السلام عليكم ورحمه الله وبركاته
اخواتى الاعزاء سوف اكتب لكم قصة ولادتى بحبيبتات قلبى همس ولين
الدكتور بتاعى كان مححدلى الولاده على 36 اسبوع فى اخر زيارة كنت فاكرة انى هروح يقولى امتى
لقيته بيقولى ارتاحى شوية علشان اشوفلك اى مستشفى هتولدى فيها ؟
اتخضيت ودخلت ارتاح فى حجرة وقلت لجوزى اي ده هو انا هولد النهارده كده على طول ؟
جوزى ضحك عليا وقاللى مش انتى كل شوية تقولى انا عايزة اولد بقى الصراحه يابنات كنت وصلت للاخر وبقول امتى اخلص من التقل ده
المهم دخلت للدكتور وقولتله هو فى حاجة خطيرة على البيبهات بحيث تستدعى الولاده اليوم
فقلى لا بس فى مرحلة هو بيوصلها مش بيحاول يجازف ويكمل الحمل المهم اتفق معايا على تانى يوم هتكون الولادة
رحت تانى يوم المستشفى ومش قادرة اقولكو كان احساسى خايفة جدا
دخلت حجرتى ومعى زوجى واهلى بنهزر عادى جدا
فجاة باب الغرفة اتفتح ودخلت ممرضة ومعاها الفايل بتاعى وقالتلى يلا واخدت ملابس البيبيز معاها
جوزى ومماتى جم معايا وطلعو معايا لحد موصلنا للدور اللى فيه العمليات عند بابا معين والممرضات قالولهم لحد هنا هتكمل لوحدها
كنت ماشية مرعوبة ورجليا الاتنين بيخبطو فى بعض
دخلت حجرة غيرت ملابسى ولبست بدلة التعقيم ودخلت حجرة العمليات
اول مرة ادخلها فى حياتى جسمى كله حصل فيى قشعريرة والله
لاقيت كمية ناس جوه قولت ايه ده كل دول هيولدونى ؟
بدا دكتور التخدير يعلق الكانيولا وانا بدعى ربنا وباستغفر وكنت هعيط خلاص
انا اخدت بنج نصفى وقولت للدكتور ادينى منوم مش عايزة ابقى صاحية
ضحك وقاللى اوكى
انا كنت عامله ربط فكان هيتفك الاول قبل القيصرية
اخدت المنوم وروحت فى النوم واخر حاجة افتكرتها انهم كشفو ظهرى ودهنوه بيتادين قبل ابرة الظهر
صحيت من النوم سمعت صوت واواة الكتاكيت كنت فرحانه قوى وفضلت اسمع واتاكد ان الاتنين بيعيطوا فضلت احمد ربنا وادعى لكل اللى اعرفها واللى معرفهاش ان ربنا يرزق كل مشتاقه النعمه الكبيرة دى
المهم سمعت الدكاترة بيتكلمو عنى ومساعد الدكتور بتاعى بيقولهم
على فكرة دى عملت كل حاجة حامل من تلقيح صناعى وعملت شفط اجنة وربط لعنق الرحم فضلو يقولوله ياسلام وكانو مستغربين
ودلوقت همس ولين فى حضنى اللهم لك الحمد والشكر
يارب ارزق جميع اخواتى المتاخرات فى الحمل بقرة اعين لهم اللهم امين يارب العالمين
الروابط المفضلة