اولا باعطيكم شويه معلومات عشان تفهموا الموضوع كويس
انا عمري 23 سنه وقبل فتره قريبه يمكن من شهر شعبان صرت اعاني من بعض الاعراض وهي: العطش الشديد يعني مهما اشرب من سوئل سواء ماء او غيرها ما ارتوي ابدا وكنت دائما اشعر بان ريقي ناشف وكنت الله يكرمكم ادخل الحمام كثير لدرجه اني لايمكن امسك نفسي زي الاطفال يعني المهم في البدايه طنشت الموضوع قلت يمكن من الحر ولمن بداء رمضان زادت الاعراض صرت في نهار رمضان من كثر العطش الى احس فيه ما اقدر اتكلم والله العظيم وصرت احس بطعم مراره في فمي كانه اكلت علقم وكنت احس الم في عظامي كاني مضروبه وكسل وخمول المهم كلمت الوالده (على فكره هي مصابه بمرض السكر) على طول جابت جهاز تحليل السكر المنزلي وحللت كان لى ماكله تقريبا خمسه ساعات طلع425
وفعلا اليوم الثاني على طول رحت المستشفى وحللت وانا صايمه لى اكثر من14 ساعه وطلع311 الممرضه انفجعت تقولي انت اكلتي كثييير في الفطور ولمن عرفت اني ما زلت صايمه وما فطرت الى على كاس ماء انفجعت واول ما دخلت عند الدكتوره وشافت نتيجه التحليل قالت لى:....انتي مصابه بمرض السكر ولانك صغيره ما ينفع معاك الحبوب لازم تاخذي ابر انسولين طبعا انا من الصدمه قعدت ابكي وهذا شي طبيعي وقالت لى لكن ممكن انك تلحقي نفسك لو اتبعتي نظام غذائي وزودتي نشاطك ممكن يروح وخلال اسبوع اذا ما نزل عندك مستوى السكر لازم تبدائي تاخذي العلاج وفعلا عملت نظام غذائي وسبحان الله من الصدمه جاتني سدت نفس عن الاكل وصرت كل يوم امشي على الاقل نصف ساعه وكنت كل يوم احلل قبل الفطور وبعد الاكل بساعتين مره يكون مرتفع ومره يكون يعني مو قليل بس بالنسبه لى كان انجاز يعني وانا صايمه يكون240 او 235 وبعد الاكل بساعتين يوصل بعض الاحيان لل300 المهم اني استمريت على الرجيم والرياضه والحمد لله انا الان بافضل حال راحت كل الاعراض السابقه وصرت جسمانيا افضل بكثير لاني نزلت 12 كيلو وصار السكر مايرتفع عندي اكثر من170 وانا ماكله بس في شي ساعدني وكان جدا مهم وله الاثر الكبير(طبعا من بعد الله)وهي القرنفل والحلبه بالذات القرنفل احس انه السبب الرئيسي الى ساعدني على نزول السكر
لذلك انا الان اذا جلست مع اخواتي او احد من اقاربي واشوفه ياكل حلويات او دهون كثيره لازم اخليه يقلل لان ما ابغى احد يحس بنفس احساسي
والان اصبحت ما اقدر اشرب اي شي فيه سكر حتى لو قليل احس ان طعمه حالي جدا اتعودت على طعم المشروبات المره والاكل القليل الدسم اذا في يوم اكلت اكله فيها شويه دهون احس انه معدتي ما تقدر تتحمل
وفي النهايه الحمدلله على كل شي(قل لن يصيبنا الى ما كتب الله لنا) انا راضيه بالكتبه ربنا لى ولو كان كتب اني اتعالج بالابر صح اني حازعل شوي لكن هذا قدرنا والى يشوف مصيبه غيره تهون عليه مصيبته
وفي الختام اتمنى تدعوا لى بدوام الصحه لانها تاج على رؤؤس الاصحاء ولايراه الى المرضاء والله يعافيكم ويبعد عنكم وعن من تحبون كل شر واذى
الروابط المفضلة