السلام عليكم ورحمة الله وبركاته

اخواتي انا شعري طويل بس خفيف وايد خصوصا عند مقدمة الرأس وباهت

ابغي نصيحتكم في احسن قصة تناسب شعري وتبينه اكثف مع الحفاظ على طوله ( لأن زوجي ما يرضى اني اقصه)

انا بسبب شعري احس ان نفسيتي تعبانه كلما اشوفه تتعب اكثر

انا فكرت اني احط فيه حنه ، واسوي فيه قصه جديدة او حركة حلوه من باب التجديد يعني New look
وكان خاطري اني اقص غره بس شعري ما يساعد

ارجوكم ساعدوني يا صاحبات الخبرةوانصحوني بالقصه اللي تناسبني
والله يجازيكم بكل خير

10 دخلوا ولا فيه وحده ردت؟؟؟؟؟؟؟؟؟؟؟؟؟

حبيبتي أحس أحلى شئ لشعر الخفيف تقصيه مدرج
يبين الشعر أنه كثيف واتمنى تلقي اللي يناسبك

اتوقع احلى شي المدرج هو اللي يكثف الشعر

والله يجملك في عين زوجج دايما................

أنا أقولج إبدي بالأول بمعالجه شعرج .. في محاليل وشامبوهات لإنبات الشعر روحي الصيدليه واطلبيها ... او جربي هذي الوصفه لإنبات الشعر ... وهيا :

الوصفه هي ببساطه,,, جرجير,ضعيها في الخلاط مع كوب ماء,
ثم ضعي عصير الجرجير على راسك و احرصي على ان يلامس
فروه راسك لان تاثيره يكون في انبات الشعر و تقويه البصيلات
الضعيفه بفضل ماده الكبريت,,,

اولا ستلاحظين ان تساقط الشعر يخف تدريجيا الى ان يصل الى اقل
من 20 شعره في اليوم,,, بعد فتره اطول ستلاحظين ان الفراغات
الموجوده في شعرك تختفي ,,,

بعد فتره اطول,,, ستلاحظين ان الشعيرات القصيره تشق طريقها
نابته من جديد لتسد الفراغات الموجوده و لتحصلى في غضون
5 اشهر (لنكن واقعيين ) على شعر كثيف .

واهتمي بأكلك كثري من أكل الجزر والجرجير ..والشوفان ..

واما عن مسأله قص الشعر...قصي من قدام غره علشان الصلعه الي من قدام ما تكبر ..لأن اذا كانت الغره طويله ومشطي شعرج وسحبتيه بقوه لورا .. راح تكبر الصلعه ... فضروري تقصي غره تكون غره مدرجه علشان تعطيج شكل غير وبنفس الوقت تساعد في العلاج .. ومن الخلف بس رتبي الاطراف وساويها قصي واحد انش او اقل .. لأني ما أبيج تدرجين شعرج كله من ورى المدرج يخرب الشعر خاصه شعرك خفيف راح ينهيه المدرج صدقيني .. نصيحتي درجي الغره بس ولله راح تحسين بتغيير ..

هذي بعض الصور للغرات المدرجه ..

ممكن تقصينه بهالطريقه المدرجه من نص الجبه لين الإذن .. هيا مدرجه الشعر كله مثل ما تشوفين بس انتي اكفي بالغره والخصلتين الأمامية الجانبية من شعرج يعني (الزلف )

هذي قصه الصينيات موضه هالعام .. الحين دارجه وايد حلوه أيضا وتعطي الوجه عرض وشكل طفولي حلو جدا.

هذي اخترتها لج وتعمدت اخليها كامله لأن شعرها ضعيف تقريبا وطويل وتشوفين مش مدرجه شعرها كله إلا الغره يعني من قدام ماخذه الغره و الشعر الجانبي الخصلتين الأومامية ومدرجتنهم .. وعلى فكره هالقصه راح تقدرين تسوين فيها تسريحات كثيييييره يعني أي حركه بتسوينها بشعرج بتطلع تسريحه أنا مره قصيتها وارتحت منها وايد .. وتحلي وتغير بعد ..

أي سؤال انا حاضر

الاخوات ما قصرن جزاهن الله خير


:

اشكركم خواتي جميعا على المشاركة ماقصرتوا وان شاء الله في ميزان حسناتكم

أختي شذا
مشكوره حبيبتي على النصيحة والصور مب عارفه اشلون اشكرك احس رديتي فيني الامل في شعري

بس بغيت اسألك عن كمية الجرجير اللي احطها في الخلاط؟

اشلون الطريقة بالتفصيل ، يعني احط الخلطة كل يوم ؟ بعد الاستحمام او قبله ؟
يعني بالتفصيل الممل ان امكن

بالنسبة للغرة انا من زمان كان خاطري اقصها بس مرة رحت اقص شعري وقلت للكوافيره قصي لي غره قالت لي انتي ما يصلح لج لأن شعرج وايد خفيف وقصته لي مقطع على طوله

بصراحة انا خايفة انه يطلع مو حلو
انتي اشرايج

في انتظارك يا الغاليه

السلا عليكم
اختي صاحبة المشكلة انا كنت مثلك وربما شعري كانت حالته اسوأ وجربت وصفات كثيرة منها الجرجير
لكن صدقيني اختي ما توقف التساقط الا بعد ان ذهبت للطبيب واعطاني العلاج لمدة طويلة الحمد لله شعري ما
عاد يتساقط ابدا وبدا في النمو من جديد الحمد لله وانا اعتقد ان حالتك احسن مني وسوف تستجيب اكثر لو ذهيت للطبيب ان شاء الله اسمع عنك كل خير

شوفي حبيبتي الوصفه جبتها من الموضوع الاصلي لها وهيا
http://www.lakii.com/vb/showthread.php?t=42658

ممكن تستخدمينها كل ثلاث إلى اربع ايام ... تسوين لشعرج مساج فيها بس مساج خفيف ولطيف ..

تاخذين رزمه أو شده جرجير مع كوب ماء ...

حلوه انا استخدمتها بس ما واضبت عليها كنت الاحظ تعطي شعري لمعه حلوه .. وسمعت من بنات وايد انها تنبت الشعر بطريقه مذهلة ..

أما عن الكوافيره ولله مادري حبيبتي أنا ما شفت شعرج انتي شو حاسه ترى مو مشرط هم يعرفون كل شي .. اذا حاسه عادي ممكن يطلع حلو قصيها بصراحه ضروري عشان الصلع .. أنا لما صار عندي التساقط أكثر منطقه تأثرت عندي الي قدام ورحت لصالون فيه ناس دارسه التجميل وفاهمه بعد ما عملت لي مساج لشعري قالت لي لازم غره عشان مانعطي فرصه للصلع يكبر ..

انتي صلي استخاره وقدمي شعرك لقدام وتخيلي تنقص وتصير غره شوفي راح يكون شكله كيف ؟..

أختي apple 15
مشكورة حبيبتي وايد على مشاركتج
بس انا عندي عقده من الاطباء ما اعرف ليش انا ما ارتاح للطبيب حتى اني لما امرض ما اروح إلا اذا تفاقم عندي المرض وبعد حنه ورنه من ابو العيال ههههه

وانا شعري اخترب وايد مع الحمل والرضاعة وللحين ما اعتدل

بس ما قلتي لي شنو كان سبب التساقط عندج وشنو كان العلاج ؟

ومشكورة وما قصرتي يا الغاليه


أختي شذا
من شفت ردج وانا كأني مجنونه هههههه
قاعدة قدام المنظره ( المرايه ) واودي شعري على جنب واسوي مثل الغره اللي في آخر صورة
وبصراحة انا ارتحت لشكل الغره في هذي الصورة واحس انه طلعت شعري احسن وما بينت الفراغات ( طبعا انا للحين ما قصيته بس سويت نفس الطريقة وتخيلت ان لي غرة)

ان شاء الله راح اصلي استخارة على هذي القصة والله يكتب اللي فيه الخير والصلاح

بس ممكن سؤال ( ادري اني زودته )
تعرفين اسامي الشامبوهات اللي تنبت الشعر الموجوده في الصيدليه ؟
لأني اخاف اخذ اي نوع وانا ما اعرف شنو احسن نوع

وشكرا على الرابط يا الغاليه