السلام عليكم و رحمة الله و بركاته
أنا الآن متورطة في الدورة الشهريةاللي صارت تقعد معي اسبوعين و بحاجة ماسة لنصائحكم قبل ما أدخل على الدكتورة
هذه المرة أبروح للخاص لأنه الحكومي ماستفدت منه كثير .. تخيلوا تقولي طبيعي ومافيه داعي اني أقلق
طول عمري و الدورة مدتها معي 6 أيام و ليلة اليوم السابع أنا مغسلة تجي منتظمة الحمد لله بالوقت و المدة حتى بعد ما جبت عيالي كانت كويسة .. لكن الآن لي حوالي سنة تاركة الحبوب و كل شئ (أنا منفصلة عن زوجي ) و الدورة كل مرة تزيد يوم وصرت الآن أقعد اسبوعين كاملة .. حاشا و الله مشتاقة أصلي و اقرأ قرآن
الأدوية الشعبية جربت الكثير منها .. ما استفدت كثير
أنا ناوية ان شاء الله أزرو الطبيبة علشان تكشف علي ولكن خايفة من السواليف اللي أسمعها عن استغلال المرضى بفلوس كثيرة و اجراءات مالها داعي .. تعرفون في بعض الأحيان ما يتكلمون الدكاترة معانا ويفهمونا حالاتنا بالضبط .. حتى الدواء يكتبون الوصفة و انتي ما تدرين ايش تسوين فيها .. تضطرين تنشبين بحلق الصيدلاني اللي ما يعرف ليش الدكتور وصف هذا النوع من الدواء
في الفترة الأخيرة صرت أقرأ الورقة المرفقة مع الدواء علشان أفهم النتائج و المضاعفات و ما أعتمد على كلام الدكتور
مرة دفعت 600 ريال علشان فحص الكولسترول ( كان الطبيب مشكك معي ارتفاع ) وبعد ما جلست سنتين خابرة روحي معي ارتفاع بالكولسترول .. قالت لي طبيبة ان المبلغ كان كبير مرة و الكولسترول معي طبيعي
أخاف يسون لي أشعة و أنا ما أحتاجها أو فحص للهرمونات أو أي تحليل ثاني ما له داعي بس علشان ياخذون $$ ..
ممكن خواتي تساعدوني فيه أحد منكم مر بالتجربة و ايش سوت لك الدكتورة
وجزيتم خيرا
الروابط المفضلة