حبيباتى الغاليات
وحشتونى كتييييييييييييير
الغالية التقوى الأصلية كانت سبق وسألت عن كيفية ضبط مقاس قبعة تريكو؟
فى الرابط ده
وللغالية التقوى الأصلية ولكل البنوتات الحلوات
الموضوع سهل جداً يا جماعة
أولاً: تحديد مقاس الابر
معظم الخيوط بيكون مكتوب عليها حجم الابر المناسب للشغل
لأن حجم الابر مهم جداً عشان شد الخيط يكون مضبوط
يعنى لو الخيط تخين والابر رفيعة بيكون الشغل مشدود وتقيل (يعنى مسامه بتكون ضيقة جداً)
ولو الخيط رفيع والابر كبيرة
بيكون الشغل مفرغ ومش حلو
فمراعاة تناسب حجم الابر مع سمك الخيط من الحاجات المهمة
طيب نيجى بأة للخطوة التانية وهى خطوة أخذ المقاسات
عادة بيكون فيه جداول مقاسات ممكن نمشى عليها ونعرف المقاس المطلوب
لكن مش دائماً الجداول دى بتتماشى مع اجسامنا... ده فى حالة وجودها من أساسه
بنتغلب على الموضوع ده باننا ناخد مقاساتنا باستخدام المازورة
أو نقيس على قطعة ملابس مضبوطة موجودة عندنا
طيب بعد ما حددنا المقاس الطلوب
ازاى نحدد عدد الغرز اللى هنشتغل بيها الموديل
(واللى أعتقد انه الهدف الأساسى من السؤال)
أفضل طريقة اننا نشتغل عينة من الغرز اللى ناويين نستخدمها بنفس الخيط ونفس حجم الابر اللى ناويين نشتغلهم
ونقيس محيط الصدر ومحيط الوسط للشخص اللى احنا عايزين نعمله الموديل
طبعا بالنسبة للمحيطات نقسمها على 2
يعنى لو المحيط مثلا = 80 سم يبقى اذاً نصفه (اللى بيمثل الصدر او الظهر) هيساوى 40 سم
وبعدين نقيس أبعاد العينة بالسم
(يعنى الطول والعرض)
والحقيقة ان اللى يهمنا اكتر هو العرض
يبقى لو احنا محتاجين 40 سم والعينة مثلاً عرضها 13 غرزة بـ 7 سم
يعنى السم الواحد فيه غرزتين تقريبا يعنى احنا محتاجين 80 غرزة بداية
يعنى ممكن نزود 4 غرز مثلا عشان الخياطات والكلام ده
هى تبان صعبة شوية لكن مع الخبرة والتكرار هتعمليها بمجرد النظر
وآخر حاجة بأة
توزيع الغرزة على الشغل
بنشوف احنا محتاجين نكرر الغرزة كام مرة عشان خاطر نجيب العرض اللى احنا محتاجينه
ويبقى ده نفس تكرار الغرزة
يعنى فى المثال اللى فات
احنا قلنا اننا محتاجين 80 غرزة للبداية وعرض الغرزة المطلوب عملها = 13
يبقى محتاجين نقسم 80 على 13 = 6
ويزيد غرزيتن (13× 6 = 78) نعمل واحدة على الحافة يمين وواحدة شمال للخياطات
دى تقريباً كل الخطوات المطلوبة لتنفيذ أى موديل
ودى مجموعة صور للتوضيح
وكمان واحدة أقرب شوية
وكمان هتلاقى مثال عملى فى ورشة الشال اللى احنا عملناها
واللى الصور متاخدة منها
اتفضلى الرابط
http://www.lakii.com/vb/showthread.php?t=702280
المشاركة رقم 31، 32
أتمنى ان الشرح يكون واضح ومفهوم
وأنا حاضرة لأى استفسار أو تساؤل
على فكرة أنا عندى فيديو يوضح الطريقة
بس مش عارفة ارفعه من على الجهاز
أنا نزلت موضوع مخصوص فى ركن الكمبيوتر اسال ازاى ممكن ارفع مقطع فيديو
وبمجرد ما يجينى رد
ارفعه على طول
فى امان الله
الروابط المفضلة