اخواتى الحبيبات
النهاردة حبيت انقل لكم تجربتى فى فطام بنتى حنين ...
وشوية حاجات استفدت منها ... وكمان حاجات غلطت فيها
لعل وعسى موضوعى يساعد اى ام عايزة تفطم طفلها
تعالى بقى هاتى كوباية النسكافية
وتعالى نبدأ بسم الله
قبل اى شيئ لازم تبقى عارفة ان الفطام دة صعب جدا على الطفل وعليكى انتى كمان
علشان كدة كنت دايما بدعى ربنا انة يجعل فطام بنتى سهل ويعدى على خير .... خصوصا ان بنتى عنيدة جدا ومش بترضى بالامر الواقع
لازم تاخدى بالك من توقيت الفطام
من رأيى ان افضل وقت للفطام هو الشتاء ...انا فطمت بنتى الشهر اللى فات ... لأنى شفت تجربة اختى فى فطام بنتها فى الصيف ... عانت معاها جدا ... لآن البنت كانت بتقوم بليل كتيرعطشانة عايزة ترضع ...وطول النهار كانت تصرخ عايزة ترضع ... لأنها متخيلة ان الرضاعة هى اللى بتمنع العطش
خدى طفلك الاماكن اللى بيحبها ... يعنى مثلا عند مامتك او حماتك او الملاهى او الحديقة ... المهم انة يروح مكان ينشغل فية عنك ...
ويقابل ناس بيحبهم علشان لما يبكى يعرفوا ياخدوة ويسكتوة
انا اخدت بنتى ورحت عند اهل بابا(اعمامى) فى الريف ... حنين بتحب المكان هناك جدا علشان بتشوف الحمار والمعزة والخروف والكلب والحاجات دى يعنى
وهناك المساحة واسعة للعب ... فكانت بتجرى وتلعب طووووووووووول النهار ... وتنسانى انا بقى
وكمان لما كانت بتعيط كان بابا او اخواتى بياخدوها بعيد عنى ... المهم انى اغيب عن عنيها ... لكن طول ما انا قدامها عايزانى وعايزة ترضع
خلى بالك ان طفلك لازم يكون بصحة كويسة ... يعنى مينفعش تفطمية وهو تعبان ... هيبقى حرام عليكى العذاب دة
انا قبل ما افطم حنين كانت عندها دور برد ... رحت بيها للدكتور وقلت لة انى ناوية افطمها .... قاللى انتى دلوقتى حاولى تقللى الرضعات .. ولما تخف افطميها
علشان لبن الام معقم وبيحمى الطفل ... ولما هتفطمية ... هيتنقل لمصادر غذاء تانية ....واحتمال تكون ملوثة ... وهى تعبانة مناعتها ضعيفة فممكن ييجى لها نزلة معوية لا قدر الله او يتنقل لها اى ميكروب
انا حاولت استخدم مع بنتى نظام الفطام التدريجى ... استخدمتة نوعا ما ... قللت عدد الرضعات قبل الفطام بحوالى شهرين ...لغاية ما بقت بترضع حوالى رضعتين او تلاتة فى اليوم ... ورضعة بليل قبل ما تنام ...
ولو رحنا عند حماتى او فى مشوار كان ممكن مترضعش طول النهار وتكتفى بالاكل ...
المشكلة عندى كانت بليل ... لما بتصحى بليل عايزة ترضع ... معرفتش ابدا اقلل لها عدد الرضعات بليل
فكان الحل اللى قدامى علشان امنعها عن صدرى انى اكرهها فية .... ودة تم بإستخدام الصبار .... علشان هى نفسها تقتنع ان دة طعمة وحش وتبعد عنة
طبعا لازم علشان تفطمى طفلك تكونى من الاساس دخلتى لة اكل ... يعنى مينفعش يكون الطفل متعود على الرضاعة بنسبة 100% وتيجى مرة واحدة تقولى افطمة ... طبعا مش هيرضى ياكل لأنة متعود على الرضاعة ... وكمان علشان معدتة متتعبوش .... لأن المعدة اللى متعودة على السوائل فقط ... بتاخد فترة كبيرة علشان تتعود على الطعام الجامد ...
انا من سن 4 شهور وانا كنت بدخل الاكل لحنين مع الرضاعة ... وجيت الفترة الاخيرة ...( قبل الفطام .).. كنت بحاول ااكلها اكتر ما ارضعها ...
وطبعا عرفت اية هى الاكلات اللى بتحبها واية اللى مش بتميل ليها قوى ... دة ساعدنى فى الفطام انى اعمل لها الاكل اللى بتحبة علشان يبقى ليها نفس لية
وخلى باااااااااااالك من السوائل ...اعطى لطفلك سوائل كتير ... لأن فى الفطام طبعا الطفل هيعانى من الامساك علشان كان فى الاول معتمد على الحليب(سوائل)
متنسيش التطعيمات
بلاش تفطمى طفلك وقت التطعيم ... خليها قبلها او بعدها ...
انا فطمت حنين على سنة و5 شهور ... علشان يبقى قدامى فترة تتعود فيها وتبتدى تاكل ... لأن التطعيم بيتعبها طبعا ....
او ممكن تطعميها وبعدها بكام يوم تبتدى رحلة الفطام
متنسيش قبل الفطام بمدة طويلة تعودى طفلك على شرب الحليب ... علشان يعوض عن حليبك ....
انا كانت غلطتى انى معودتش حنين على شرب الحليب ... كنت بسيبها على راحتها ...
وطبعا بعد الفطام هى محتاجة كالسيوم ... غلبتنى جدا لغاية ما اتعودت على شرب الحليب ... لغاية دلوقتى مش بتشرب الكوب كامل ...
ودة كان مشكلة لأنها فى فترة الفطام كان بيطلع لها ناب وانا مأخدتش بالى ... وكانت بتصرخ من الالم يا حبيبتى ...
نيجى بقى ليكى انتى
من تجربتى ...
الفطام صعب مكدبش عليكى ... وعايز صبر كبيييييييييير قوى ....
كنت وقت الفطام دايما بقول ... يارب ادينى صبر ايوب ... سواء على زن بنتى وعياطها المستمر او على تعبى انا ووجع صدرى
طبعا انا جيت فى نهاية اليوم الاول من الفطام كان صدرى اتملى على آخرة وابتدى يتعبنى ...
دخلت آخد دش دافى علشان ارتاح شوية
واليوم التانى طبعا الوجع زاد وبقى الضعف ... ماما قالتلى انى اصبر وبعد 3 ايام بيبتدى اللبن يسحب والوجع يقل
بينى وبينكم انا مقدرتش استحمل الوجع
رحت للصيدلية ... ادتنى مسكن آلام .. اسمة اوفلام ... الصراحة كان جميييل ... كان فعلا بيسكن الالم ... وادتنى مثبط لهرمون البرولاكتين.. مش فاكرة الصراحة اسمة .. علشان يسحب اللبن من صدى
واخدتهم فعلا وابتديت ارتاح
الحمد لله دلوقتى بقالى حوالى شهر وشوية ...
والحمد لله بنتى دلوقتى مش بتطلب صدرى خالص ... حتى لو شافتة مش بتطلبة ...
كانت فى بداية الفطام لما تطلبة اقولها دة كخ او يع ... تبص لى شوية وتفتكر ان طعمة كان مر فتبعد
وخلى بالك اللى طفلك هيتعود علية وقت الفطام .... هيتعود فترة طويلة علية
يعنى لو عودتية انة يصحى بليل من النوم يشرب لبن او مياة بدل الرضاعة هيفضل كدة فترة طويلة
لو عودتية على النوم على دراعك وانتى واقفة هيتعود على كدة فترة طويلة
انا بنتى اول ما فطمتها كانت بتصحى بليل تعيط ... اوقات كانت بتعيط ساعة كاملة متواصل ... مكنتش بقوم بيها واقف لأنى فى مرة وقفت بيها وسكتت وكانت عايزانى اكرر الموضوع دة
كنت بكتفى انى افضل نايمة او قاعدة جمبها واغنى لها الاغانى اللى بتحب تسمعها على طيور الجنة ... وهى بتفضل تعيط لغاية ما تستسلم وتنام
دلوقتى خلاص عرفت ان مفيش فايدة فبقت لما تحب تنام تيجى ليا وتبقى عايزة تنام على دراعى
وياريت فترة الفطام تخلى حد تانى هو اللى ينيمها لو ينفع .. يعنى باباها ... جدها ..جدتها ..حد بتسكت معاة.. علشان تتعود انها ممكن تنام من غيرك او ان حد تانى ممكن ينيمها
وفى النهاية الفطام دة مرحلة ولازم تعدى عليكى انتى وطفلك ... لازم تستعدى لها ...
واستعينى بالله فهو خير معين
اتمنى انى اكون افدتكم بتجربتى المتواضعة
واتمنى تقولوا لى رأيكم وتعليقاتكم
الروابط المفضلة