قصة ولادتي بأميرتي الجميلة
أما الولادة .. الحمد لله ..
طبعا أنا من أول اتاسع ونفسي أولد لأني طفشت .. وكمان شايلة هم اختباراتي .. وكل أسبوع أروح الموعد يقولولي راس البيبي فوق .. أمشي ..
وأنا أمشي لحد ما تقطعت الجزمة اكرمكم الله .. وفي اخر موعد رحته كان يوم الخميس قالتلي الدكتورة الجملة المحفوظة .. راس البيبي فوق بس ابغا افحصك داخلي .. وانا خوافة وما اطيق هدا الفحص فصرت اترجاها انها ما تعورني والحمد لله عدا على خير .. قالتلي يادوب الرحم مفتوح 1 سم .. تعاليلي يوم الثلاثاء وامشي كتير ...
انا رحت البيت من هنا والدم اكرمكم الله بدا ينزل من هنا .. واستمر ليوم الاتنين .. طبعا انا ما قلت الا لزوجي ما ابغا اقلك الاهل علي .. ومع كل هذا مافي أي علامة تانية من علامات الولادة ..
يوم الاتنين الدم زاد وصار كأنه دورة .. بس مافي ولا أي ألم ؟!!!!
طبعا انا خفت .. وديت بنتي عند اهل زوجي وقلتلهم عندي موعد مستشفى .. واخدت شنطة الولادة تحسبا لأي عارض ..
دخلوني الطوارئ وفحصوني قالولي الرحم مفتوح 3 سم .. وسولي تخطيط بس مافي أي طلق ؟؟!!! >> كيف انفتح الرحم سبحان الله !!!؟؟
طبعا انا كنت مش اكلة شي فالبيبي كانت حركاته بطيئة وضعيفة .. كانت جيعانة مسكينة .. عطوني عصير مانجو الا والحمد لله صارت تتحرك ..
بس رجعت جات الدكتورة المناوبة لأن دكتورتي ماكانت موجودة .. وقالتلي روحي امشي ويمكن على يوم الاربعاء تولدي ارجعي بيتك مافي ولادة ..
طبعا انا ما عجبني الكلام .. خرجت من المستشفى على الكورنيش ومشيت طريق الكورنيش كلللللللللللله .. وبعدين رحت البيت وشربت قرفة بالحليب ,, وكاسة عصير برتقال وحطيت فيها ملعقة خروع .. واكلت معصوب بالتمر والعسل والقشطة ...خخخخخخ
ونمت الساعة 12 . الساعة 3 أصحى على ألم فظيع ..( خلطاتي العجيبة سوت مفعولها ) والدم يزيد ..وصار الألم كل ربع ساعة .. وزوجي صار خايف كل شوي يقولي يللا نروح المستشفى .. يللا اتصلي بأمك وأنا اقوله لسا ما شد الألم ..
صارت الساعة 7 .. أنا خلاص صرت ما اقدر أوقف .. قلت لزوجي دق على امي تلحقني على المستشفى ..
وانا بيتي بعيد عن المستشفى .. وصلت المستشفى على 8 ونص وانا ما قدرت انزل من السيارة من قوة الالم .. والله يا بنات اني ناااسية كل شي اصلا كل ما يجي الالم اقول في نفسي يااارب مرررة قوي وهدا لسام اشد علي .. الم الولادة ممسووووح من الذاكرة ..خخخخ
دخلت والا الاقي الدكتورة المناوبة يلي كانت امس موجودة .. دخلت عليا وانا دوبها جاتني الطلقة وتبغا تفحصني زوجي يقولها اصبري بس يروح الالم ما تبغا مستعجلة .. طنشتها لحتى رقت جات تفحصني والله لا يوريكم على يد .. يد الرجل الحديدي ..دكتورة جزارة والله صرت ابكي وارجففففففف وصرت بردانة صاروا بس يغطوني بشراشف وانا اسناني تطقطق من البرد والخوف .. طبعا الرحم انفتح 6 سم
نقلوني غرفة الولادة وركبوا الأجهزة .. والحمد لله من حظي الطبيبة الجزارة خلص دوامها وجات دكتورة عسولة سورية اسمها لينة والله اسم على مسمى ربي يسعدها مررررة طيبة ..
وصار الألم يشد وانا ابكي وأقول لماما تعبت .. بس الى الأن ما طلع طوتي بس تشوفوا الدموع تنزل هههههه
وصرت ابغا ادخل حمام .. يقولولي سويها هنا .. اقلهم لا ابغا حمام ما اعرف .. ما خلوني لأن الرحم مفتوح كتير ويخافوا البيبي ينزل في المرحاض اكرمكم الله .. وبعد ما اترجيتهم اعطوني الحقنة الشرجية وقالولي ادخلي بسرعة ولا تشدي .. بس الحمد لله دخلت وارتحت .. وزااااااااااااااااد الألم صار الطلق ورا بعض .. ابغا آخد نفس ما أقد .. صرت ابكي وبدا الصوت يطلع ..
وحظي دكتورتي ماخذة اجازة مرضية بس انا الحمد لله من يوم ما وصلت المستشفى استخرت وقلت يارب سخرلي الدكتورة التي تخافك وتخشاك لأن كان عندي احساس ان دكتورتي مو موجودة ..
طلبت الدكتورة صباح لأنها استشارية وسمعتها كويسة والحمد لله جزاها الله خير لبتني .. وبسرعة انا بديت احس بالدفع صاروا يقولولي استني لا تدفعي وانا مارديت عليهم ,, ابغا اخلص تعبببت .. والحمد لله كلها كم دفعة وجات نور عيوني حبيبة قلبي بنوتتي العسولة ..
طبعا طلبت منهم انهم ما يعطوني مخدر ابغا اشوف كل شي ..
والحمد لله المستشفى طيبة والممرضات طيبية , والدكاترة كويسين .. وعدت على خير
بس والله يا بنات كل يوم أقعد افتكر ساعات الولادة .. كيف حنساها ؟؟L
ارجع أقول متل مانسيتها ببنتي الكبيرة رح أنساها .. وربي يجعل ذريتنا من الصالحين ..
انا رجعت من المشفى على بيت أهلي ,, وأمي حبيبتي تعبت وطلعلها حساسية في جسمها .. وانا نفسيتي مرررة تعبت لأني صرت ما اقدر اطلب شي كل شي انا اسويه بنفسي .. فأدى ذلك إن فيه كم غرزة انجرحت وجاني امساك قووووووووووووي ..يلي صرت ابكي واي شي اعصب منه ..وبنتي لأنها صغيرة جاها الصفار بس الحمد لله اتشافت منه .. بسلأن رضاعتها خفيفة انحبس الحليب في صدري وتحجر صدري وارتفعت حرارتي وما كانت تنزل الا لما رحت المستشفى واخدت ابر وشفطولي الحليب .. ومن كتر ما شفطوا صدري اتنفخ وصارت بنتي مو قادرة تمسك الحلمة ولما ترضع احس روحي بتطلع .. وصدري التاني كرعت فيه فصار منتفخ ومررررة يوجعني فكنت في حال لا يعلمها الا الله تعالى بس نقول فرج الله قريب والحمد لله ..
هذه قصة ولادتي ومأساتي لكن مع ذلك حلاوة الذرية تنسينا الألم والمتاعب ..
الروابط المفضلة