انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.


للبحث في شبكة لكِ النسائية:
عرض النتائج 1 الى 7 من 7

الموضوع: نصائح خبراء التجميل للمحجبات (نصائح في كل حاجة)

  1. #1
    تاريخ التسجيل
    May 2008
    الموقع
    مصر- اسكندرية
    الردود
    1,436
    الجنس
    أنثى

    نصائح خبراء التجميل للمحجبات (نصائح في كل حاجة)

    أغلب البنات النهارده محجبات وأصبح اهتمامهم بالحجاب يوازي أو يفوق اهتمامهم بشعرهم، وأصبح البديل للكوافير والبحث عن قصة جديدة أو لون مختلف هو لف الطرحة بألوان زاهية على آخر موضة.. أشكال ربطات على هيئة تسريحة شعر "ضفيرة وكحكة"، وأما الأقمشة (دي فيها كلام كتير) "تل" و"شيفون" "وترتر"، الصبح والضهر وفي كل وقت...

    المعادلة الصعبة في كل الحاجات دي ازاي أكون محجبة أحترم "حجابي" وفي نفس الوقت شكلي حلو "ستايل" على الموضة ومش "مبهرج" ولافت للنظر لدرجة تثير انتقاد الآخرين..



    ألوان الموضة في الإيشاربات لشتاء 2008

    لون الطرحة حسب لون اللبس ولكن اللون البني هو الأساس السنة دي وبيدخل معاه البرتقالي, التركواز, الروز, الزيتي بدرجاته, البني لوحده, البني المحروق مع البني العادي موضة جداً واستخدام الألوان الجديدة وتداخلها بيعطي نتيجة حلوه جداً..



    هل البني المحروق ممكن "يغمق" البشرة وخاصة إن لوننا خمري أحياناً مائل للاسمرار؟

    لا أبداً البني جميل جداً مع كل ألوان البشرة، على فكرة أنا عندي مبدأ إن كل الألوان تليق على البشرة السمراء أو البيضاء بنفس الدرجة، حكاية إن الروز والموف لا تصلح للبشرة السمراء أو الخمرية أو إنه "بيسمر جداً" ده كلام مش صحيح، النهارده مافيش لون صريح.. الروز له درجات مختلفة وموجودة في كل أنواع المكياج، كمان الموف, والأخضر.. المهم اختيار الدرجة من اللون القريبة من درجة لون البشرة وأكيد هتكون مناسبة ولا تعطي نتيجة عكسية.



    لو واحدة لونها يميل للسمار أي درجة من درجات اللون الغامق مناسبة للون سمارها؟

    من خبرتي ممكن أطمن العروسة السمراء وأقول لها لا تقلقي من اللون الموف في الخطوبة.. الآن ظهرت درجات جميلة من المكياج تناسب العروسة السمراء وتخليها حلوة وكمان لا "تغمق من لونها أبداً" اختاري اللون اللي يعجبك.. الأخضر, الأحمر، لأن المكياج النهارده أصبحت ألوانه صريحة جداً ومتنوعة المهم تختاري ماكييرة شاطرة تستخدم الألوان صح مع لون بشرتك.



    ازاي تختاري خامة أو قماش الإيشارب صح؟

    نوع القماش أو خامة الإيشارب تعتمد على نوع اللبس، كمان فيه أنواع من الأقمشة من المفضل نتجنبها حتى لو عجبك لونها أو تطريزها أو نقشتها.. من الأقمشة المزعجة في لبس الحجاب "الأوراجنزا الهايشة".. ابعدي عن الأقمشة "الناشفة" لأنها صعبة في الربط، خلي عنيكِِ على نوعية الأقمشة الناعمة والأقطان، الحرير، الحرير على قطن، الشيفونات بأنواعها كلها خامات حلوة جداً ومناسبة وعملية والتل كمان... بأكد إن الإيشارب مهم إنه يكون عملي في اللف، ممكن الإيشارب يكون غالي ووحش في ربطته وبعد شوية هتكرهي الإيشارب وهتركنيه على جنب بعد ما غرمتي ثمنه.



    نوعية القماش المناسبة والعملية للبنت في الجامعة عشان يكون حجابها مريح وفي نفس الوقت شكلها مش مبهدل؟

    تختار الأقطان والشيفونات المطفية "بدون لمعة".. الأقمشة دي بتستحمل جداً الحركة طول النهار، فالأقطان فيها ألوان كثيرة وأشكالها حلوة جداً، والقطن على حرير فيه تطريز خفيف حلو كمان وموضة جداً يكون في طرف الإيشارب تطريز أو ترتر بس المهم يكون "Simple" جداً.. عشان الجامعة ممكن تختار الإيشاربات الأقطان المخططة أو المنقوشة، فيه مساحة تنوع النهارده وألوان ينفع تدخل مع بعض تدي شكل جديد في كل مرة.

    مساحة التطريز المقبولة في الصبح وخاصة إنها موضة جداً، وأغلب الإيشاربات فيها تطريز بأشكال مختلفة؟

    مافيش حاجة محددة... فيه حاجات مطرزة لكن ممكن تناسب الصبح ونصيحتي لو الإيشارب فيه تطريز خلي هدومك "Simple" جداً على قد ما تقدري.



    بنشوف بنات بتلبس إيشاربات تل أسود وتحتها ألوان صارخة، وأحياناً شيفونات بتلمع.. رأيك إيه؟
    بصراحة البنت المحجبة اللافتة للنظر في رأيي منتقدة في عيون الجميع، أنا لا أعترض على لبس التل والشيفون الصبح أو في الجامعة بس يكون ألوانها هادية، والشيفون بدون لمعة إلا إذا كانت فيه مناسبة بالنهار.



    أفكار لحجاب ممكن يناسب لفترة بعد الظهر أو بالليل؟ممكن تحتفظي بشكل ربطتك اللي بترتاحي معاها والمناسبة لشكل واستدارة الوجه وتستخدمي إكسسوار مختلف.. حلق كبير، سلسلة فيها دلاية فيها حجر فيروزي، خاتم فضي بفص ملون.. النهارده مافيش لبس محدد للنهار وآخر لليل، مساحة الحركة تكون إضافة حاجة جديدة للبسك حسب وقت الخروج وطبعاً المناسب للمكان.



    ازاي البنت المحجبة تختار الربطة المناسبة لشكلها؟

    لازم تعرف هي بتحب إيه، الربطة التقليدية أو الربطة "الاسبانش" المربوطة "على ورا" عشان تكون مرتاحة ومقتنعة بربطة الإيشارب، ولو هي محجبة جديد ماتستعجلش على نفسها "شوية..... شوية" مش معقول هتقدر تلف الإيشارب زي واحدة متحجبة من زمان.. البنات بتكتئب وبتزعل قوي عشان شكل حجابها مش "مظبوط" عشان كده لازم المحجبة جديد تلبس في الأول حجاب ربطته سهلة ولا تستخدم أنواع ناعمة جداً ممكن تتزحلق بسرعة وتظهر شعرها، ممكن تستخدم الأقطان في البداية لأنها بتثبت، وعشان تلم شعرها كويس جداً تلبس "بونيه" قطن ولا تظهره، ومهمته مساعدتها في تثبيت الإيشارب ويمسك الشعر كله وتختار ربطة سهلة.




    الربطة "الإسبانيش" موضة جداً، ازاي نربطها "صح" خطوة خطوة....؟

    أولاً نلبس بونيه قطن يلم الشعر كويس وبعد كده نجيب طرحة مستطيلة لون تاني، فلو إن البونيه بني محروق تكون الطرحة تركواز تبين جزء من البونيه ونحط الطرحة الثانية بمحاذاة خط البونيه ونربطها على ورا كويس جداً وممكن نجيب طرحة تانية شيفون مثلاً وتكون لونها بني محروق ونربطها فوق التركواز، بعد كده نبين جزء منها زي ما عملنا في الخطوة السابقة ونربط كويس جداً، بعد كده نبدأ في ربط أطراف الطرحتين البني والتركواز بحيث ممكن نربط طرف الأولى مع الثانية والعكس، وإنتِ قدام المرايا هتلاقي نفسك بتربطي الأطراف، وممكن تبتكري تعملي الأطراف "كحكة" أو تعملي بطرف "كحكة" وتسيبي الطرفين نازلين على كتفك على حسب ذوق وشكل وجهك.



    نصيحتك للف الطرح التقليدية؟
    لازم تلبسي بونيه قطن وتحطي الإيشارب على حرف البونيه عشان يختفي وتمسكي الطرف القصير بدبوس مشبك بالطرف الكبير وتلفي الطرف الطويل حول الرأس وتثبتي بالدبابيس، وبلاش أكتر من إيشارب في الأول.. كفاية لفة بسيطة.



    ولو عاوزة تدخل ألوان في اللفة التقليدية؟
    زي ما قلنا البونيه وبعد كده الإيشارب على حرف البونيه وبعدها تمسك الطرف القصير بالطرف الطويل عند الرقبة، وبعد كده الإيشارب الثاني بعده بمسافة من الأول وتمسك أطرافه وتلف طرف الأولى وطرف الثانية في اتجاه واحد بشرط طرف يظهر لونه قبل الثاني، أو تحط الطرفين فوق بعض وتلفهم مرة واحدة وتحط دبابيس للتثبيت.



    ممكن تلبس "بندانا" وتلف الطرحة، ونصيحتي بلاش وضع شريط بلاستيك في مقدمة الطرحة.. ممكن تستخدمي "اسبراي نشا مخصوص للمكوى"، عشان تنشي الطرحة.



    إيه رأيك في إضافة الضفيرة من قماش وعمل "الكحكة" بالربطة "الإسبانيش"؟
    بصراحة لا أفضل الإضافات الكثيرة للحجاب طالما اخترتِ الحجاب عن قناعة لازم تكوني محتشمة وبسيطة في نفس الوقت... لازم تتعاملي مع الحجاب وكأنه شعرك وتحبيه عشان شكلك يكون حلو فيه ولما توصلي للدرجة دي أكيد هتبتكري في الربطات أكثر.



    مش معنى الحجاب "أي طرحة وخلاص" ونهمل في شكلنا، بالعكس لازم تهتمي أكثر.. كنتِ زمان بتهتمي بشعرك وبتروحي للكوافير وبتهتمي بكل خصلة في شعرك، اعتبري الحجاب شعرك وامنحيه نفس الحب والاهتمام، فالحجاب لا يعني "البهدلة".









    باعتبارك "ستايلست" وخبيرة في وضع مكياج للمحجبات، ازاي أحقق المعادلة.... أحط مكياج يخفي الإرهاق والشحوب وأحتفظ بوقار "الحجاب" وأتجنب لفت الأنظار؟

    أتعجب من كميات البودرة وكريم الأساس اللي بتحطها البنت المحجبة وغير المحجبة بالنهار.. ماينفعش أداري عيوب في الوجه بوضع طبقات من المكياج.. لو لونك شاحب أو عندك هالات سوداء تحت عينيك اهتمي بنوعية أكلك، قللي من النشويات وكتري من الفاكهة والخضروات، "الشوام" بشرتهم حلوة عشان كمية الخضار كبيرة في وجباتهم، كمان بيهتموا بزيت الزيتون.. احنا بناكل أي حاجة "المحمر، والمكرونة... أي حاجة" وده غلط بدل ما تدور ازاي نتقل المكياج لازم نعيش وناكل صح.. جربي شرب المية بكميات يومياً هتلاقي بشرتك اتحسنت كثير جداً، واسألي نفسك "أنا باعمل إيه غلط في نظام حياتي اليومي"....!!

    كمان ليه مابنحبش لون بشرتنا، البنت السمرا تحط بودرة فاتحة بكميات كبيرة وطبقات كريم أساس عشان تفتح لونها... ليه..؟!! ربنا أنعم علينا بلون حلو احنا مش بيض قوي أو سمر خالص، البشرة الخمرية جميلة جداً.



    كل بنت عاوزة تحط لمسات تضفي على وجهها نضارة وهى في الشغل أو في الجامعة، تعمل إيه من وجهة نظرك؟

    ممكن تستعمل كريم حماية للشمس وتكتفي بكريم حول العين فقط وقلم كحل وماسكرا و"Blusher" خفيف و"Lip gloss" فاتح.. ولو شكلها مرهق ممكن تستخدم بودرة شفافة أو بودرة لون بشرتها، وعلى فكرة لازم تجربي البودرة على خدك لأن الإيد خادعة جداً في تجريب درجات الألوان في المكياج، ممكن تحط "cover stick" خفيف حول العين وبلاش طبقات، وطبعاً البودرة الشفافة وكحل في العين أسود أو بني وبلاش ألوان، وال"Blusher" إما روز أو بيج الألوان الطبيعية.... هي دي اللمسة البسيطة جداً.



    تذكري دايماً إن المكياج مواد كيماوية وكتره يؤذي البشرة على المدى البعيد، ومن تجربة خاصة للحفاظ على البشرة ونضارتها استخدمي زيت الزيتون على الوجه وحول العين هتلاقي نتيجة هائلة... وعلى فكرة أنا مش ضد إن البنت تحط مكياج ولكن بالمعقول.



    أحيانا تضطر المحجبة لخلع الحجاب عند الزفاف أو الخطوبة خوفاً من أن تكون وحشة أو أقل جمالاً من أقرانها؟ نصيحتك إيه؟

    بصراحة باشعر إن البنت اللي بتخلع الحجاب بيكون شكلها وحش وهي من غير حجاب يوم الفرح... وليه أصلاً تخلعه؟ الآن فيه ربطات جميلة ومبتكرة وحلوة جداً للعرايس، وكمان الزهور المعمولة مخصوص بالأبيض والروز من الأوراجنزا وتزين بها الطرحة بتضيف جمال للعروسة المحجبة.. من خلال شغلي باحاول إني أبتكر وأجدد في الربطات والإكسسوارات عشان العروسة المحجبة تحب شكلها... وسؤال لكل بنت "تحبي تبدئي حياتك بمعصية؟"... ليه؟! طرحة المحجبة النهارده بيدخل فيها ألوان جميلة جداً، والتل ممكن يكون من تحته روز, تركواز, ذهبي عشان نكسر حدة الأبيض الكامل، وبتعوض غياب تسريحة الشعر أو الفورمة.



    نصيحتك للعروسة المحجبة؟
    تبحث عن لون مناسب لبشرتها يبرز جمال لونها تفكر في موديل مناسب لجسمها وتفكر ازاي يكون شكلها مختلف وجديد، ومش شرط إن موديل أو ربطة عجبتك إنها ممكن تنفع معاك أو تليق عليك، وكمان تختار حد يساعدها في ربط الطرحة لأنه متخصص وبيتحكم أكثر في الربط وله خبرة في ابتكار ربطات جديدة.



    نرجع للبنت المحجبة في الجامعة ازاي تشتري إيشاربات تتناسب مع ميزانيتها؟

    لازم يكون عندها الألوان الأساسية السادة، الأسود، الأبيض، بني، سماوي، كحلي عشان تمشي على الجينز.. مش شرط تكون الإيشاربات غالية، المهم لونها ينفع مع هدومي، وبالألوان تدخلي وتشكلي ألوان، ويظهر شكلك جديد في كل مرة.

    ممكن تغيري في ألوان البونيه وتظهري طرفه ومن فوقه الإيشارب الأساسي دي حاجة عملية جداً ومناسبة لمصروفك، المهم اعرفي ألوان هدومك محتاجة إيه، وعلى فكرة الأقطان المصرية حلوة وأسعارها حلوة جداً.



    الإكسسوار المناسب لبنات الجامعة المحجبات؟
    الفضة مناسبة جداً لأن الإكسسوار العادي أصبح غالي جداً، الحلق التارة الفضي مش غالي وبيليق مع كل الوجوه وينفع المحجبة والرابطة "الإسبانيش" جداً.. ممكن الحلق يكون فضة وعلى شكل عناقيد وفيه فصوص فيروز وتلبس خاتم له نفس الفص، أو بلاش حلق وتلبس دلاية.. حاجات بسيطة ولكن المحجبة لازم تختار إكسسوار حجمه كبير شوية عشان يظهر شكله.



    رأيك إن الرابطة "الإسبانيش" هتستمر شوية؟
    أعتقد إنها هتكون خط عام بعد كده لأنها "عملية" وبتسمح للمحجبة أن تظهر جمال ملابسها لو كانت لابسة جاكت أو بدلة، وطالما الرقبة متغطية خلاص وبتسمح كمان باستخدام الإكسسوار.



    سلبيات بتقع فيها المحجبة؟
    لازم المحجبة تهتم بنفسها وفي نفس الوقت تحترم حجابها، البسي على الموضة زي ما إنتِ عايزة، ولكن راعي الحشمة، فالبنات النهادره بيلبسوا جينزات ضيقة جداً ولوويست وعلى رأسهم "إيشاربات".. حاجة متناقضة جداً!! ومش معنى كده كمان إنها تكون مبهدلة..!!

  2. #2
    تاريخ التسجيل
    Oct 2007
    الموقع
    فى قلب احمد حبيبى وزوجى وعمرى وحياتى كلها
    الردود
    2,869
    الجنس
    امرأة
    مرسىىىىىىىىى بجد على الموضوع الذى افادنى شخصيا

  3. #3
    تاريخ التسجيل
    May 2007
    الردود
    133
    الجنس
    ذكر
    فعلا معلومات مفيده ونصائح قيمه جدا
    تسلم ايدك

  4. #4
    تاريخ التسجيل
    Sep 2005
    الموقع
    اسكندرية
    الردود
    328
    الجنس
    أنثى

    السلام عليكم

    شكرا يااختى على الافادة وجزاكى اللة خيرا

  5. #5
    تاريخ التسجيل
    May 2008
    الموقع
    مصر ام الدنيا وقلبها
    الردود
    205
    الجنس
    أنثى
    موضووووووووووووع جميل اوى
    ومهم لكل المحجبات
    شكرا
    وربنا يوفقك

  6. #6
    تاريخ التسجيل
    May 2008
    الموقع
    مصر- اسكندرية
    الردود
    1,436
    الجنس
    أنثى
    شكرا احبائي علي التشجيع اللطيف ده
    انا مبسوطة انه عجبكم
    وبشكرا علي المرور حتي الي مش قال كلمة

  7. #7
    تاريخ التسجيل
    Dec 2005
    الردود
    18,390
    الجنس
    أنثى
    التدوينات
    1
    التكريم
    • (القاب)
      • متألقة صيف 1432هـ
      • أميرة النظافة والتنظيم
      • بصمة إبداع
      • نبض وعطاء
    عدم عرض اي صور للحجاب، سواء لباس او ربطات او ما شبه..و هذا بناءا على ما جاءت به دراسة اللجنة من الامانة العامة لهيئة كبار العلماء برقم (924) للاستفتاء بان العباءة الشرعية للمرأة المسلمة ( الجلباب) هى ما تحقق فيها قصد الشارع من كمال الستر والبعد عن الفتنه , وبناء على ذلك فلابد لعباءة المراة لن تتوفر فيها الاوصاف الايته:





    1-ان تكون سميكة لا تظهر ما تحتها ,ولا يكون لها خاصيه الالتصاق.



    2- ان تكون ساترة لجميع الجسم واسعه لاتبدى تقاطيعه



    3- ان تكون مفتوحة من الامام فقط وتكون فتحة الاكمام ضيقة.



    4- الا يكون فيها زينة تلفت إليها الأنظار وعليه فلابد ان تخلو من الرسوم والزخارف والكتابات والعلامات.



    5- ألاتكون مشابهة للباس الكافرات أو الرجال .



    6- أن توضع العباءة علي هامة الرأس ابتداء.



    وعلى ما تقدم فان العباءة المذكورة السؤال ليست عباءة شرعيه للمراة فلا يجوز لبسها لعدم توافر الشروط الواجبه فيها ولا لبس غيرها من العباءات التى لم تتوفر فيها الشروط الواجبه.



    ولا يجوز كذلك استيرادها ولا تصنيعها ولا بيعها وترويجها بين المسلمين لان ذلك من التعاون على الاثم والعدوان والله جل علا يقول:



    " ولا تعاونوا على الاثم والعدوان و اتقوا الله ان الله شديد العقاب"





    لذا نمنع المواضيع التي بها عرض لأشكال العبائات و الربطات المخالفة للحجاب الشرعي والتي بها زينة

مواضيع مشابهه

  1. نصائح مهمة في الماكياج و العناية بالشعر من خبراء التجميل
    بواسطة شمس الضحىا في العناية بالجسم والبشرة والمكياج والعطورات
    الردود: 8
    اخر موضوع: 23-09-2008, 10:05 PM
  2. خمس نصائح من خبراء الموضة
    بواسطة jwmanh في الأزياء والأناقة
    الردود: 1
    اخر موضوع: 22-03-2008, 07:04 PM
  3. نصائح من خبراء التجميل لعيون متألقة
    بواسطة mysuccess في العناية بالجسم والبشرة والمكياج والعطورات
    الردود: 1
    اخر موضوع: 29-09-2007, 10:32 PM
  4. نصائح خبراء *_ حمام سريع *_ تجفيف الشعر
    بواسطة عسولة * مملوحة في العناية بالشعر وتصفيفة - تسريحات, عروس, قصات, صبغة
    الردود: 5
    اخر موضوع: 03-09-2007, 03:13 PM

أعضاء قرؤوا هذا الموضوع: 0

There are no members to list at the moment.

الروابط المفضلة

الروابط المفضلة
لكِ | مطبخ لكِ