طريقة عمل الطقية المصرية للشعر

**bocky ant** · 09-08-2007, 05:25 PM

السلام عليكم
ازيكم؟ عاملين ايه ؟ اتمنى تكونو كلكم بخير يا رب
انا جايبالكم موضوع جديد و لاكنه معروف جدا في مصر
ماما قالتلي طريقة كانت بتعملها زمان هي و اخواتها بدل السيشوار و الحاجات المضرة للشعر
وهي اسمها الطقية بتعمليها قبل النوم بخمس ساعات و تقلبيها على الجانب التاني قبل النوم مباشرة و لما تصحي هتلاقي شعرك زي السيشوار
فائدة الطقية:
تنشط الدورة الدموية في الراس و ده بيخلي الشعر يطول و انتي هتحسي بسخونة في شعرك و ان فعلا الدم بيوصل للشعر
تعالج التقصف بكثرة الاستخدام
و كثرة استخدامها تكثف الشعر و تجعله ناعم
ما تحتاجينه لعمل الطقية:
مراية كبيرة
مشط خشب واسع لتسليك الشعر
مشط خشب ضيق جدا يستخدم بعد التسليك
بنس شعر
كريم مغذي لا يشطف او كريم منعم استخدمي اللي يعجبك و يريح شعرك
ايشارب قطن 100%
الطريقة:
غسل الشعر و تنشيفه بمنشفة الشعر(الفوطة)
اقلبي شعرك للامام مع وضعية تجعل شعرك لا يرجع للخلف اي مثل وضعية الركوع
ضعي كريم الشعر
سلكي شعرك حتى يكون سهل التسريح
و استخدمي بعد ذلك المشط الخشب لعمل الاتي:
مشطي الشعر من الخلف للامام كله و بعد ذلك ضعي بنسيتين جنب بعض في وسط الشعر
مشطي الشعر اللي بالجانب الايمن و هاتيه على الجانب الايسر و ثبتيه ببنسة شعر و كملي تمشيط الجانب الايمن اللي ثبتيه مشطي بقيته مع الجزء الايسر و اجعلي اتجاهك كله للجانب الايسر و لفيه على الراس بشكل دائري مع التثبيت بالبنس و يجب مراعاة انك تجعلي شعرك في النهاية بعد كل ذلك غير متشابك و شكله متناسق و مفيش شعر واقف من اي جنب
ضعي الايشارب القطن و اربطيه مع مراعاة ان شعرك كله يكون متغطي
بعد خمس ساعات اي قبل النوم مباشرة فكي الايشارب و اخلعي البنس و لا ترجعي راسك للوراء اي يكون شعرك كله للامام و اعملي الجانب الايسر بحيث يكون كل اتجاه الشعر( ماعادا اللي في الوسط )تجاه اليمين و ثبتي الشعر بالبنس و ضعي الايشارب القطن و يكون الشعر كله متغطي و اربيطيه و نامي
و الصبح فكي الايشارب و البنس و سرحي الشعر جزء جزء ليسها تسريحه من من الامام للوراء و شوفي شكل شعرك جميل ازاي و لو هايش شوية ممكن تحطي لمسات كريم عليه عشان ميكنش هايش
بس هيروح النعومة لو جبتي عليه مياه يعني لو غسلتيه هيروح كل دهبس هتلاقيه طري

انا بعمله على طول و شعري اتحسن الحمد لله عن الاول
بس متخفيش في الاول هتلاقيها صعبة و مش مظبوطة لاكن مرة بعد مرة هتتظبط معاكي

اللي يجربها و تعجبه يقولي عايزة ردودكوا بس لازم متكونوش متعصبين على شعري و متشدوهوش عشان ميوجعكوش

عايزة ردودكم و رايكم ردو عليا اول ما تجربوها هي سهلة جدا بس شرحها صعب جدا

مستنية رودودكم و متخفوش دي عن تجربة اجيال و انا منهم

**ام جنان2** · 09-08-2007, 05:55 PM

يسلمو على الفكرةالجميله والسهله

**زنزانة الحب** · 09-08-2007, 05:58 PM

مشكورة اختي على بوكي

على العملية هذي وانا كنت حابة اعرفها من زمان بس ما كنت اعرف كيف اعملها

وانتي دلوقتي ساعدتيني تسلمي حبيبتي

الله يخليكي يا رب

**سيلفر** · 09-08-2007, 06:02 PM

شكرا ليكى
انا ماما بتعملها ليا
وهيا بتعملها
بس عايزة اسالك سوال انتى منين
علشان انا عارفه ان اسمها دوامه

**ميمو توتا** · 09-08-2007, 06:18 PM

اهلا يا بنات اه هى فعلا اسمها دوامه بس فى اسكندريه
لكن فى القاهره والمحافظات الاخرى فى مصر بنقول عليها طقيه
بس حبيبتى عايزه اسألك هى مش بتوجع الشعر لانى عملتها قبل كده كام مره كده وحسيت بعد ما قلبتها ان شعرى واجعنى جداااااا وخفت لحسن تعملى تساقط ولا تنحل شعرى من قدام مع انى معترفه انها بتنعم الشعر جداااااااا وبتفرده فعلا

**ايمى** · 09-08-2007, 06:31 PM

الف شكر على الموضوع انا بردة استغربت لانى اقول عليها دوامة
انا بقى مبعملش غيرها اصلا وكنت مفكرة انها حاجة عادية بتعملها كل البنات

**سيلفر** · 11-08-2007, 09:10 PM

حبيبتى هيا بتوجعك علشان شعرك مش متعود انك تغيرى التسريحه بتعته
بتعملى تسريحه معينه ومش بتغيريها
اما با النسبه انه هيا تنحل الشعر لما تتعمل كتير
وده كلام ماما واحده صحبتى
فكانت بتقول نعملها مرة او مرتين فى الشهر علشان الشعر مينحلش

**هدي محمد محمود** · 12-08-2007, 01:11 AM

مشكورة بس كنت عايزة اوضح حاجة مهمة جدا ان الطقية غلط لانها بتشد الشعراية عشان تفردها وكده بتتسبب في تساقطها ودي بقي كتير اعرفهم عانوا من الموضوع ده وسبب الوجع طبعا عدم تغير تسريحة شعرك بالاضافة الي شده ووقوعه وربنا يستر تحياتي وقبلاتي للجميع

**omneya1** · 12-08-2007, 01:44 AM

ايوة فعلا انا كنت بعملها مرتين او تلاته فى الاسبوع بعد كل حمام بس نحلت الشعر من قدام ومن الجناب فياريت ماتعملوهاش غير مرة او اتنين فى الشهر لكن بجد هى بتخلى الشعر حرير ومبقتش اعملها غير للضرورة