الرياضة في حياتي .. ( تجربتي و نصائحي المتواضعة لكي لا تشعري بالملل ) خاااص بالمسابقة
موضوعنا هالمرة عن الرياضة صديقة الريجيم .. عشرة عمر
و المعلومات بالركن صارت كافية و وافية عن الرياضة و فوائدها للجسم بشكل عام و ما رح كررها ويصير موضوعي مجرد اشتراك بالمسابقة
و لما تشوفوه تقولوا افففففف و تشتش الصفحة و تصير بدها تغيير خخخخخ
و الصراحة رح اتوسع بتجربتي أكتر لتعم الفائدة و تجنبا للتكرار لكن لابد من نبذة بسيطة عن الرياضة منقولة بتصرف
الرياضه هي عباره عن حركات منتظمه يقوم بها الشخص لتحقيق هدف معين يسعى له
ولها فوائد كبير لجسم الانسان و تمارس الرياضة لأهداف كثيرة
منها
التسلية و المرح و الترفيه و إنقاص الوزن و تقوية الجسم و عضلاته
و عدم ممارسة الرياضة
تجعل عضلات الجسم دائماً في حالة ارتخاء وضعف. ويصعب علي القلب والرئة أن يقوما بوظيفتهما بصورة جيدة أو تصاب المفاصل بضعف ويمكن إصابتها بسهولة
و للرياضة أشكال كثيرة
لكن ما يهمنا في ركننا الغالي الرياضة التي تساعدعلى المحافظة على لياقة الجسم و خسارة الوزن :
1- رياضة الكارديو
و هي التي تقوم بتنشيط القلب و الدورة الدموية و تعتمد على السرعة نسبيا1. الجري المتواصل2. الآيروبيك 3. الدراجات الهوائية4. السباحة .....
2-رياضة بناء عضلات أو تمارين المقاومة
انه زيادة على حرق الدهون فانه يقوم بنحت شكل الجسم لذلك يسمى Body Sculpt مثل تمارين المعدة و الاوراك وغيره
- الأجهزة الرياضية مثل الدراجة و السير و الأوربتراك ...
أما بالنسبة لتجربتي :
طبعا بدأت من فترة طويلة بعد كل حمل و ولادة بالتفكير بخسارة الكيلوغرامات الزائدة
سجلت أكتر من مرة بنادي لكن مؤشر الميزان ما تحرك ولا غرام لأني ما كنت أعرف كيف لازم خفف من كمية الطعام
أما من حوالي سنتين بعد ولادتي ابني الثالث زدت كتير و صار وزني 85 و شكلي يا لطيف و أنا اللي كان وزني 55 و شو ما لبست بيلبقلي و اسمعوا تعليقات أهلي و النصائح اللي بتسم البدن
عملت ريجيم و نزلت للـ 65
الرياضة اللي اعتمدت عليها :
1 - جهاز أوربت تراك اللي كان عندي من سنين طويلة و الصراحة الجهاز رااااائع و حلاوته بيسلي كتير و ممتع
2 - CD آيروبيك لـ دنيس أوستن كمان روعة و ممتع و بيساعد عالاستمرار بالرياضة لفترة زمنية حوالي النصف ساعة مع بذل مجهود كبير
3 - جربت المشي بالهواء الطلق
طبعا رجعت حملت و رجع وزني طلع للـ 89 هالمرة
بس هالمرة الجهاز بح لأنه معلومكن هاد جهاز و بعد فترة بيعطل
و CD الآيروبك كمان العوض بسلامتكن ..
و بالنسبة للرقص خشـــــبة بعيد عن السامعين ما بعرف .. يلا أصلا الرقص مو مشكور ههههه
ما صفي غيييير رياضة المشي اللي ما بطيقها بــــــس ما باليد حيلة مرغم أخاك لا بطل
التحديات اللي واجهتني مع رياضة المشي و رب العالمين قدرني بنعمته و فضله اتغلب عليها :
1- الحر
2- الملل
3- ضيق المكان
تغلبت عليهن بالتالي :
أول الشي بالنسبة للشوب كان المكيف دااااائما شغال و على أخفض درجة و زجاجة الماء أمامي دائما حتى هلأ بالشتاء أول شي بعمله بحضر المي
و ما خليت صغر المكان يزعجني كنت العب ولو حتى هرولة بمكاني
بالنسبة للملل اللي هو العدو الأول للرياضة بالنسبة لي طبعا أحسن شي الاستغفار و قراءة القرآن و أحيانا كنت افتح على قناة القرآن الكريم و السنة النبوية روووووعة
و أحيانا على برامج مسابقات
بعدين عرفت انه رياضة المشي أقل رياضة بتحرق سعرات و نصحوني بنط الحبل ركبي مو ماكنين خخخ و ما بعرف نط بتفركش و بروح على وشي صرت هرول بخطى واسعة كالجري مع تحريك الذراعين بعكس حركة القدمين
نصااائحي من وحي تجربتي الخاصة :
1- لبس ألبسة قطنية غير ممزوجة و حذاء خاص بالرياضة
2 لو كنتي تدوري دوران على شكل دائرة في الغرفة انصحك بتغيير الاتجاه كل فترة مثلا أنا ما بدور غير باتجاه الطواف حول الكعبة بعد فترة صارت ركبتي اللي بتكون من جوا الدائرة اللي بيكون أكتر الضغط عليها توجعني لذلك صرت دور بالعكس باتجاه عقارب الساعة يعني كل شوي غير الاتجاه
و لو الرياضة عندك بالصالون :
1- تجنبي الأخبار المحزنة لأنها رح تعملك احباط و بتصيري بتجري رجلك جرر و موناقصنا
2- ممكن تشوفي الأخبار اللي بتعمل عندك نوع من الحماس و مافي مانع لو ترفعي شعارات طبعا لو عملتي هيك بتصيري بطيري طيران و بتحسي حالك رح تصلي للســـقف هون ما بقدر ساعدك بالمرة حالفة يمين معظم لجوزي ما احكي بالسياسة قال أنا عاطفية و ما بسيطر على مشاعري خخخخ خلص بظروف أحسن من هيك ان شاء الله
3- حتى تحافظي على تركيزك و انت عم تلعبي و ماتشردي ممكن تعتمدي على العد بالتنسيق مع الساعة مثلا كل خمس دقائق بتعدي 100 نطة ممكن سريعة أو وسط حسب راحتك و بترتاحي و هيك على رأس كل خمس دقائق
أخيرا يا ريت تتنتبهي على أول عشر دقائق منيح يعني ما تكون مقطعة لأنه فيها بيبدأ الجسم يتفاعل مع الرياضة
رد مع الاستدلال
الروابط المفضلة