انا بفضل الله ثم دعوات اخواتى بنات ملف الحقن المجهرى حامل فى الشهر السادس فاضلى اسبوع و ادخل السابع
و ده اول حمل لي
امبارح الصبح صحيت على عصر جامد فى الرحم و لقيت بطنى بقت زى الحجرة
بس انا طنشت لان الموضوع ده حصل معايا كتير قبل كدة تتحجر و تفك
بس اللى خلانى اقلق ان التحجر ده بقى بيجيلى كل 5 دقايق او عشر دقايق بالكتير
من الساعة 9 صباحا
جيت على الساعة 3 الضهر قلت مبدهاش بقى لازم اتصل بالدكتور
اتصلت بالدكتور قال انا مسافر دلوقتى كلموا المساعد بتاعى
كلمت المساعد ادانى دوا و تحاميل شرجية و قال لى استنى ساعة لو لسة فيه تقلصات و تحجر كل 5 دقايق كلمينى و انا اقابلك فى المستشفى لان لو التقلصات ده استمرت ممكن يحصل ولادة
المهم طبعا انا اترعبت من موضوع الولادة فى السادس
استنيت الساعة بعد الدوا و للاسف التقلصات ما زالت مستمرة
اتصلت بيه و تخيلوا انه مردش على التليفون
اتصلت اكتر من 10 مرات
جوزى قال لى تعالى ننزل المستشفى قلت له افرض مكنش هناك يبقى ما نبنى الا المشوار و خاصة ان المستشفى خاصة و انا ساكنة فى الخامس يعنى لو معملوليش حاجة فى المستشفى طلوع السلم هيقضى عليا
و للاسف الشديد فى بلدى يوم الخميس كل العيادات بتكون قافلة و المستشفيات الحكومة اى كلام يعنى هتبهدل معاهم و ممكن يدونى علاج غلط
اتصلت بدكتورة فى بلد قريبة من بلدنا بتبقى فاتحة يوم الخميس
قالتلى لازم تروحى مستشفى و يتعلقلك محلول فيه حقنة يوتيبار علشان التقلصات ده تقف و لازم مستشفى علشان يتابعوا القلب لان اليوتيبار بيزود ضربات القلب
قلت لها اجيلك قالت لى لا طبعا مينفعش تسافرى خالص دلوقتى
المهم ساعتها حسيت ان الدنيا كلها بتتقفل فى وشى حسيت انى خلاص كل شئ بينتهى و الحل موجود لاكن للاسف الله يسامحه الدكتور اللى قفل موبايله
ملقتش قدامى حل غير انى اسلمها لله و انام و اللى يحصل يحصل
طبعا جوزى استغرب لما لقانى هنام و هو اعصابه متوترة و كان فاكرنى اعصابى باردة بس الحقيقة انى كنت بحاول اهدى نفسى لان مفيش فى ايدينا حاجة نعملها
و الحمد لله التقلصات استمرت لغاية النهاردة الصبح و بعدين انتهت كان شيئا لم يكن
بس اللى بفكر فيه دلوقتى لو لا قدر الله حصل لى ولادة يوم خميس او جمعة هل مش هلاقى اللى ينجدنى و خاصة انى عاملة عملية ربط يعنى ممكن لو متلحقتش و اتفك الربط يحصل تمزق فى عنق الرحم او بعد الشر عن الجميع انفجار فى الرحم
ربنا يستر دعواتكم
رد مع الاستدلال
الروابط المفضلة