وكان عندهم ضمور في المخ ..واستفدت منها كثير لانها كانت تتعلم من المستشفى وتعلمني ..حتى الولد والبنت صارو يعرفوني ويميزوني من بين الناس ولما اسلم عليهم يفرحو ..الله يشفيهم ويخفف عن امهم ..

خليني اقولك شي بسيط من قصتها ..عندها 6 اطفال ..الاول سليم الحمد لله ..الثاني عنده تأخر عقلي زي ولد صاحبتك كدا يتصرف زي واحد عمره 3 سنين وهو عمره 15 سنة ..

التالتة عندها تأخر في النطق وبرضه تصرفاتها اصغر من سنها نوعاً ما ..كانت 11 تحسيها زي 8 والا 9 لعبها وكلامها..

الرابعة طيبة الحمد لله

الخامسة والسادس ..لايتحركو ولايتكلمو ولاجلوس مايجلسو ..

والام ماعندها شغالة وشايلة البيت كله على راسها ..الله خفف عنها ..

يوه ما اكتر كلامي

بالعكس إنتي كدا هونبي المصيبة عليها
لو ذكرتلها القصة دي رح تحمد ربها ألف مررررررررررررررررررررة
وبعدين كلامك أصلا ما ينمل

شوفي انا حتكلم كتير برضو
مو أصلو لو انفتحلي باب إش يسكتني

شوفي الولد من يوم ما اتولد ماكان مبين عليه شي عادي جدا
حتى إنه قلب قبل اللي في سنه
لكن شوية شوية بدأنا نكتشف أشياء يعني مثلا ما جلس الا بعد السنة وما حبى الا فين يمكن سنة ونص
المشي بعد التمارين والعلاج الطبيعي مشي على ال3 سنوات
كلام الى الآن وهو قريب الأربعة لسه ماتكلم
هم في الرياض وعرضوه على دكاتره الدنيا والآخرة وخسروا (( الجلدة والسقطة )) مدري اش معناها بس ماما دايما تقولها

المهم والدكاترة كل ما يسوو تحليل يقولو ما فيه شي وتحويل على التحليل اللي بعده
وليومك دا ماعرفوله لا تشخيص ولا علاج

بس انا قلتلها هو دحين اربعة وتصرفاته زي سنة ونص يعني يمكن يكون بس متأخر سنتين
فقالت أنا خايفة أن كل ما يكبر كل ما يزيد التأخر معاه

فسؤالي عيال صاحبتك كيف كان ؟؟ كل ما يكبرو يزيد التأخر ولا ثابت؟؟

معليش كثرت عليكي بس والله حالتهم حالة

الله يبارك فيك يا وقار..

للاسف الحرمة رجعت السعودية وانقطعت عني اخبارها (نعم الصاحبة) ..

بس وصفك لحالة الاهل زي خالي لما جاله الولد وهو مرة يشبه اولاد الحرمة اليي حكيتك عنها ..

وبصراحة الولد تولد طبيعي وقلب في سنه بس بعدها كل شي وقف لا كلام ولا حركة ولا شي حتى جلوس مايجلس ..الله يعوض خالي فيه ..ذكرت من مدة في موضوع ام بدر انه توفى ..

اقولك حتى يده مايرفعها من مكانها بس يضحك ويبكي ويحرك عينه مايقدر يحرك راسه ورقبته ..وقالو عنده ضمور في الدماغ..

وكمان شفت وحدة بنت نفس وصف ولد صاحبتك وابوها طبيب اطفال قال لزوجي مافيها ولاشي دماغها سليم وكل شي عندها سليم ..ولما شفتها كانت قربت 4 سنين وقالوا دوبها تعلمت المشي ..

ايش رأيك انت في شغلة الحمام تحسي الولد جاهز؟

انا ابغى اطير واتعلم تعامل مع الاحتياجات الخاصة ..خاصة بعد ماشفت البزورة اليي كانو هنا وكيف يفرحو لما اكلمهم ..حسيت انهم فئة منسية في المجتمع ..

طبعاً ما ابغى اخوض في كلام عن امريكا وكيف انهم دامجين هده الفئة في المجتمع ولهم مدارس ومؤسسات ..

تذكرت وحدة عائلة تانية كانو جايين دراسة وبعدين ربي رزقهم بنت والبنت كانت مرة جميلة ماشاء الله ..وكأنها صابتها عين ومسكينة صارت زي دي الحالة كل شوية تفقد شي من اليي كانت تقدر عليه يعني الجلوس والمشي وحركات الاطفال ..

بعدين خلصت البعثة ورجعو وبعد 4 سنين جو مرة تانية سنة وودوها المدرسة ..ماشاءالله تعلمت المشي ..وربي فرحت لها من قلبي لما شفتها تمشي ..

فهمتِ علي ؟ اهم شي نتعلم الطريقة الصحيحة للتعامل مع هؤلاء الاطفال ..

ايش رأيك انت في شغلة الحمام تحسي الولد جاهز؟

هي بتحطو بعد ما ياكل .. يعني تقريبا عرفت مواعيده ..
عشان تشيل عن نفسها هم تغير حفايض عيلين.. وبعدين بيني وبينك (( حلوة بيني وبينك دي .. الدنيا كلها شايفتنا )) الحفايض صارت فلقة .. فهي بتحاول تخفف أكيد
غير إنها بتحاول تطوره ..


وإن كنت معاكي إنه لسه مو جاهز .. لأن سنة ونص بدري،،، على السنتين يمكن .. أو لمن يبدأ يتفاعل معاها أكتر من كدا..

والبنت كانت مرة جميلة ماشاء الله ..وكأنها صابتها عين

مااستبعد إنو جاته عين .. لأن الولد تبارك الله جميل جدا
لدرجة الكل يطلق عليه اللبناني (( تعرفي عقدة اللبنانيين اليومين دي ))

فهمتِ علي ؟ اهم شي نتعلم الطريقة الصحيحة للتعامل مع هؤلاء الاطفال ..

النقطة دي لازم أوصلها هي وبقووووووووووووووة لأنها خلاص قربت تنهار ،، وأحس إنها هي والأبو أحيانا بيفقدوا صبرهم ويضربوا وهو حبيبي مو بيده ،،، يعني حتى المشاكل اللي بسويها تحسيه مو إجرام عيال لأ غصبا عنه

يعني مثلا يلحس الأشياء
يعضعض مشاية أختو الى ما خرمها وممكن يقعد فتره وهو مستمتع بالحركة دي
يوقف في السيارة لو ما كان جالس في الكرسي المخصص له.
يعني مني قادرة أوصلك الفكرة اللي في بالي بس إنو لو سوى شي يعلق عليه خلاص .. حتى لو زعقولو من اليوم لبكره


الله يكون في عونها وياريت يحاولو يسوو هنا زي في أمريكا حكاية الدمج دي والدورات ... بس تقولي لمين؟؟

ياشيخة اسمه بدأنا ..امريكا عمرها اكتر من 100 سنة ..

السعودية ياعمري دوبها شابة

فهمت عليك وصف حالة الولد ... مايمكن يكون عنده توحد؟

اصبري عندي تقنية يمكن تصلح معاها ..

اكيد الولد يفهم الكلام ..

اذا جات تكلمه لازم تحط عينها في عينه وتتكلم بهداوة مرة يعني لما يعض شي تمسكه من اياديه الاتنين وتكون طبعاً جالسة عشان يصير وجهها في وجهه ..وتقول له ..لاتعض هدا الشي ..وتكرر عليه بس بهدوء مو صراخ ..

لو كان شقاوة راح يحاول مايحط عينه في عينها ..ولو كان توحد تحسي العين تدووووووووور ولايقدر يحطها في عين امه ..ساعتها ممكن تأشر باصبعين على عيونها الاتنين وتقوله طالع في حبيبي ..لاتعض هدا الشي..

اما الانهيار كتري منه انا بغيت اروح مستشفى المجانين ....من كتر ماعملو في عمايل ..عشان كدا لما اشتكي منهم ويقولو لي شوفي بزورة فلانة اقولهم انا ماني زي فلانة انا ضغطت على اعصابي وراحتي وصحتي عشانهم ..اما فلانة مسكت السلك والا الخيزرانة وطاحت فيهم وقالت جن وعفاريت ..جينا للرغي

اذا جات تكلمه لازم تحط عينها في عينه وتتكلم بهداوة مرة يعني لما يعض شي تمسكه من اياديه الاتنين وتكون طبعاً جالسة عشان يصير وجهها في وجهه ..وتقول له ..لاتعض هدا الشي ..وتكرر عليه بس بهدوء مو صراخ ..

لو كان شقاوة راح يحاول مايحط عينه في عينها ..ولو كان توحد تحسي العين تدووووووووور ولايقدر يحطها في عين امه ..ساعتها ممكن تأشر باصبعين على عيونها الاتنين وتقوله طالع في حبيبي ..لاتعض هدا الشي..

ما فهمت اش الفرق لأنه في الحالتين ما حيطل فيها ،، شكلي تعبتك معايا




وبالنسبة للتوحد أنا قلت من الأول يمكن بس قالو التوحد ما يبدأ من الشهور الأولى لأنه تأخره بدأ من عمر 6 شهور تقريبا

ومرة دكتور قال دا يمكن طيف التوحد ،، ورجع قال لأ..
ومرة قالو استقلاب وبعدين بعد التحاليل قالو لأ

والله حالة الدكاترة دول .. منتي عارفتلهم

شكلك طفشتك؟؟؟

عند الإشارة تكون الساعة الثانية صباحا بتوقيت مكه المكرمة ... توت

في أمان الله ،،، ولو طلعت لسه ما طفشتك حشوف ردك بكره بإذن الله

سلااااااااااااااااااااااااااااااااااااااااااااااااااااام