أحداث قدوم أحلى قمر في الدنيا
بدأت قصتي بيوم السبت تاريخ 30/5 نزلت السوق اقضي باقي اغراض بنتي واشتري الضروري
ومشيت وايد لاني رحت اكثر من مكان لحد ما طلعت روحي من التعب وألم الظهر
رجعت البيت وظليت اتألم ليوم ثاني حسيت ان جسمي كله متكسر وفي الليل امي الله يخليها سوت لي كوب قرفة
وكثرت وايد من القرفة وحطت فيه شوية عسل
المهم انا شربته ونمت بعدها على طول صحيت الصبح على آلآم بسيطة في الحوض واسفل الظهر وعظم الفخد
بس ما حسيت بألم او تقلصات في الرحم وقلت بنفسي هذي آلام عادية يعني مثل اللي احس فيها كل يوم
طلعت العصر اللي هو يوم 1/6 مع امي وزوجي وقالت لي امي خلينا ناخذ كارت الحمل يمكن نمر المستشفى
زوجي سمعها واصر ان احنا نمر المستشفى وانا اقولهم ما فيني شي عادي هذا من الثقل قالي زوجي روحي
الطوارئ بس نطمن احنا ما راح نخسر شي انا سكت وما جادلته بالموضوع قلتلهم اذا خلصنا مشوارنا نمر
وخلص المشوار ورحنا المستشفى
دخلت على الطوارئ وفحصتني الممرضة وسألتني طبعا عن سبب روحتي وانا خبرتها بالتفصيل عن الالآم
وهي حسبت لي اني بالاسبوع 36 و5 أيام ودخلتني مباشرة على الدكتورة حتى قدمت دوري على الحوامل اللي
قبلي وانا بصراحة بديت اخاف وحسيت ان الموضوع صار جد
لما دخلت على الدكتورة سألتني وين احس بالآلام وانا قلت لها بالتفصيل
قالت لي ادخلي غرفة الكشف عشان تفحص الرحم وانا بهاللحظة زادت الخوف فيني قلت لها ضرور يعني قالت
لي أكيد عشان نعرف هذي ولادة ولا لاء والرحم مفتوح ولا مسكر
دخلت واتسطحت على السرير وهي دخلت علي وقالت لي اول شي بنشوف البيبي في السونار ونطمن لى
وضعيته طبعا انا ما عارضتها لاني احب اشوف بنتي بالسونار
وهي تحرك سألتني بعض الاسئلة من متى وانا احس بالألم واذا في شي ينزل علي
المهم انا قلت لها ان من امس العصر تنزل علي افرازات بيضه بس مو غليظة يعني سائلة
قالت ل وضعية البيبي اوكي ومتهيأ للولادة وبيني وبينكم من جات طاري الولادة مت خوف قلت لها انا توني
بالاسبوع 37 وباقي على ولادتي 23 يوم قالت لي خليني افحص الرحم ونشوف الافرازات اللي تنزل منك
المهم دخلت اصبعها بس المسكينة يدها رحومة ما عورتني وايد
بس صدمتني لما قالت لي الرحم مفتوح 2 سم انا للحين ساكتة قلت مو مشكلة 2 سم اكيد مو ولادة وبرجع البيت
بعدها بثواني نادت على الممرضة وجابت شي ما اعرف شنو بس هو بلاستيك عشان يفتح المهبل ودخلت فيني
وانا شوي وتنزل دموعي لان يوجع وايد ودخلت مثل عود الاذن بس طويل عشان تشوف سبب الافرازات
والصدمة الثانية انها لما طلعته قلب لونه اسود .......................... يعني ماي البيبي
قصة بولادتي بولدي انعادت مرة ثانية قالت لي الظاهر انتي ما تولدين الا بهالطريقة قالت لي ماي البيبي بدأ
يتسرب خلاص تنويم بالمستشفى وانتي فيك بداية طلق ننتظر لبكرا ونشوف حالتك
حولتني على غرفة ثانية وسوو لي تخطيط بعد ما خلص رحت لها وقالت لي الرحم فيه تقلصات خلاص ولادة
قلت لها لا انا ما فيني ولادة وما ابي اقعد بالمستشفى قالت خلاص اطلعي على مسؤوليتك بس انا لازم اكلم
زوجك واخبره بالخطر اللي بتعرضين نفسك انتي والبيبي اذا طلعتي
طبعا انا عارفة زوجي عدل ما بيرضى اطلع قلت لها خلاص بنام وقلت بنفسي انتظر لبكرا واكلم دكتورتي اذا
ما فيني ولادة ترخصني
طلعوني على الجناح وانا بين خوف وحيرة بين ارجع البيت وبين انام بالمستشفى وخصوصا اني حسيت ان توى
الناس وانا ما فيني آلام
وصلت الغرفة وحسيت باحساس غريب اول مرة ابعد عن ولدي اول ليلة انام بعيدة عنه دخل علي زوجي
وعيوني غرقانة بالدموع ضحك علي وانا زدت في الصياح اقوله الله يخليك طلعني ما ابي ارقد خذني وياكم ما
ابي ابعد عن حمودي هدأني شوي وجاب لي حمود اشوفه وطمني انه بيهتم فيه واشترى لي شوية اكل
بس من وين تجيني نفس اكل وانا مو طايقة المستشفى كله خصوصا ان ما حصل لي غرفة بروحي بجناح
الحوامل واضطريت انام مع ثنتين بالغرفة وكلش كان الوضع مو مريحني
طلع عني زوجي وامي وحسيت بوحدة غريبة قلت بنفسي يالله كلها ساعات ويجي الصبح واطلع وارتاح
دخلت علي ممرضة وحطت بيدي مغذي وفيه مضاد عشان الافرازات اللي تنزل مني وهذا اكثر شي ما
احبه المغذي يضايقني وايد ويعيق حركتي وانا بدون شي مو عارفة انام اشلون مع المغذي
وكانت ساعات الليل طويلة وانا كل نص ساعة ادخل الحمام واجر معاي هالمغذي
وعلى الساعة 5 الصبح تاريخ 2/6 صحيت من النوم وانا احس ان شي حار بالرحم دخلت الحمام الا اشوف
شوي دم نزل مني خفت ودقيت الجرس على الممرضة ولما جت قلت لها فيني ألم شوي ونزل مني دم
وهي عصبت علي وقالت لي ليش فيك ألم وساكتة وفحصتني وقالت لي 2 سم الحين مافي ولادة تبين مسكن قلتلها
لا واتحملت الالم لاني ما ابي اروح جناح الولادة وامي وزوجي مو يمي
والمسكينة امي كل شوي تتصل وانا اقولها لا تتأخرون علي ابيكم يمي انتي وزوجي عشان لما الدكتورة تجي
اقولها ترخصني لان انا ما فيني ولادة
والمسكينة زادت خوف علي وحاولت تجيني بأسرع وقت بس للاسف الدكتورة سبقتها وسألتني عن الالام وقلت
لها ان نزل مني شوية دم واحس بالالام بس مو قوية قالت لي خليني افحصك فحصتني وقالت لي 2 سم
قلت لها يعني ما فيني ولادة قالت لي لالالالالالالالالا نزل منك مخاض انا بسويلك مساج باصبعتي مفعولها مثل
تحميلة الطلق الصناعي واذا زاد عليك الالم حاولي تتمشي ومن يوصل الرحم 3 سم ناخذك على جناح المخاض
قلت خلاص شكله مافي مفر قلت لها ان شاءالله
وطلعت الدكتورة ودخلوا علي امي وزوجي ومرت اخوي الله يجزيهم خير وخبرتهم شقالت لي الدكتورة
وزوجي فرح قال يعني بتولدين قلت له الله اعلم
قعدت اتريق الا والدكتورة داخلة مرة ثانية وقالت لاهلي اطلعوا شوي وانا محتارة ما ادري شسالفة
قالت لي بحط لك تحملية طلق صناعي عشان تساعدك وتوصلك الى 3 سم على الاقل
وانا خاطري اقولها لا ما ابي لا طلق صناعي يعني اموت من الالم بس بذاك الوقت حسيت لساني انربط
وخضعت لاوامرها وكان على الساعة 9 الصبح وطبعا ما اتحرك ساعتين
وانا ما تعدت ربع ساعة الا وانا ميتة من الالم حسيت ان بطني بينفجر والحرارة زادت علي وظلت الالام تروح
وتجي كل دقيقتين تقريبا وما خلصت الساعتين الا وروحي طالعة نادت امي عليهم لاني من زود الالم تميت
اضرب ايدي براسي حطت علي التخطيط وبعد نص ساعة جتني دكتورتي الخاصة وقالت لي بدأ عليك الطلق
ان شاءالله اليوم تولدين وانا اتفائلت بصراحة
وجتني الممرضة على الساعة 2 الظهر فحصتني وقالت نفس الشي 2 سم بس
انا بهالوقت حسيت ان الدنيا سودت بوجهي وان خلاص ما في فايدة والطلق الصناعي بس زاد علي الالم بس ما
غير فيني شي وكأن الابواب انقفلت بوجهي بدأت في نوبة صياح وصرخت على اهلي وقلت لهم رجعوا البيت
انا ما بولد خلاص ما ابي احد يقعد معاي ولا ابي اشوف احد وهم لما شافوني بهالحالة نزلوا يتغدون عشان اهدأ
شوي وانا بهالوقت بدأت اقرأ آيات قرآنية لحد ما هدأت شوي وأكلت التمر اللي امي جابته لي والحمدلله حسيت
ان نفسيتي ارتاحت شوي وبعدها رجعوا اهلي وبديت انسى الالم واسولف وياهم وبعدها جتني الممرضة وقالت
لي على الساعة 4 بيعطوني الجرعة الثانية من الطلق الصناعي وانا زاد خوفي بصراحة خفت يزيد علي الوجع
والرحم يبقى مثل ماهو وانتظر تقريبا اكثر من ساعة بعدها جتني الدكتورة المناوبة معاها دكتورة ثانية وممرضة
وقالت الدكتوره انتي بتعطينها الحبة ولا انا ولسوء حظي قالت هي دخلت اصبعها تفحصني والله والله بدون مبالغة
حسيت ايدها وصلت للرحم نفسه وجعتني لدرجة اني صرخت وقعدت اترجاها تتركني بعدها طلعت ايدها وقالت
ان الرحم وصل الى 4 تقريبا وما يحتاج طلق صناعي اثاريها حرضت الرحم بحركتها وهلكتني
من هذي الحركة وانا الوجع لازمني بعدها جت الممرضة وقالت لي الدكتورة الصبح اللي عطتك الطلق
الصناعي كاتبة بملفك انك من توصلين 3 سم ناخذك لغرفة الولادة وهناك يفتحون ماي البيبي ويعطونك ابرة
تحفز الرحم بس احنا الحين ما بنوديك لانك توك 4 سم صبري لل5 وغرف الولادة كلها مليانة ننتظر تفضى
غرفة ونوديك امي سمعتهم وعصبت عليهم تقوللهم الدكتورة قالت 3 وبنتي الحين وصلت لل4 ومو قادرة تتحمل
الالم وانتوا تقولون 5 راحوا اتصلوا على جناح الولادة وقالوا لهم على الساعة 7 ونص يودوني
سبحان الله حسيت الالم يروح ويجي ولما جابوا لي ثياب الولادة وقالوا لي غيري جاني احساس غريب يمكن من
الفرحة اني قربت اشوف بنتي كانوا يجروني على السرير وزوجي حامل اغراضي ويمشي وراهم ويبتسم لي
وانا ابتسم له والممرضة تقولي اذا ما فيك ألم ليش خليتينا نجيبك هني الحين بعصبون علينا قلت لها يعني لازم
اصرخ عشان يبين علي ان فيني ألم المسكينة شافتني عصبت عليها سكتت عني
دخلوني الغرفة وحطوا علي التخطيط والمغذي لازال موجود وقالت لي نامي على جنبك وحطت علي
الاوكسجين وغفت عيوني شوي ترى انا للحين بخير وبعدني على الولادة
المهم بعد الساعة يعني على الساعة 8 ونص جت الدكتورة الموجودة في الجناح وشافت ملفي انها لازم تفتح ماي البيبي وتعطيني ابرة
وهني بدأت معاناتي فتحت الدكتورة كيس الماي ونزل الماي حار وبعدها بدقايق بدأت الالام كانت تجيني الالام
كل دقيقة وما تروح الا ثواني وترجع اقوى من قبل وانا ما عندي الا اصيح وادعي ربي يخلصني بسرعة لكن
الالم قاعد يزيد لدرجة صرت اضرب راسي بالحديد اللي في السرير من شدة الالم وانا اترجى الممرضة تعطيني
اي شي مسكن او اي شي حسيت اني بموت وهي المسكينة قالت
لي بعطيك ابرة بس لحد ما جهزت الابرة حست مر علي يوم كامل وانا اتعذب المهم عطتني الابرة بس للاسف ما
اثرت فيني بالعكس احس الشي زاد وانا حتى النفس صرت ما اقدر اخذه بهالاوقات جتني حالة اتمنيت اني ما
حملت من اساس قلت بنفسي انا كنت مرتاحة وعندي حمود ليش عذبت نفسي حسيت اني خلاص قربت اموت
قمت اترجى الممرضة قلت لها ابي اشوف ولدي الله يخليك ابي اشوف احمد حاسة نفسي مو قادرة حتى اتنفس
ابتسمت في وجهي وراحت وعلى الساعة 9 ونص وصلت لحدي وقلت مستحيل اقدر اتحمل اكثر حسيت بحرارة
زادت علي قلت بنفسي ما في الا حل واحد انا ادفع بنفسي وهو للحين ما جاني الدفع اصلا بس ما في الا هالحل
عشان اخلص صرخت على الممرضة قلت لها احس بشي ينزل مني جتني على السريع وفحصتني وقالت لي
خلاص الرحم انفتح كامل اخذي نفس وصبري نجهز الاغراض قلتلها ما اقدر اتحمل بمووووت قالت لي اوكي
ادفعي على السرير عبالها اني ما بسويها وهي دايره وجهها تجهز اغراض البيبي وتفتح الجهاز اللي يدفون فيه
البيبي والممرضة الثانية تجهز اغراض الخياطة الا و انا اضغط على نفسي ودفعت براس بنتي جت تركض
ومسكتها وانا دفعت باقي جسمها ومن كثر ما دفعت سببت لنفسي تمزق لان ما مداهم حتى يشقوني
الحمدلله طلعت حبيبتي قمورة على الساعة 9 و34 دقيقة وقالت لي الممرضة مبروك جبتي بنت وانا بهالوقت
خلاص احس نفسي ببركة ماي واعوم واسبح فيها انهدت كل قوتي وبدأت مفعول الابرة المسكن خدرت جسمي
كامل حتى ما سألت عنها مسكينة ولا قلت ابي اشوفها حطوها بالدفاية وانا تاركيني عشان يبون المشيمة تطلع
بروحها ودقايق الا واحس بشي ينزل مني نزلت المشيمة كامل الحمدلله وبعدها عطتني الممرضة حوالي 8 ابر
بنج عشان الخياط وخصوصا مع التمزق اللي صار لي وبعدها خيطتني وطولت وهي تخيط وايد لان المنطقة
كلها احتاجت للخياطة اخذت اكثر من ساعة وهي تخيطني بعدها تركتني على السرير بعد ما خلصت وانا حاسة
نفسي مبنجة وصاحية بنفس الوقت بعدها طلعوني على استراحة النفاس ودخلو اهلي والكل كانوا فرحانين
وزوجي يقولي جبتي قمر وهي احلى من القمر
الحمدلله عدت الولادة على خير وفرحت في بنتي ثاني يوم لما استرجعت قوتي كانت من صدق لحظات صعبة
حسيت فيها اني قربت للموت وخصوصا اني لما ولدت ولدي ما حسيت بربع هذا الالم سبحان الله الحين اتأكدت
ان حمل عن حمل يفرق وولادة عن ولادة تفرق بس ما تسوى شوفتها بحظني وفرحة ابوها واخوها فيها احساس
حلو ويستاهل الام تتعب عشانه وتتحمل آلام عشان بس تصير ماما
سامحوني اذا طولت عليكم بس صدقوني انا سردت لكم قصتي كامل وبالتفصيل وبدون اي مبالغة وآسفة اذا
خوفت وحدة فيكم ويارب يسهل على كل الحوامل وشكر خاص لحوامل تجمعنا الغاليات تجمع رجب وشعبان
ورمضان مع ان بنتي قدمت موعد ولادتها 22 يوم يعني ما انتظرت حتى يجي رجب بس الله العالم اني احبهم
مثل خواتي يارب يسهل على حوامل الشهر التاسع كلهم ويرزقهم ولادة طبيعية سهلة منسية واشكرهم على
دعواتهم ووقفتهم وياي اللي مستحيل بنساها
رد مع الاستدلال
الروابط المفضلة