سؤال لام الجمال و الرقه ام قسمت الغليه؟؟

**زهرة من الوادى** · 29-07-2007, 01:31 AM

سؤال مهم اوى عشان البلوفر البعمله لماما

دلوقتى الحرف ماما عاوزه بليسيه
عرفه اقصد ايه صح ؟؟؟
لو عرفتى قوليلى اعمله و انا بشتغل فى الصدر الهوه الجزء الامامى ولا ايه ؟؟؟؟

**زهرة من الوادى** · 29-07-2007, 10:39 PM

21 حد شاف الموضوع و ولا رد برضو مش هيجيلى احباط

**Eman1977** · 30-07-2007, 01:48 AM

يا زهرة السؤال مش واضح
البلوفر ده تريكو ازاي تعملي الحرف بعد ما اشتغلتي خلاص المفروض انك بتعملي عشر اسطر مثلا أو حسب العرض المطلوب بليسيه في الأول و بعدين تكملي بالغرزة اللي انت عايزاها
بس برضه ممكن الخبيرات يفيدوكي أكثر مني
و مبروك مقدما علي مامتك

**زهرة من الوادى** · 30-07-2007, 02:40 AM

لا انت فهمتينى غلط

الحرف الهعمل فيه العراوى

**أم قسمت** · 30-07-2007, 03:04 AM

حبيبتي زهورتي
معلش اتاخرت عليكي انا مش فاهمه انتي بتشتغلي جاكيت لماما ؟؟
كده تبقي عايزه المرد مش كده ؟؟

**كوتى** · 30-07-2007, 03:22 AM

كتبت بواسطة زهرة من الوادى

لا انت فهمتينى غلط

الحرف الهعمل فيه العراوى

زهرتي الجميلة ..
مبروك علي مامتك مقدماً تدوبه في عرق العافية ووقت الأفراح .. وربنا يعوض مجهودك برضا جميل منها ودعوات تكون من نصيبك والله يستجيب ان شاء الله .
أولاً هو البلوفر تريكو ولا كروشيه ولا الثنين معاً ؟؟!
بالنسبة للبليسيه هو مصطلح ينتمي لشغل التريكو وبيتكون نتيجة تبادل بين الغرزةالعدل والغرزة المقلوبة مما يعطي خواص الأستيك المطاطي لذا يستعمل في حرف الشغل مثل الكمر السفلي للبلوفر أو الجاكيت وفي أساور الكم وكذلك اللياقة والمرد الأمامي ... وممكن نعمله واسع وممكن نعمل ضيق .
اللي قدرت أستخلصه من كلامك أنك عايزة تعمليه في المرد اللي هيكون به العراوي والأزرار .. صح كده ؟؟؟
أنا هأعطيكِ نموذج عنه .. شوفي البلوفر ده هتلاقي البليسيه في الأساور واللياقة باين وهو مشغول علي واسع .. وكمان في المرد لكن مشغول بالطول (أفقي) .. يارب اكون وصلتلك المعلومة
شوفي الأول وبعدين نكمل ..

**زهرة من الوادى** · 30-07-2007, 05:20 PM

اه هو فعلا انا اقصد المرد

معلش غلبتكم

**زهرة من الوادى** · 31-07-2007, 06:51 PM

طب اعمل ايه فى ماما الهتجنوقنى لو مخالصتش الجاكيت

**ام عمرو 28** · 31-07-2007, 07:38 PM

طب اعمل ايه فى ماما الهتجنوقنى لو مخالصتش الجاكيت

ههههههههههه حبيبه قلبى كان نفسى اساعدك و الله بس ما عندى فكرة
ان شاء الله الاخوات يساعدوكى وربنا يخليلك مامتك و تعيشى و تعمليلها

وبعدين يا بنات كله الا ست الحبايب عايزين مساعده فى اقرب فرصه

**أم قسمت** · 31-07-2007, 09:31 PM

زهورتي معلش اتاخرت عليكي
شوفي ياقمر انا باعمل المرد بطريقتين
يااما القط علي الوجه الامامي يعني مثلا ابدا من الجنب اليمي من الحرف من تحت واخد بالابره غرز علي طول الجنب والف علي الرقبه من الخلف وبعدين الجنب اليسار نزولا الي الاسفل يعني زي مااكون بالف مع المرد وبعدين تبدئي تشتغلي بليسيه زي ماانتي عايزه يعني واحده وواحده او 2 و 2 وتعملي حساب العراوي بتكون تقريبا في الحريمي في الناحيه اليمين كل مره باتلخبط في مكانها انتي تحددي اماكنها يعني مثلا كل 10 سم او 15 سم وتعمليها وتطولي المرد زي ماانتي عايزه وبعدين تقفلي الغرز كلها وبصي علي طريقه اللقط في الدوره بتاعتي
فيه طريقه تانيه انك تشتغلي شريط بليسيه طويل وتركبيه علي حافه المرد مع عمل حساب العراوي
فهمتي يلست الكل ولا تبعتي لي الجاكيت اشطبه علشان خاطر ماما