نداء عاجل لماما ام قسمت

**مدام ايمان** · 20-10-2009, 10:01 PM

السلاموا عليكم ورحمة اله وبركاته

معلمتي الغالية يؤسفني قلت اعمال التريكو في هذا المنتدى وياريت ما اتقل عليكي بطلبي كنت عايزة توضحيلي طريقة عمل بنطلون تريكو من ناحية كيفية اخذ المقاسات وياترى نبدا من الرجل ولا من الوسط وامتى ازود وانقص ولو فيها تعب ممكن كمان قبعة تريكو
ولكي جزيل الشكر

**elbt_84** · 20-10-2009, 10:04 PM

بالتوفيق

**افنان المصرية** · 21-10-2009, 12:25 AM

ياريت يكون طقم كامل ونعملة ورشة
حتى نتقن الحردات وكل الى اتشرح فى الدورة

**أم قسمت** · 21-10-2009, 12:51 AM

.

بصي يامدام ايمان ياغاليه
البنطلون بيتعمل يااما من الوسط وتقسمي للرجلين او من الرجلين وتجمعي في الوسط
وممكن يتعمل علي ابر دائريه وده في اغلب الباترونات
او ابر مستقيمه وده بيكون نادر
البنطلون اللي فوق ده معمول علي ابر دائريه من تحت لفوق
وده معمول من عند الوسط لتحت علي ابر دائريه برضه

وده كمان

شوفي اللي فوق ده يلبس سن 1-3شهور و 6-9شهور و12-18شهر و (2-3و4)سنين وده الدايجرام بتاعه

واستني حاادور علي بنطلون بتعمليه علي ابر مستقيمه

**أم قسمت** · 21-10-2009, 01:31 AM

شوفي البنطلون ده معمول قطعتين علي ابر مستقيمه

**مدام ايمان** · 21-10-2009, 02:13 AM

شكر ماما للرد وفعلا انا عايزة البنطلون ع ابر مستقيمة وتقوليلي لما ابدا من الوسط واقسم للارجل بنزل البنطلو بنفس عدد الغرز ولا فيه تنقيص كام غرزة وامتى وياريت القبعة الي في الموديل الاخير وياريت تكون ع ابر مستقيمة مع جزيل الشكر لمرورك الكريم

**أم قسمت** · 22-10-2009, 05:01 AM

حبيبتي البنطلون ده بيبتدي من الرجل
بتبدئي علي عدد معين من الغرز وحااشر حلك علي اصغر مقاس اللي هو 1-3شهور
البنطلون مشغول بالغرزه المرنه علي ابر مستقيمه وبتشتغلي قطعتين قطعه للامام وقطعه للخلف وتوصليهم ببعض بخياطه منتصف الامام ومنتصف الخلف

الرجل اليمني
ابدئي علي 52غرزه (متضمنه غرزتي رف علي الناحيتين) علي ابر رقم 2ونص مم واشتغلي بالغرزه المرنه
لما يوصل طول القطعه 8سم زودي غرزه علي كل جانب وكرري الزياده كل 1ونص سم 8مرات وكده ايوصل عدد الغرز 68غرزه

لما يوصل طول الشغل 22سم اقفلي غرزتين من اول السط التالي وعلي وجه الشغل واشتغلي السطر لاخره وبعدين اقفلي غرزتين في اول السطر التالي علي ضهر الشغل
اشتغلي فوق الغرز الباقيه (64)غرزه ثم اقفلي غرزه في بدايه كل سطر علي وجه الشغل (يعني من ناحيه منتصف الامام )مرتين وكده ايكون عندك 62غرزه
استمري بالغرزه المرنه حتي يصل طول الشغل 40سم ثم اشتغلي 2سم بليسيه ثم اقفلي

الرجل اليسري
ابدئي واشتغلي زي الرجل اليمني بس بالعكس في الحرده اللي عند منتصف الامام

الخياطه
خيطي القطعتين معا من منتصف الامام ومنتصف الخلف واثني البانده بتاعه الوسط لجهه الخلف وسيبي فيها فتحه صغيره لادخال الاستك واثني طرف الرجل الاسفل لاعلي علي الوجه الامامي (وده حسب رغبتك)
وكده البنطلون خلص
الطاقيه معموله علي ابر دائريه
لو مافيش مشكله اشرحها لك
وعلي فكره ممكن تعملي ايس كاب زي ده بسهوله بانك بتبدئي علي عدد غرز = محيط الراس وده سهل تقيسيه بمازوره او حتي قطعه خيط
واشتغلي يليسيه لطول تقريبا 15سم (تبع المقاس اللي عايزاه)وابدئي اقفلي في سطر غرزتين في غرزه ثم اشتغلي السطر اللي بعده عادي وبعدين اقفلي تاني كل غرزتين في غرزه وبعدين دخلي خيط في الغرز الباقيه وشدي واعقدي الخيط وممكن تعملي بونبونه او اي حليه
ممكن ضفاير مكان البليسيه او اي غرزه تانيه

**أم قسمت** · 22-10-2009, 05:03 AM

كتبت بواسطة افنان المصرية

ياريت يكون طقم كامل ونعملة ورشة
حتى نتقن الحردات وكل الى اتشرح فى الدورة

باذن الله ياقمر بس اخلص الورشه اللي باعملها وانقي لكوا طقم حلو

**mekkaouinana** · 22-10-2009, 05:46 PM

بارك الله فيك يا ام قسمت انا ايضا استفدت

**مدام ايمان** · 22-10-2009, 09:35 PM

ماما ام قسمت شكرا للشرح بس بصراحة انا مفهمتش شرح البنطلون
وبالنسبة للايس كاب بتقولي اني اشتغل غرزتين في غرزة وسطر عادي ثم غرزتين في غرزة
التنقيص ده هعملوا في بداية ونهاية السطر ولا هيكون التنقيص كدا من ناحية واحدة للايس كاب