السلام عليكم حبيباتى
انا يا بنات بإذن الله متحدد لى ولادة قيصرى .. لظروف ان عندى ضغط عالى وكمان حصل موت للجنين فى الحمل الأول ( عافاكم الله )
المهم بصراحة انا اتعقدت .. كل ما ادخل موضوع الاقى الاخوات هنا متعقدين من القيصرى وبيقولوا انه صعب اوى وكلام من دا
انا فى الحمل اللى فات ولدونى طبيعى .. ومع ذلك بردو تعبت من الخياطة اللى تحت .. وكلها كام يوم وكنت كويسة الحمد لله
كمان اختى الكبيرة ولدت قيصرى واصحاب ليا ولدوا قيصرى وبردوا كام يوم وبقوا كويسين بفضل الله
فأنا بجد مش عارفة للدرجة دى القيصرى صعب زى ما انتوا بتقولوا والا لو مثلا العملية تمت فى مستشفى كويسة والرعاية فيها كويسة والطبيب شاطر مثلا والخياطة كويسة فبتكون مفيهاش مشاكل ؟؟
انا عارفة طبعا ان كل حاجة طبيعية احسن لأن دى الفطرة اللى ربنا خلقنا عليها بس بصراحة كمان الطبيعيى احيانا بيبقى عذاب وخطر على الجنين
يعنى كتير بيفضلوا يصبروا على الحامل فى الولادة الطبيعى لحد يا عينى ما تتعذب وفى الآخر يولدوها قيصرى !!!
ياريت لو تقولولى رأيكم وتجاربكم .. هل كل اللى ولدوا قيصرى تعبوا اوى كدا؟؟
بس ياريت تكون تجاربكم قيصرى .. مش مثلا واحدة تكون جالها طلق وتعسر فى الولادة وبعدين لجأت للقيصرى .. لأن اكيد دا مرهق اكتر لما الحامل تمر بالطبيعى والقيصرى فى نفس الولادة ..
ياريت اللى راحت ولدت قيصرى علطول تقولنا تجربتها
ويارب ييسر ولادتنا جميعا ويرزقنا ساعة سهلة واطفال اصحاء معافين
احبكم فى الله
الروابط المفضلة