أخواتي الحبيبات
أنا في منتصف الشهر الثامن

والدكتور قاللي بس تدخلي حتى يوم في التاسع وتولدي إن شاء الله

لأنه أنا من أول التامن وعنق الرحم مفتوح



عندي استفسار لو حد من الأخوات من مصر يفيدني
ايه محتويات شنطة الولادة ؟؟
وكمان ايه مستلزمات البيبي اللي المفروض أكون اشتريتها؟؟
وجزاكن الله خيرا
أنا عايزة حد من مصر لأن نظام المستشفيات بيختلف من دولة لأخرى كمان مسميات هدوم البيبي بتختلف من دولة لأخرى

بارك الله فيكن وجعله في ميزان حسناتها اللي هاترد عليا
وأمانة عليكم تدعولي ربنا ييسرلي الولادة الطبيعية برحمته ولطفه سبحانه وتعالى

حبيبتى ربنا يقومك بالسلامة ان شاء الله .. انا كمان الدكتور بتاعى قالى هيولدنى فى اول يومين كدا فى التاسع بإذن الله بس قيصرى

بالنسبة للحاجات اللى هتاخديها معاكى المستشفى للبيبى : خوديله سالوبيت قطن بكم لأن غالبا بتبقى المستشفى مكيفة والطفل بيبقى لسة حساس من الجو الخارجى
كمان خدى فانلة كت (وفانلة كم احتياطى) بس خليهم فانلتين احسن للإحتياط يعنى .. على حسب كام بوم هتقدى فى المستشفى

خدى كوفرته للبيبى وخدى بامبرز معاكى طبعا اللى هوا اول مقاس .. وخدى شامبو للبيبى احتياطى علشان لما يجو يحموه ولو ان المستشفيات الكويسة بتحمى البيبى بشامبو من عندها

بالنسبة ليكى خدى جلابية او بيجامة وتكون بزراير او سوسته علشان تسهل عليكى الرضاعة ان شاء الله وخدى فوط صحية كبيرة وخدى شاور جيل فوطة ليكى وخدى كمان اسبراى وغيارات داخلية طبعا كترى منها يعنى 3 غيارات مثلا. وخدى شبشب يعنى علشان الحمام وفرشة اسنان ومعجون

وربنا يقومك بالسلامة يا قمر

ربنا يقومك بألف سلامه وييسر ولادتك يارب
امابقا الحاجات اللى تاخديها اتمنى البنات يفيدوكى يا ست الكل

بالنسبه للشنطه بالنسبه لحاجات البيبى فانله حاملات واخري نصف وجلابيه وبنطلون قطن خفيف والكفارته بتاعته وشامبو بتاعه وفوطه بتاعته وبالنسبه ليكى جلابيه تكون بسوسته زى ما اميره صلاح قالت لانى ماخدتش بالى من الموضوع ده واخذت جلابيه مقفوله وتعبتى او بيجاما سهله للرضاعه وفوطه ليكى وفوط صحيه تكون كبيره خاصه بالنفاس انا شوفتها في اولاد رجب وسبشب وغيارات داخليه ولاتنسى بلح تمر ابوه او احد يمضغه ويحنك بيه فم الطفل ليها فوايد جمه وكذلك احد ياذن ليه في اذنه وذللك اتباعا لسنه الرسول عليه الصلاه والسلام ارجو ان اكون افدتك وربنا يقومك بالسلامه ويجعله وش السعد والهنا عليكوا

الأخوات الرائعات أميرة صلاح و doma
بارك الله فيكم بجد أفدتوني جداً جداً
أنا كنت فعلاً محتاسة بس انتو سهلتو عليا الموضوع
ربنا يكرمكم يا رب
ويجعله في ميزان حسناتكم
الأخت عصفوراية شكراً جزيلاً

ربنا يقومك بالسلامه انتي و انا و كل الحوامل ..بصي يا ستي زي ما البنات قالوا لك بس انا هازود عليهم ...
خدي معاكي شراب قدم ليكي و روب يكون تقيل شتوي يعني لأانك بعد الولاده ها تحسي ببرد جامد .... و خدي معاكي 3 اطقم للبيبي داخلي و خارجي ...و كريم الحفاض طبعا من الانواع الحلوه زنك اوليف ...ما تنسيش فرشة الشعر ليكي و بنس شعر طبعا
لو المستشفي مش يتقدم اكل خدي معاكي غلايه صغيرة و باكو ينسون ليكي علشان دي اول حاجه ها يمسحوا لك بشربها ...
اوعي تنس التمر ...زي م دوما قالت لك ..خدي معاكي كذا جلابيه بيت ليكي و تكون مفتوحه بزارير او سوسته ..خدي ضعف عدد الايام اللي ها تقعديها في المستشفي

ربنا يقومك بالسلامه ان شاء الله ..ادعي لي ربنا يتمم لي حملي علي خير

حبيبتى ربنا يقومك بالسلامة إن شاء الله ويسهل ولادتك ويقر عينك بالبيبي سليم معافى إن شاء الله

أما عن الشنطة فهى بتنقسم لقسمين
مستلزمات البيبي
1-سالوبيت كت بيبق زى الشاية بس بكباسين من تحت
2-2رباط سرة
3-بامبرز (السعودى) المقاس الاول بيبقي أفضل فى السعودى او مايسمى اكتيف
4-سلوبتات خارجية(2 او 3) أفضل من الجلابيات لانه بيحكم البيبي ومبيدخلش هوا ومن الافضل يكون بكم طبعا
5-2كوفرتة واحدة لداخل المستشفى والاخرى عند الخروج بالسلامة
6-كاليكوت للخروج من المستشفى
7-شاور للبيبي ومناديل معطرة للاستعمال عند التغيير وفوطة ليه

8-بافتات قطنية

أما مستلزماتك انتى

1-جلابيتين كم وطرحهم طبعا وقميص قطن وغيارات داخلية قطنية والافضل انها تكون واسعة علشان تبقي مرتاحة

2-عطر هادى ليكى وممكن تجيبي معطر جو للغرفة لتغيير ريحة الغرفة وتغيير مودك طبعا

3-شبشب وفوطة كبيرة ومشط

هو ده الى انا فكراه
يارب أكون أفدتك وربنا يقومك بالسلامة

بارك الله فيكن
أنا فعلاً عاجزة عن الشكر
جعله الله في ميزان حسناتكن

ما شاء الله البنات فادوكى اخر حاجه تولدى بالسلامه ان شاء الله