ازيكم يا قمراااااااااااااااات
وحشتووووووووووووووووووووووووووني جدا
النهاردة جايبالكم تجربتي انا مع السكر الدايت او السكر البديل زي ما بيقولوا عليه
طبعا اللي يعرفوني يعرفوا اني زي ناس كتير بقالي سنين في موضوع الدايت و سنينه هههههههههههههههه
و بقيت خبرة
انا استعملت من انواع السكر البديل
الدايت سويت
بس مش حبيته عشان بيغير طعم المشروبات و كمان فيه مرارة في الاخر او اللي بيقولوا عليه after taste
لما كنت بأرضع مؤمن ابني ( هو دلوقتي 7 سنين) الدكتورة كتبت لي شوجر ماتش استخدمه
لقيته حلو اوي و مش بيغير طعم المشروبات و لا الاكل لو مهلبية مثلا او بليلة او اي حاجة و من يومها و انا باستعمله
لقيت من فترة طويلة كده ان انا باحس بصداع غريب بعد ما اشرب النسكافيه و كمان البيبسي الدايت
او اي مشروب دايت يعني سفن دايت او سبرايت زيرو او كوكاكولا زيرو
صداع رخم جدا كأن ضغطي واطي و نفسي غامة عليا هههههههههههههههههههه
مرة افتكر ضغطي واطي و مرة افتكر ان من الدايت و مرة غيرت نوع النسكافيه
بس لاحظت ان ده بيحصل كمان بعد اي مشروب فيه سكر دايت اللي هو الشوجر ماتش
لاني مرة ما كانش عندي و شربت النسكافيه بسكر عادي ف اتفاجئت اني ما حستش بالصداع المعتاد
مع العلم اني بأستعمل السكر الدايت بكميات قليلة جدا يعني كيس واحد مع النسكافيه و كيسين مع الشاي الاخضر يعني من الاخر من بأعدي 5 اكياس في اليوم
و هو مكتوب لغاية 50 كيس في اليوم آمن
و طبعا مش باخده يوميا طول السنين دي لا طبعا مش طول الوقت دايت
المهم فكرت ان مادة الاسبرتام هي القاسم المشترك بين الشوجر ماتش و المشروبات الدايت
قلت بس يا بت يا بيرو انتي هاتي سكر دايت خالي من الاسبرتام
و قد كان رحت اشتريت سويتال
فيه طبعا انواع تانية كتير خالية من الاسبرتام بس انا بأحكي عن اللي جربته انا
و فعلا فرق كبير جدا ما بقاش فيه صداع بعد المشروبات
و طبعا بطلت المشروبات الغازية الدايت انا اصلا مش بحبها اوي و كمان تعملي صداع ؟
و الحمد لله الامور دلوقتي احسن بكتير و تحت السيطرة
بس قلت اجيب تجربتي و اجي بيها جري و اقولهاكم يمكن حد ينتفع بيها او بنوتة كيوتة تكون بتحس بالاعراض دي و مش اخدة بالها انها من السكر الدايت
و طبعا مقدرش اعمم يمكن انا بس اللي حصل لي كده
يا رب يكون الموضوع مفيد
الروابط المفضلة