الله يكون فى عونكم فعلا كلكم اللف و اختيار المدارس دا حاجة صعبة جدا

انا ابنى فى مدرسة بايونير و هى فى السيوف شارع الملاحة جنب الفيوتشر و البريطانية و اسكندرية للغات

الحمد لله مبسوطة جدا منها هو دلوقتى فى سنة سادسة ابتدائى مصاريفه حاليا حوالى 5500 او 6 الاف بس لانه بياخد 20% خصم لانه اول دفعة دخلت المدرسة

الادارة كويسة جدا و كذلك المدرسين
كثافة الفصول لا تزيد عن 22 طفل

المدرسة مشتركة و فى فى مبنى مستقل بادارة مستقله بداخلها اسمها برنسيس و دى بنات بس

و كمان المدرسة فيها اميركن ديفيجن و اى جى من اول ابتدائى

المصاريف تعتبر من غالية اوى زى باقى المدارس و الباص لغاية بيتى فى جناكليس 1200 جنيه و طبعا باص كبير و مش زحمة زى مابنشوف باصات مدارس التنسيق العيال فوق بعضها زى الفراخ
و اليونيفورم انتى بتشترى اللى بتحتاجيه بس من الهدوم و مش كل سنة بتشترى الحاجة كلها لو ولادك مش بتتغير مقاساتهم و لا بيبهدلوا حاجتهم و اسعارها عادية مش غالية اوى

الميزة فى المدرسة انها بتهتم بالرياضة جدا و فى فرق لكل الالعاب الرياضية تقريبا و كمان بيدخلوا بفرق مسابقات على مستوى الجمهورية و بياخدوا مراكز

اولاد اخويا فيها فى الابتدائى كمان و مبسوطين و بنات اختى فى اعدادى و ثانوى مرتاحين و مجاميعهم ماشاء الله كبيرة

الميزة فى المدارس دى انها بتدى شيتات فى كل المواد غير طبعا مدارس التنسيق اللى بتاخد الاولاد سنهم كبير و مش بيدوهم حاجة غير الكتاب المقرر و بيخلوهم يشتروا كتب خارجية يحلوا و يذاكروا منها انا اصحابى اللى اولادهم فى سادسة و فى مدارس النصر و فيكتوريا بياخدوا منى شيتات مدرستنا يصوروها و البوكليت اللى بيعملوه عشان ولادهم يذاكروا منه

بنت خالتى بنتها اكبر من ابنى بسنتين و عشان كانت عايزة تدخلها سيكرت هارت فضلت مستنية التنسيق و دلوقتى البنت عندها 13و شوية سنة و فى سادسة مع ابنى اللى عنده 11

متقلقوش من صغر سن الاطفال لان دلوقتى الاطفال ماشاء الله بقوا واعين غير زمان و بيدخلوا على النت و بيلعبوا بلاى ستيشن فبيكون مخهم ماشاء الله مصحصح عننا زمان بكثير

و موضوع المدارس الدينية و الكلام دا اى حد ممكن يديه لاولاده فى البيت يجيب لهم شيخ يعلمهم قران و لا يوديهم اى دار تحفيظ
المهم ان يكون فى انشطة و رياضة تشغل الاولاد بالذات عن البنات

و فى الصيف عندهم نادى صيفى لاولاد المدرسة

و فى مبنى فى جليم على الترام دا للصغيرين عشان ميروحوش كل المشوار البعيد دا

انشاء الله اكون ساعدتكم شوية

انا زيكم كنت كدا محتارة لما كنت بدخل ابنى المدرسة و لفيت على كل اسكندرية ولاكانى لجنة من وزارة التربية و التعليم

و فى الاخر متتعبوش نفسكم اوى كلو بيتساوى المهم الولاد يكون عندهم لغة كويسة و كمبيوتر ممتاز و يكونوا بين ناس مستواهم متقارب من بعض عشان ميكنش فى اى فروق زيادة بين الاولاد لان دى بتفرق كثير

يعنى ممكن تتغطوا على نفسكم و تدخلوا الولاد مدارس و تبقوا مش عارفين تتجاوبوا مع الاولاد فى مصاريفهم جوا المدرسة بعد كدا

اختى دخلت اولادها مدرسة اميركن الاكاديمية و بتعانى من مصاريف الاولاد جوا المدرسة و احتياجهم لفلوس كثير عشان يصرفوا زى اصحابهم و اى رحلة و لا نشاط بيكون طبعا بفلوس كثير تناسب مستوى معيشة التلاميذ دى

شكرا يا شيرووووو على مداخلتك الجميله وانا متفقه معاكى على موضوع ان الاهم فى المدرسه هو التميز فى العلم والانشطه اما الناحيه الدينيه ممكن تعويضها بس لو موجوده يبقى خير وبركه
انا بس لى سؤال هو سن الدخول فى الكجى من سن كام وهم بيدرسوا الفرنساوى من سنه كام

ازيك يا هناء, الفيوتشر future مدرسة مشهورة اكيد سمعتي عنها عموما هي نفس سياسة المدارس الجديدة زي هاوس اوف انجليش,اسكندرية للغات, و المصرية الانجليزية بس هي مصاريفها غالية وليها شير اللي هو تامين مسترد بعد كام سنة اسمع ان المصاريف مع الشير اول سنة بيوصلوا 12 الف لكن مش متاكدة و كمان فيه مدرسة بيشكروا فيها اوي اسمها فرونتيرز frontiers بس مش عارفة مصاريفها كام ممكن تسالي 140 دليل على تليفونها و اتصلي اساليهم عالمصاريف لو مناسبة ممكن تروحي تشوفيها بيقولوا كويسة اوي انا سمعت عنها كتير بس كنت ناسياها....

و انا فعلا قلت ان المصرية الانجليزية قوية علميا و لغويا و خاصة قسم ال كي جي لان مديرته ادارية ناجحة و مجتهده... و ابني مستواه كويس اوي خاصة في الانجليزي ...بس انا عايزه مدرسة ما تكونش مختلطة, و كمان تكون اسلامية علشان الاولاد يطلعوا في بيئة صحيحة و يتعودوا عالالتزام و يحبوه... صدقيني هو ده المكسب الحقيقي.....


اما عزيزتي شيرو اولا اهلا بيكي ...
ثانيا بايونيرز فعلا مدرسة كبيرة و متميزة خصوصا رياضيا هي جنب مدرسة ولادي على طول... و انا روحت ايام ما كنت باقدم لابني بس ايامها الموظف قال ما بناخدش اقل من 4 سنين مع ان عرفت بعد كده انهم خدوا ...و كمان كنت بادرب ابني فروسية فيها و هي ملاعبها كبيرة و جميلة و مصاريفها معقولة بس بياخدوا شير....

لكن انا بادور على مدرسة مش مختلط انا اخويا كان في ليسيه الحرية و صدقيني الاختلاط له مشاكله خصوصا في سن معينه ....

كمان عايزه اقولك ان التربية الدينية مهمة جدا و البيت مش كفاية لان ممكن تربي و تعلمي في البيت و المدرسة تهد اللي بنيتيه..... خصوصا انه بيقعد فيالمدرسة اكتر من البيت..... و الاولاد بيتاثروا جدا بمدرساتهم و بيصدقوهم في السن دي اكتر ما بيصدقوا مامتهم ...

عموما ادعو الله انه يبارك في اولادنا جميعا و يحفظهم... و ادعو انكوا كلكوا تتوفقوا في اختيار مدرسة مناسبة و ربنا يوفق اولادنا جميعا ........اللهم امين

اهلا يابنات ازيكم كلكم واهلا بى شيرووو
كده يا ياشيرو بايونيرز معدية ال 6500 صح ؟؟؟؟؟؟؟ هيبقى كتير اوى
اما يا رانيا مدرسة frontiers صاحب جوزى بنته فيها وكانت من اول مفاتحت وواخدة خصم
بس هى دلوقتى غالية وكمان الادارة فيها اتغيرت وبقت وحشة تعرفى المديرة اللى كانت
مسكاها اول ما فتحت سابتها وماسكة دلوقتى مدرسة هلالية
وصاحب جوزى بيقولوا انه مخلى بنته فيها عشان الخصم اللى واخده لكن من ببعد المديره ما سابتها المدرسة وقعت
ويارانيا حيرتينى يعنى ابنى لو دخل بريليانس مش هيبقى قوى فى اللغة؟؟؟؟؟؟؟؟
بس احنا عندنا فى القاهرة كل المدارس الاسلامية اللى مش تابعة للازهر قوية جدا
ربنا يستر.......
بصى مدرسة ليدرز عجبتنى كلام مديرتها عنها ... انها بتدرس منهج ميكميلان
بتدى الولاد حصص قران اضافية ... المبنى المدرسى شبة الفيوتشر بالظبط
وكمان الملعب بس لسة مشفتش انشطه لان المدرسة لسة اول سنة ليها السنه دى
حفلة التخرج بكره الجمعة وهنشوف اية النظام الساعة 6 مساء
هاروح ان شاء الله واقلوكوا اية النظام

رانيا انا نصيحتى ليكى متغامرييش وتنقلى ولادك ليدرز لانهم مبسوطيين فى مدرستهم
واللى تعرفه احسن من اللى متعرفووش
انتى تجازفى فعلا بس عشان التربية الاسلامية

السلام عليكم ورحمة الله

كلنا نعلم من شب على شئ شاب علية وانا ضد من يقول نحن نعوض التربيه الاسلامية فى الخارج دة الاولاد بيقعدوا فى المدرسة مع اصحابهم ومدرسنهم اكتر ما بيقعدوا مع أبائهم وبعدين الحكاية مش حفظ قرآن وخلاص لا ده عقيدة واسس ومبادئ بنزرعها فى أولادنا وبعدين أتحدى أى أحد بيحفظ أولادة قرآن أثناء الدراسة وخاصة لو الولد فى خامسة أو أولى أعدادى الكل بيقول المدرسة والواجبات هيحفظ امتى بس فى الصيف فى الصيف ان شاء الله هبقى أحفظه صح أم خطأ .وبعدين عايزة اشوف أى مدرسة عودت الاولاد مثلا على عيادة المريض احنا لما ولد بيتعب بيبعتوا مع الاولاد رقم تليفونه ويتصل بة أصحابة ويقولون شفاك الله وعفاك دة ابسط مثال ممكن اقوله
ده حتى الباص بتاع المدرسة لهم منهج فى الادعية أبنى حفظ أذكار الصباح والمساء منهم أى شيخ ممكن يعوض هذا وبعدين كتير قوى متخرجين مش من مدارس لغات لا من الجامعة الامريكيه وتعالوا شوفو بيعملوا اية وسلوكياتهم اية وكلهم اهاليهم مافيش حد قدر يعوض التربية فى البيت ؟؟؟
يارب دايما تجعلوا كل شئ تقدمون علية لله وستجدون الله معكم ييسر حالكم ويسدد خطاكم .

بالنسبة للغه أبنى بقالوا سنتين فى المدرسة كجى 1 وكجى 2 أنا شايفة الاولاد كويسين وفية شيتات كتير خالص ومراجعه مستمرة وهو الان ما شاء الله لا قوة الا بالله بقرا أجليزى وعربى كويس جدا ونطقة جميل والله بدون مبالغه لما بيتصل بأحد من اصحابة بالمدرسة نصف المكالمة بتبقى أنجليزى

وللأمانة انا ما جربتش مدارس اخرى لكن بالمقارنة مع صديقاتى اللى اولادهم فى مدارس أخرى زى أسكندرية مثلا مستوى بريليانس حلو مع ان المدرسه جديدة

طمنتيني يا ام بيجاد و حاقولك بالامانة انا كنت مستعدة اتنازل شوية في موضوع اللغة ,يعني لو الفرق حيكون بسيط بينه و بين طلاب مدارس اللغات التانية ,في سبيل انهم يتربوا التربية الاسلامية الجميلة اللي حكيتي عنها, لكن المشكلة ان والدهم هو اللي قلق لما سمع الكلام ده و قالي بلاش نجازف بعدين الولاد مستواهم ينزل في الدراسة و نرجع نندم..... خاصة ان احنا لما دخلنا الولاد مدرستهم كانت من غير شير لكن دلوقتي لما اتشهرت بياخدوا من الطلاب الجدد 2000 جنية رسم تسجيل فهو خايف يسيب الميزة دي و بيقول البريليانس لسة جديدة نستنى شوية لما نشوف نجاحها...

الحقيقة انا لسة نفسي انقلهم بس مستنية لما نروح نزور المدرسة الاسبوع الجاي و متوقعة لما يشوف المدرسة و يشوف الفرق بين جو المدرستين حيقتنع ان شاء الله و الاهم من كده ان احنا اتفقنا بعد ما نرجع حنصلي استخارة و ان شاء الله ربنا يلهمنا الصواب ...

ربنا يطمنك ويبشرك بالخير ياأم بيجاد
وربنا يحفظلك اولادك وتشوفيهم احسن الناس دينيا واخلاقيا وعلميا ...آمين يارب العالمين

السلام عليكم اختي ام بيجاد
الحقيقة باشكرك على احسسك النبيل و قلقك عليا

و انا اظن ان الفروق اللي سمعت عنها فروق فردية لان ما فيش طفل زي التاني و حتى لو فرضنا ان مستوى اللغة اقل شوية فهل الفرق البسيط ده اهم من النشأة الدينية للاطغال ؟ .. خصوصا ان الجيل ده غير جيلنا ,الدنيا متفتحة قدامهم بشكل مخيف :انترنت و دش ,و بيتهيألي لو ما كناش نزرع فيهم الدين و الالتزام من صغرهم حيجي وقت مش حنعرف نسيطر عليهم.

و بعدين لو قلنا احنا عايزين نطلعهم اقوياء علميا و لغويا عشان مستقبلهم ,فالمستقبل بايد ربنا وحده و كمان الحياة و الموت في علم ربنا , و من حقهم علينا و احنا بنخطط لمستقبلهم نعمل موازنة بين الدنيا و الاخرة لانهم امانة و حنسأل عنهم امام الله.

انا تقريبا و اخده القرار و عندي حسن ظن بالله ,لان مش ممكن اعمل حاجة قاصده بيها وجه الله و تكون النتيجة ضرر لاولادي.......و صدق الله إذ قال "و من يتق الله يجعل له مخرجا و يرزقه من حيث لا يحتسب"

بس ادعيلي اني اقدر اقنع باباهم و ان ربنا يوفقنا جميعا لما يحب و يرضى
و يا ريت لو ممكن عنوان بريدك الالكتروني لان المنتدى ما بيسمحش بالرسائل الا بعد 300 مشاركة و انا لسه جديدة.

و باشكرك يا شيماء عل المعلومات عن فرونتيرز و شكرا كمان على النصيحة و انتي عندك حق انا ما كنتش حاجازف و انقلهم من ال EELS الا لو لقيت مدرسة لغات و اسلامية في نفس الوقت لان نقل الاولاد ممكن ياثر عليهم نفسيا لانهم حيسيبوا صحابهم و المكان اللي اتعودوا عليه و يروحوا مكان ووسط جديد .فلازم يكون فيه سبب قوي يخليني انقلهم