تعالي مالا الذهاب (كشتتس&خشتس)

**رمانة الخليج** · 21-06-2008, 10:44 AM

شعارنا لهذه الحلقه (العناية بالشعر )

باديء ذي بدء ماكنا ناويين ننزل الموضوع في هالوقت وهالزمان بس قلنا احسن عشان تعم الفائده لو بنَزله بالكافيه ماحيقرونه كثير او يمدونا بإضافاتهم!!
اجتمعنا انا محدثتكم ام شنب ومدموزيل قرقر وقررنا التالي
بعد ماأستخارت قرقر ست مرات قررنا انو نستجيب لرغباتكم سواء بالكافيه او الخاص او الموسابقه( وجه يناظر مهويه)

بشرط انكم ماتخلصون الأشياء من الأسواق رحمةً بقرقر لإنها جتها حاله نفسيه بسببكم كلش تخلصونه ماعاد تلقى شي تشتريه

بنات بليز نبيكم تتعاونون معنا
خلطات مانبي
نبي ادويه
نبي دكتور رحتي له ولقيتي نتيجه
نبي فايتمنز استخدمتيهم ونفعوك بعد الله

زي ما أدلينا حنا بدلونا نبيكم تساعدونا والموضوع حيكون حلقات انتم تقررون نوعها

هالفتره حنتكلم عن العنايه العلاجيه بالشعر والبشره

و بعدين حنحكي عن التجميل وطرقه

وبعدين عن اللبس

تابعوا حلقات الأخصائيات قرقر وام شنب

وابشروا بسعدكم بس شرطنا انكم تساعدونا
وبتصير السوالف سوالف بنات ونوسع صدور بعض زي مانفيد بعض

انا بتكلم عن الشعر

وبيكون تخصصي بهالحلقه الكشش وقرقر الخشش

**رمانة الخليج** · 21-06-2008, 10:45 AM

السالفه ياطويلات العمرانو انا عندي موشكله عويصه
شعري ناعم

<<<مهيب تقهر احد ابد
ومايطلع حلو من غير صبغه

يعني الصبغه تثقله وتعطيه شكل غير

بس لكل حاجه ضريبه

صار شعري يطيح بشكل مو طبيعي

على افتراض اني صار لي 10 سنوات بس اصبَغ فيه وبجميع انواع الصبغات يعني ماأريحه ابد
الراحه بالنسبه لشعري المسكين انو لونو يكون اسود او بني غامق وقت الشتاء

جلست مع نفسي

قلت يابنت استحي على وجهك قرعتك بدت تويق ع الناس وهذا مظهر غير حضاري ويجب علينا التصرف حياله

قمت استهدفته استهداف صار لي شهرين تقريبا
قلت انا اوريك ياأنا ياأنت
ياتتغطى القرعه ياتزداد انحلالاً وفسق

طبعا اول تصرف المفروض الواحد يعمله يروح دكتور اوب يروح منتديات

ولا يروح للكافيه يقول ابي خلطات
<<وجه يناضر برتني
اللي يبي الخلطات يروح منتدى الحريم

كل وحده مطيره خلطتها للسماء ولو شفتي شعرها تلاقينه خمس شعرات بالضبط ومربوطه بربطه ملونه
انا ماعندي خلطات

سامعين لالالالالالالالالالا للخلطات

شعرك طاح معناته فيه مشكله لازم تعرفين وشي!
ياضغوط نفسيه !!
يانقص حديد !!
ياأنك تاخذين ادويه تسبب تساقط!!
يعني وحده من صاحباتي عندها حساسيه بالأنف وبس تشتكي من شعرها

مؤخرا بعد مرور 3 سنوات قرت الروشته حقت الدواء ولقت من اعراضه انو يسبب تساقط الشعر بس بعد ايش بعد ماصار عدد شعرها ست شعرات اكثر من اللي بمنتدى الحريم بشعره

يادوره جديده للشعر!!
ياانك لسى والده !!
يامويتنا المعفنه!!
ياانك هالكته بسحب اللون والبيرم واللزي منو!!

اول شي عالجي نفسك..

رحت للدكتوره وحكيت لها عن مشكلتي!
شعري قاعد يطيح بشكل مهول يتحمم معي في البانيو

خطر يحط شامبو من زود الميانه بعد

ولاحظت كمان هالات صارت تطلع لي رغم انو ماكان فيني قبل

قالت اوكي اول شي التحليلات

سوت لي كذا تحليل على الدم..

طلعت النتيجه الدم عندي من 5 لــ 7
وهذا شي مره خطير ولازم ابر حديد
انا طبع ماأقدر عليها صرفت لي حبوب اتوقع الكل يعرفها اسمها

FERROUS

وصار عندي ارتفاع في هرمون الحليب وهذا يسبب تساقط في الشعر لإنو لخبطه بالهرمونات طبعا صرفت لي حبوب بس مره قويه بس قلت طالما انا مو متجوزه والحبوب قويه علي سببت لي صداع ودوخه وغثيان قلت وشو له خليني اعالج مشكلة الحديد واذا جاء المحروس عالجنا مشكلة هرمون الحليب..

انتهى عمل الدكتوره هنا!!

وصفت لي المشكله وعطتني العلاج المناسب لها

**رمانة الخليج** · 21-06-2008, 10:49 AM

اعتني ببشرتي بصوره دوريه وكذا وطلبت من السماري بديرما

يوصف لي فايتمن كويس للشعر ولا يسبب لي سمنه ولا فتح شهيه
وبالفعل صرف لي حبوب اسمها FORMULA HAIR

اخذتها من صيدلية الحبيب

وفيه نفسها في صيدلية العائله
<<<عشقها الصيدليات

حبيتها كثير وساعدتني على نمو شعري واظافري كمان

بس بشرتي ماأعرف لإنها بالأصل الحمد لله مافيها مشاكل..

طيب هنا خلصنا من الأشياء المقويه والعوامل المساعده !

جينا لشغل البيت بس اوب خلطات انتبهوا لا تتسطرون
<<نزلت موضوع وبدت تمون

اول حاجه يوميا آكل صحن جرجير احط عليه ليمون وملح وهــــ وهـــ ياناس ماألذه

شاهي ماأشرب قبل الأكل بساعه ونووص ولا بعده بساعه ونوووص
لازم جسمي يستفيد من الحديد اللي بأكلنا
آكل مره بالأسبوع كبده

احرص انو ماأشد شعري بقوه عشان ماأضعف بصيلاته
ماأهريه سشوار
ورغاوي وبلاوي
ماأبغاه يصير خلاخل والبلى من داخل
حتى لو شعرك كيرلي او كشه و مايحلى بعينك الا وهو مرتب فيكي ترتبينه بطرق غير كذا!

لميه بطريقه حلوه

البسي أطواق حلوه وارفعي شعرك بأشكال احلى
الحين الموضه بصالحنا كل العالم كشش وربطات وبف وحالات الله يكفينا شر هالشوشه بس

دائما اذا تحرصين انو شعرك يصير حلو استغلي الموضه

انا استغرب من اللي يعملون هايلايت الحين!
يعني مو موضه + انو فرصه تريحين شعرك استغليها حرام كذا والله مابنوصل للأربعين الا وحنا لابسين شيال منيخل عشان ماتبان صلعاتنا الآمعه..

شعرك مو مصبوغ ولا ناويه تصبغينه يختي اهريه حنا!

يقوي الشعر + يعطيه لون حلو + ينظف فروة الراس يعني حرام وحده شعرها مو مصبوغ ولاناويه تصبغه تضيع هالكنز من بين يدينها..

تحبين الحنا ومتعوده عليه بس صبغتي شعرك خلاص استخدمي السدر بديلا عنه ترى كل فوائد الحنا فيه بس انو من غير ريحه + انو مايغير لون الشعر

بعدين اصحاب الكشش ابفهم وشو له تقصون شعوركم وتتفننون فيها
<<<والله ماتتشمت
مره كنت بأرابيل وقاصه غره

وبجنبي وحده قالت من اللي قص لك قلت عبير
قالت ابي زيها

عاد انا ماأصبر ابد

قمت والتفت عليها قلت معليش سوري بس ابي اقول لك شي
هالقصه ماتناسبك
يبي لها تصفيف كل خمس دقايق لإنو الغره مررره قصيره ولو قصيتيها وانتي ماتعرفين تعملينها بتطلع كنها قرون استشعار وبالفعل سمعت نصيحتي

يعني الشعر لما ينقص لازم وواجب يبي له تسريح اربع وعشرين نيله
خلاص طوليه خلي حلاته بطوله

يعني لو فتحتيه طلعتي ميريام ولو لميتيه طلعتي عتاب

اوب مشكله بس تريحينه من انو يوميا يضطر يخضع لهالمعالجه الكيميائيه!
او اختاري قصة الشعر اللي تناسبه مو اللي تخربه!

طيب يوم رحتي لعرس وقالوا لك في الكافيه مشغل رخيص وماألذه روحي له لاتفوتينه !
تروحين له!
لا لإني بسطرك بمثل هالموقف
وشو شعرك هذا مو كل يوم يطول ولا كل يوم يزين !
اهتمي فيه شوفي وش المحل اللي تحسينهم يعاملون شعرك بلطف !

يحتوونه مو يسحبون فيه قايمين قاعدين..
مره رحت محل واشوف وحده قاعدين يعملون لها سشوار ويسحَبونه وثنتين عشان يكون اسرع ومعلين عليه اقوى شي بمعنى ادق قاعدين يحرقونه!

طب ليش !
والله اني اشوف الحراره تطلع منه!
انتبهي تروحين هالمحل مره ثانيه!

زمان لما كنت اعمل هايلايت مدحوا لي محل رحت له عملت لي الخصل وبعدين حطت المجفف عليها!!

عسى ماشر يالعمه
قالت انو عشان يطلع اللون بسرعه!!
قلت لا ابد خليه يطلع بسلامته متى ماحب بس لاتحرقينه لي بالسشوار!
يعني تخيلوا ماده كيميائيه بشعرك!
+
حراره قويه!
وش بتطلع هالأسلاك اللي فوق راسك

**رمانة الخليج** · 21-06-2008, 10:52 AM

بنات كل وحده تمسك شعره وحده من راسها بيدها وتشوف قد ايش هي نحيفه
قد ايش هي ضئيله
قد ايش هي مسكيــــنــه
ولا يمكن تتحمل كل هالأعباء اللي ترهقونها فيها
يعني ماحتأكلونها الأكل الزين اللي يوصلها عن طريق جسمكم

ولا تشربونها الزيوت اللي المفروض تساعدها عشان تنمو

وكل ماجت عزيمه لعنتوا خيرها تبونها تطلع حلوه
والله لو انا منها لأعند واقهركم ولاأزين

لا وحتى احيانا اذا صارت فيها نفسيه اهون عليها تقطع نفسها وتنتحر ولاتضيف لكم ولأشكالكم شي

لاتقعدون تطالعون شعور الممثلات والعارضات
ترى غالبيتهم اكستنشن
(الله يغنينا بحلاله عن حرامه )

زمان كنا نحب شعورنا ونحسها حلوه وكثيره
من تالي الكل بجد الكل يشتكي من شعره !

وش السالفه!
بعض الناس اللي لاعبه المؤامره بروسهم يقولون امريكا هي السبب حاطه بمويتنا شي الناس الثانين اللي مايبون يحطون بذمتهم شي يقولون الكفار مستهدفينا

السعوديات طبعا اول وأهم الأشياء بالنسبه لهم والسبب الرئيسي لكل
المعضلات اللي تواجهم بحياتهم ( العين)

تهلك شعرها صبغات وهو ساكت

ويوم طاح قالت بنت الجيران نضلتني تقول صبغتك حلوه!
طيب لو سكتت وماقالت صبغتك حلوه

وش بتقولين لأختك اذا طلعت اكيد غايره
وقسم اننا نوسع الصدر

انتوا شفتوا شعر نانسي في انت ايه يومها تصيح بالحمام بسمننا علينا

انتوا شفتوا نوال في آخر فيديو كليب وهي بالأحمر كيف شعرها شوي

شفتوا اليسا مره بحياتها عامله ليس!

دايما ويفي ليه!!

عشان شعرها بكل بساطه حبيتين

هيفاء قد شفتوها مقصقصه شعرها ولا مسويه فراوله واناناسه وسلة الفواكه اللي طالعين فيها هالسنين !
لا طبعا رحم الله امريء عرف قدر نفسه شعرك شوي لاتعبثين فيه!

ميريام اوم كشه انتوا شفتوا كشتها في برنامج الشقه او في العراب

قاصره وقاله وطالعه اورنجيه

هين هذي خوذوها مني ناضلتها سعوديه

بعدين معلومه بسيطه:
أي وحده شعرها كيرلي لما تسشور حيكون شكله كثير!

لإنو يعطي كثافه..

وأي وحده شعرها ناعم وتعمل له سشوار غير مدروس بيطلع حبتين اقل من صديقتي ومن حقة منتدى الحريم

خلاص شعرك وصار عله بين يدينك لازم تعرفين تتصرفين!
شوي !
عالجيه !

سوي له يوميا مساج وهذا اهم شي!

كثرة الدايت تهر الشعر هر..

اوكي حابه تحافضين على جسمك هل تتوقعين انو المساج او الزيوت او الماسكات بتسمنك!!
هل تتوقعين انك قاعده بغرفتك وبتصحين تلاقين شعرك فجأه صار كثير وطويل!
لازم نتعب عشان نحصل على الشيء اللي نبيه..
مافيه شي يجي بالساهل..

**رمانة الخليج** · 21-06-2008, 10:54 AM

شهرين اهتم بشعري بس قبل يومين وانا اصلحه لقيت شعرات كثيرات صغيرونات قولوا ماشاء الله على غصن بان مر قولوا ماشاء الله
<<<طقاقه لو
لما ادخل يدي بشعري اول ما فيه شي يردها

خطر اوصل لرموشي من الفراغ

الحين الحمد لله تلاقي مضايقه شوي..

من الأشياء اللي عملتها وكثير كثير استفدت منها انو اعمل مساج كل فتره

ولا اشيل زيتي دابر املا لإنو شعري مصبوغ ولا ابيه يفتح لونه

آخذ زيتي واروح صالون جنبنا اخليهم يعملون لي مساج لمدة نوووص ساعه فيه

بنات اول لما افتح شعري تعورني جذوره!
لما اجلس يوم ماأتحمم اصيح من ألمه !!
الحين الحمد لله راحت هالمشكله من عندي بفضل الله ثم المساج

كمان استخدم تونيك للشعر هذا اللي كنت بقول لكم عنه بالكافيه مررررررره حلو اتعب وانا اقول حلو اسمو SORCIERE تلاقينه بكل الصيدليات
هو بالثوم تونيك للشعر تستخدمينه بعد الحمام هو يوميا المفروض بس انا استخدمه بعد الحمام بس والله لو فيه رزقي ماغسلت شعري كل يوم والله لو اني سمكه الله لايبلانا

تحطينه بس على الجذور وتحسينه يحرقك نفس الثوم بالضبط بس مافيه ريحه وطبعا تاخذينه من الصيدليه وهو مقوي للشعر وفروة الراس..

سعره يمكن بــ 120 والمفروض تشترين معاه الشامبو حقه بس انا ماأشتريته..

برضو لما اكون رايقه الط زيت بس بجذور شعري قبل الحمام واعمل له مساج مره يريحني + حسيت بفوايده ع الشعر الخطيره..

بنات ماأقدر أقول انو شعري الحين مرررره كثير

ولا اقدر اقول انو تغير مررررره

كل هالأشياء انتي تبدين تشوفين مقدمات لها بس ماتبين الا بعد فترة سته شهور الى سنه!

يعني شعر وطلع هل تتخيلين انو على طول بيقولون الناس يوووووووووووه شعرك صار كثير!
نو وي لازم تطول هالشعرات اللي طلعت عشان تبدين تحسين بأنو شعرك صار كثيف عن اول!

مافيه شي اسمو سحر!
عنايه واهتمام لازم تبذلينهم عشان تحصلين على اللي تبينه مو بين يوم وليله!!
طول عمرنا واحنا نهريه صبغات جاء الوقت اللي المفروض نهتم فيه ونتحمل عقبات تصرفاتنا

دكاتره كويسين:
ولاحظت تغيرات كثيره على البنات بعد ماراحوا لهم..

ابو بكر يوسف في التحليه <<<علاجي..

والعجلان في ميدكا <<<علاجي..

وحده من البنات كان فيها بدايات صلع وبعد الله ثم هو انقذ شعرها..

ملاحظه اخيره..
اية اهتمام سواءً بشعرك ولا ببشرتك ثقي انه ماحيروح هدر ..

اية نوع من الإهتمام حتلاقين له نتيجه سواءً وقتيه ولا دائمه!

جمال الشعر..
بلونه + لمعته + كثرته + قصته+ واهم شي طريقة تصفيفه

كان الله في عونكن ياراعاكن الله

وترقبونا في حلقات مختلفه قادمه وجديده

مدموزيل قرقر دوتس المايك