ربنا معاكى ياقمر وعقبال يارب منفرح بيكى كدة فى بيت العدل يا ختى يارب(شفتينى وأنا بيئة) D: ونفرح كدة كمان بشهادتك
قولى لى صحيح اختارتى موديل الفستان ولا لسة وحتعمليه فين؟اصلى محتاسة ومفيش ولا موديل عاجبنى (على رأي ماما مبيعجبنيش العجب ولا الصيام في رجب)
يارب يفرحك ويسعدك ويخلى كل ايامك افراح وسعادة وهنا انتى وكل امة المسلمين يارب.

السلام عليكم و رحمة الله و بركاتة لللللللللللللللللللللللللللللللوولولولووولللى
دية زغروطة مصراوى عشان كل البنات الحلويين الللى فرحهم قرب ربنا يتمملكوا على خير يا رب
كح كح كح كح معلش صوتى اتنبح من الزغروطة ما بقاش فية نفس من الرجيم
على العموم مش هطول عليكو انا هكتبلكوا شوية حاجات كدة يا رب تفيدكوا
و انا بصراحة ما بحبش اكتب اى حاجة الا اذا كنت مجرباها على نفس لمدة طويلة اوى
و الحاجات دية هية خلاصة تجاربى جربموها و ادعولى لانها و الله نتيجتهابتظهر بسرعة جدا
اولا الجسم كلة
1 الحمام المغربى افضل ما استعملتة للجسم للتفتيح و بيخلى البشرة ما شاء الله صافية و جميلة و اكيد انتوا عارفينة من كتر ما انكتب فى المنتدى
و الخطوات هية
اعملى حمام مغربى مرتين فى الاسبوع مع التركيز على الاماكن الغامقة بس راعى انك ما تلهبيش بشرتك بالدعك جامد عشان السواد ما يزدش
بعد ما تخلصى الحمام المغربى ادهنى جسمك بخليط من بودرة اطفال +اى زيت اطفال
انا عن نفسى بستعمل كمية من بودرة تلك ريحتها حلوة اوى جونسون + زيت جونسون للاطفال
و بدهن جسمى كلة بعد الحمام المغربى و بقالى شهور بستعملها
عارفين جوزى لما بيمسك ايدى بيعمل اية دلوقتى بفضل الوصفة دية
كالتالى
يمسك ايدى انا و ايدة هو و يعمل المقارنة التالية

ناعمة اوى خشنة اوى
بيضا اوى سمرا اوى
ريحتها حلوة اوى زفت

طبعا فهمتوا من غير تفاصيل لدرجة انة عايز يجرب هوة كمان بس لا يمكن اخلية يجرب لانة كدة مش هيحس بالفرق هههههههه و الوصفة دية بستعملها على ايدى و كوعى كل ما اتوضى تدى ريحة ونعومة تحفة و بياض كمان

اما بالنسبة للشعر اللى بيكون تحت الجلد بردة الليفة المغربية هتطلعة فوق الجلد لما تشيل الطبقة الميتة من الجلد
و انا بستعمل الحجر الخفاف عرافينة بتاع الرجل بدعك برفق يقوم يطلع الشعر




للشعر

الوصفة اللى يستحيل استغنى عنها ابدا هية
عشبة الكثيرا مرتين فى الاسبوع و الله يا بنات روعة بجدد بتقل الشعرو تفردة و تنعمة بطريقة ما حصلتش و بتلاحظى الفرق فى النعومة من اول استخدام و فى التقل بعد اسبوعين من الاستخدام
و هية انك بتجيبى كمية صغيرة جدا اد الصباع من الكثيرا و تنقعيها 24 ساعة فى مية سخنة هتلاقيها نفشت و ملت الطبق اللى انت حاطاها فية تحطيها على شعرك كلى من الجذور للاطراف حوالى ارع سعات بس ما تخليهاش تنشف على شعرك ابدا اغسليها قبل ما تنشف

بالنسبة للوجة

اعملى حمام البخار و مع المية حطى عشبة البابونج و ادعيلى
و بعدمام البخار نظفى بقماشة قطن و اعملى اى ماسك مناسب لبشرتك
انا بشرتى دهنية و بطلع حبوب و رؤؤس سودا فبستعمل ماسك بذرة القطون رائع اكثر من رائع بس لازم حماما بخار معاة
و بعد كدة اغسلى وشك بمية ورد تكون محطوطة فى الفريزر
اعملى دة من مرة لمرتين فى الاسبوع

لليدين
شوية عصيرر لمون + شوية سكر و دلكى بيهم اديكى كويس اوى برفق لمدة كام دقيقة بس خلى بالك كمية السكر تكون اكبر من اللمون عشان السكر ما يدوبش و بعدين ادهنيهم اى كريم و حتى لو ما دهنتيش هتلاحظى النعومة
اعملى دة كل يوم قبل ما تنامى

للرجلين
اعمليلهم حمام مية دافى مرتين فى الاسبوع و ادهنيهم بفازلين و البسى شراب
هتصحى تلاقيهم زى رجلين الاطفال المواليد

للشفايف
ادهنيهم فازلين لمدة ربع ساعة و امسحية بفوطة خشنة و بعدين اغسلى شفايفك

للرموش و الحواجب ادهنيهم كل يوم قبل ما تنامى زيت خروع و بعد 3 ايام هتلاحظى الفرق فى طول رموشك و تقل حواجبك

دة كورس مكثف لو عملتية لمدة 3 اسابيع ان شاء الله هتبقى احلى عروسة و كل الوصفات دية جربتها شخصيا بعد فترة طويلة من التجارب الكثيرة يعنى دية عصارة مجهودى مش خصارة فيكو و الله يا بنات

و اى سؤال انا فى الخدمة و ادى زغروطة تانى ليكو لللولولولولولولوولولولولولوولوى

اية الحلاوة دية الله عليك يا أم مريم وزياد يارب يخلهملك وتفرحى بيهم كدة يارب
بجد مش عارفة اقولك اية مرسية بجد على الوصفات دية كلها بجد تحفة وان شاء الله حجربها كلها بس عايزة أسألك على كام حاجة كدة :-
عشبة الكثيرادية أجبها منين وشكلها أية يعنى بتباع عند العطار ولا فى سوبر ماركت ولا أية لما أشترى اية هي الكمية اللى أجبها؟ وهل بعد ماحطها على شعرى أشطفا بس ولا أستخدم شامبوا؟
الليفةالمغربيةدية اية زي الليف المصري العادى اللى مش طبي ولا أية وأجابها منين؟؟ والحمام المغربي هو الصابون بتاع أصالة اللى بيتباع في المحلات عادى ولا أية؟؟ وانا أسمع ان الحمام المغربي للجسم كله وانتى بتقولى للمناطق الغمقة بس يعنى مينفعش استخدمة على جسمى غير فى مناطق الكوع والركب ولا أية؟؟؟؟
أنا عارفة أنى زودتها بس هو سؤال كمان وخلاص أجيب ماسك بذرة القطون منين؟؟
أسألتى كتير معلش بس انا طمعانة في كرمك معلش بقى عروسة رزلة شوية مش كدة؟؟

في الحقيقة يجب على كل فتاة أن تتوكل على الله في كل شيء و أتمنى أن يكون الله قد استجاب إلى دعائكم

و شكراً

شكرااااااااااااااااا مووووووووووت ام مريم و زياد على الوصفات الجميله هقولوكو الأخبار أول بأول
ربنا يبارك فيكي و يسعدك ان شاء الله

اه من الفستان يادعاء متفكرنيش مش وقته خالص دلوقتي الله المستعان بس لو لقيت موديل حلو هبعتلك صورة ان شاء الله و لسه مش عارفه هفصلو ولا هأجرو لسه هسأل و أشوف ان شاء الله

كتبت بواسطة دعـاء

اية الحلاوة دية الله عليك يا أم مريم وزياد يارب يخلهملك وتفرحى بيهم كدة يارب
بجد مش عارفة اقولك اية مرسية بجد على الوصفات دية كلها بجد تحفة وان شاء الله حجربها كلها بس عايزة أسألك على كام حاجة كدة :-
عشبة الكثيرادية أجبها منين وشكلها أية يعنى بتباع عند العطار ولا فى سوبر ماركت ولا أية لما أشترى اية هي الكمية اللى أجبها؟ وهل بعد ماحطها على شعرى أشطفا بس ولا أستخدم شامبوا؟
الليفةالمغربيةدية اية زي الليف المصري العادى اللى مش طبي ولا أية وأجابها منين؟؟ والحمام المغربي هو الصابون بتاع أصالة اللى بيتباع في المحلات عادى ولا أية؟؟ وانا أسمع ان الحمام المغربي للجسم كله وانتى بتقولى للمناطق الغمقة بس يعنى مينفعش استخدمة على جسمى غير فى مناطق الكوع والركب ولا أية؟؟؟؟
أنا عارفة أنى زودتها بس هو سؤال كمان وخلاص أجيب ماسك بذرة القطون منين؟؟
أسألتى كتير معلش بس انا طمعانة في كرمك معلش بقى عروسة رزلة شوية مش كدة؟؟

ربنا يرزقك باذرية الصالحة يا رب و يتمملك على خير بصى حبيبتى
كل الوصفات اللى انا قلتها من عند العطار و رخيصة جدا يعنى مثلا
الكثيرا
1 اجيبها منين
من عند العطار بس يكون عطار كبير يعنى انا بجيبها من عند حراز او رجب العطار فى وسط البلد
و ليهم فروع فى كل حتة و تقولى عايزة كثيرة او كتيرة بالتاء


2 شكلها اية
بتبقى شفافة على ابيض و عاملة بالظبط زى الضوافر على كبير شوية و دية صورتها
بس انت لما بتجيبيها بتبقى مفتتة عن بعضها مش زى الصورة كتلة واحدة كدة



الكمية اللى تجبيها

تشترى بخمسة جنية بس هتكفيكى شهر

و طريقة استعمالها كالتالى

بتجيبى كمية من الكثيرا 9 قطع كل قطعة بحجم عقلة الاصبح لو شعرك طويل
و تنقعيها فى المية السخنة لمدة 24 ساعة يعنى مثلا كوب او كوب و ن ماء هتلاقيها بعد 24 ساعة نفشت و عملت زى الجيلى كدة و لما تيجى تستعمليها لو شعرك جاف اوى ممكن تضيفى عليها اى نوع من الزيوت اللى عندك او بيضة بس انا بستعملها من غير اى حاجة لان شعرى دهنى
و تدلكى بيها فروة راسك كويس اوى و شعرك كلة حتى الاطراف تغلفى بيها شعرك كلة و تغطية و تقعدى بيها من 4 ل 6 ساعات و بعد كدة تغسلى شعرك كويس بالشامبو و البلسم عادى

اما بالنسبة لليفة المغربية

هية بتبقى عبارة عن حاجة تتلبس فىالايد كدة ملمسها عامل زى السنفرة الناعمة بتاعة الخشب و دية بردة تجبيها من عند العطار
و لو ما لقتيهاش ممكن تستبدليها باى قماش عندك بس لازم يكون خشن
و دية صورتها
و على فكرة رخيصة جدا ب 12 جنية بس


دية نفس اللى انا بستعملها بالظبط حتى اللون



و دية صورتها بس جوة الكيس بتاعها مش عارفة باينة و لا لاء



و دة الصابون المغربى بيبقى عامل زى الشكولاتة السايحة كدة العلبة تقعد معاكى كتير







العلبة ب 24 جنية مصرى و برضة من عند عطار زى حراز او ا رجب العطار و الصابون و الليفة المغربية ممكن تلاقيهم كمان فى الصيدليات الكبيرة

و الحمام المغربى للجسم كلة بس انا بقول تركزى شوية على الاماكن الغامقة و طريقتة انى بدخل الحمام و اقفل كل الشبابيك التهوية و الشفاط عشان يتملى بخار
و تفتحى المية السخنة اوى بحيث تملى المكان بخار و تغسلى جسمك بمية سخنة
و بعدين تدهنى جسمك بالصابون و تدهنية زى الكريم كدة مسح يعنى
و تسبية على جسمك على اد ما تقدرى ربع ساعة مثلا و فى الربع ساعة دية عشان تستفيدى بالوقت اعملى حمام زيت لشعرك او تكونى حاطة الكثيرا و تنقعى رجلك و تدعكيها بالحجر الخفاف من تحت يعنى
و بعد كدة تشطفى جسمك كويس اوى من الصابون و تدعكى بقى بالليفة المغربية بس تكونى مش تحت الدش هتلاقى حاجات غريبة طالعة من جسمك حتى لو كنتى مستحمية امبارح
و بعد ما تخلصى حاولى تشطفى جسمك اخر شطفة بمية ورد ساقعة
و تدهنية بعد كدة بخلطة بودرة و زيت جونسون اللى مخلوطين على بعض و هتشوفى ريحتك و نعومة جسمك تهبل و ممكن تدهنى اى كريم جسم انت عايزاة


اما بالنسبة لبذرة القطونا و هية تعرف ايضا باسم لسان الحمل و دية صورتها


برضة من عند العطار و تجيبى بجنية بس او اتنين جنية هيقعد معاكى فترة طويلة
و هية بذرة عاملة زى السمسم كدة بس لونها غامق اوى بنى او موف غامق كدة معلش اصل انا عندى عمى الوان
و تجبيها و تطحنى منها معلقة و تحطى عليها حوالى 3 معالق مية و تسبيها نص ساعة كدة لغاية ما تعمل زى عجينة ينفع تفرديها على وشك و تحطيها على وشك بس زى ما قلتلك لازم بعد حمام البخار او على الاقل تكونى منضفاة كويس اوى
و تحطيها لغاية ما تنشف و بعدين تقشريها من على وشك لانها هتكون جمدت و عملت طبقة واحدة
و تشتطفى وشك بماية ساقعة او مية ورد ساقعة
وادهنى وشك بعد كدة بكريم انا بستعمل كريم جونسون للبشرة الدهنية

يا رب اكون افدتك يا قمر و لا يهمك تقلى زى ما انت عايزة و انا تحت امرك لغاية ما تروحوا بيت اجوازتكوا بالسلامة و نستريح منكوا و جوازكوا يشيلوا همكوا بقى كفاية علينا كدة اوى و لا اية
ربنا يسعدكوا يا رب و يهنيكوا و تعيشوا على طول فى سعادة
و ادعولى ربنا يخليلى زوجى و يدية الصحة و العافية يا رب الدعوة لية امانة يا بنات

ربنا يخليكى يارب و يخليلك جوزك ويدية الصحة وتفرحى بمريم وزياد يارب
بجد انا مش عارفة اقولك اية بجد مرسية اوى اوى اوى على زوقك وطيبتك وصبرك عليا بجد شجعتينى اوى ادتينى الوصفات ومنين اجيبها وزاى استخدمها ان شاء الله حعملهم كلهم وحقولك اية اللى حصل
ربنا يخليكى وجزاكى الله خيرا
بحبك فى الله

الله ينور يابنات


ربنا معاكوا


انا بجد مبسوطه قوي




ندى

السلام عليكم ورحمه الله وبركه

هو انا عندى نفس المشكله بس بنسبه للشعر انا سمعت عن وصفه حلوة هاتى الكوى مع زيت الزيتون واضربهم فى الخلط وحطى على شعرك لمده نصف ساعه مثلا واغسليه بصابون زيت الزتيون ويارب الوصفه تعمل نتجيه انشاء الله وادعلى ربنا يهدنيى ويهدى خطبيى اللى هيجننى دى

الف الف الف مبروك حبيبتي نورهان

شوفي حبيبتي انا عندي نفس المشكلة زواجي بشهر6

سويت لي جدول للعناية بالجسم والشعر

وكذالك رجيم

بالنسبة للجسم جبت الصابون المغربي وخلطت معة

زيت اللوز الحلو طبعا استخدمة كل يوم احطة على جسمي تقريبا

نص ساعة الى ساعة ثم ابدا بالتليف ماتتصورين كيف تغير جسمي

بعد الاستحمام استعمل كريم 21 الاورنج الصغير اخلط معه

ملعقة اكسجين حق الجروح ممتاز جدا ورح تلاحظي تغير من ثالث يوم

بالنسبة لشعر جسمي اشيلة واستعمل كريم ياخر نمو الشعر وفية عندي

وصة الحلاوة اللي تاخر نمو الشعر لكن للاسف ماضبطت معي اذا تبغينها

قوليلي

بالنسبة لشعري جبت 6 قشور موز وقطعتهم وحطيتهم بالخلاط

وحطيت عليهم فنجانين زيت زيتون وعلبة زيت النارجين الاخضر

واحطة كل يوم على شعري رح تلاحظي الفرق من اول استعمال

لمعان ونعومة

هذا اللي عندي حاليا اختي

اتمنى لك التوفيق ادعيلي