بسم الله الرحمن الرحيم


القصة طويلة فبقسمها اجزاء


الفاضية تقراها خخخخخخ


بدايه القصة بدأت يوم عرفت اني حامل


بعد ولاتي ببنتي الثانية قررت اخذ مانع ، وخذته تقريبا 3 سنوات


وهديت الهبوب عشان احمل ، والحمد لله عطتني الحبوب مناعة 6 شهور


وكنت الدورة تتاخر اسبوعين في كل شهر .. وتطلع النتيجة سلبية


فسرت المستشفى عشان اجوف شو السالفة ... فقالت لي الدكتورة ان في تكيس ولازم تزل الدورة عشان احمل


وعلى اساس كلامها كليت اناناسه كاملة وشربت لي زنجبيل وقرفة ومرامية عشان تزل الدورة


وتاخرت الدورة ... فقلت لزوجي ايب التحليل مال الحمل


قالي : اكيد بيطلع مثل كل مره خخخخخخ ماشي حمل فلا تعبين نفسك


انا قلت سبحان الله يكون حمل وانا يالسه اكل هالاناناسه


ويوم سويت التحليل طلع حمل !!!


يا ربي كنت خايفة لا يكون يصير بالجنين شي بعد هالخبصة ، وقعدت اوسوس ...


تخيلوا ياني ويع فضيع ببطني وظهري ما قدرت اتحرك ويالسه اصيح ... الحمد لله خف بعد ما خذت مسكنات ... كله من الوساوس


وسرت بعدها ركض العيادة والحمد لله طلع الجنين بصح وعافية ... سبحان الله رغم كل التخبيصات الله ثبت حملي


يتبع

مشاكل الحمل


في الشهر الخامس كنت نازل من الدرج بالبيت وانزلقت بماي كان على الدرج وطحت على ركبي وريولي ... تقريبا 7 درجات .. الله سلمني وما دقيت بطني .. بس ريولي توهت صارت كلها سوده من الكدمات


عموما فالشهر السابع كنت اتمشى بحوي البيت وتعثر ريولي بحفره قدامي ، حسيت ان الحوض تحرك من مكانه .. وما قدرت احرك ريولي او امشي تميت يالسه بمكاني نص ساعة


وتميت فترة ظهري وريولي يعوروني ما اقدر احركهم


وبعدها في الشهر الثامن .. ضربت حديده كانت مدفونة تحت الرمل وسببت لي ويع بالرحم .. تخيلو ما قدرت اتقلب بالسرير او حتى ارفع ريولي


وفي الشعر التاسع تعثر بحبل وزين ما طحت .. بس بعد اثر على الرحم وزاد علي الويع ما قدرت انام على ظهري مول اتم اصيح اذا نمت على ظهري


شفتوا كيف النحاسه اللي فيني ... الكل يقول لي انها عين صابتني لانه كل اصابتي كانت بريولي واثرت على الحوض


هنا خلصنا جزئية الحمل وبني لقصة الولادة

قصة ولادتي اخيرا


انا معطيني موعد الولادة 10 / 1 / 2010 ... وللاسف طوفت موعد كان تاريخ كشخه خخخخخخ


ويوم 13 / 1 سرت العيادة عشان اتطمن على البيبي اشوف وزنه والماي واذا كان الرحم مفتوح


طبعا الدكتورة طمأنتني وقالت كل شي اوكي والرحم مسكر


رديت البيت وانا مكتئبه مليت من الثقل وويع الظهر وقلت النوم


وقلت بتمشى بحوي البيت شوي .. وانا امشي الساعة 5 ونص قبل ما يأذن المغرب بشوي ، ما اشوف الا الماي نزل علي .. قمت دخلت البيت وانا امشي والماي ينزل ... وعيالي مستغربين شو هذا


اتصلت بامي وخبرتها ... امي ساكنه بابوظبي وانا براس الخيمة .. امي قالت اسير للمستشفى احسن ، قمت اتصل بزوجي وياك ياخذني ...وودينا اليهال لبيت اهل ريلي يبيتون هناك وسرت بروحي للمستشفى


عاد زوجي قالي اتصل باهلي .. فقلت له اني اتصلت خلاص ... قام زعل ليش خبرتيهم قبلي ههههههه


عموما وصلنا المستشفى وقلت لهم ان الماي نزل ... فيلسوني على كرسي وودوني غرفة الولادة


فحصتني الدكتورة وقالت انه مفتوح 1.5 سم فبيودوني غرفة ما قبل الولادة ..


وزوجي سار معاي الغرفة .. وحطولي جهاز النبض وبعدين شالوه .. والممرضه قاعده تهدد زوجي انه لازم يطلع وما يبات هني ... عاد زوجي يستهبل يقول لها بينخش بالكبت خخخخخخخ


وكانت عندي تقلصات خفيفة كل 10 دقايق بس للاسف اختفت بعد ساعة


تخيلوا ما نمت طول الليل .. انا من النوع اللي كله حران .. فكن ميته من الحر وجسمي كله معرق وما رايمه اتنفس .. ويوم اخبرهم يقولون نحنا بردانين ... انزين انا شخصني فيكم انا بموت من الحر ... وفحصتني لقت الرحم مسكر .. قمت الاحباط


عموما ما ياني الويع لين اليوم الثاني وقرروا يحطون لي تحميله للطلق الصناعي تقريبا الساعة 1.30 الظهر


والحمد لله امي يت حقي ويلست معاي .. والعصر ياك ابوي ومعاه خواتي اليهال ونسوني وسولفوا معاي لي العشا ، ويابوا لي ماي ورد مع زعفران وتمر ... وكليت لي فطيرة تفاح بالقرفة مال ماكدونالدز خخخخ


وحطوا التحميل الثانية الساعة 6.30 المغرب وطول هذي الفترة ماشي تقلصات ..


وكان ايني ويع واقول لهم ياك الويع .. وارد اقو لهم لا طلع مغص عادي خخخخخخ ... وزوجي يقول شو هذا تقصين علينا .. اونه الولادة صعبة انا اشوفج تستهبلين خخخخخ


بعد صلاة العشا ساروا اخواني وتمت امي فديتها معاي وزوجي ... ومن ساروا ياني الويع كانه يتريا خواتي يسيرون عشان ما يشوفون فلم الرعب ويتعقدون خخخخخخخ


عموما الويع كان كل 10 دقايق وبعدها صار كل 5 دقايق وبعدها صار كل 3 دقايق ...


وفجاة سمعت صوت شي نقع .. كيس الجنين شكله انفجر من قوة التقلصات ونزل دم وماي بشكل كبير


بغيت اموت وزوجي يسولف يقول يالله اكيد تستهبلين مثل قبل خخخخ .. وشوي تي الدكتورة تفحص لقته مفتوح 4 سانتي بس


وانا خلاص بموت .. مب قادره اتنفس وميته حر .. وشوي يعطوني تحميله شرجية عشان اسير الحمام ..


كل صوب ويوم يحطون جهاز نبض الجنين ... اكره كان ودي اععقه .. تعرفون لازم الوحده تنام على ظهرها عشان يضبط الجهاز ... وانا ظهري يعورني .. تعرفون من الحوادث خخخ .. فاضطر انا على جنب .. تي الممرضه تتحرطم اقول لها ما اقدر ... تقول لازم عشان يشوف نبض البيبي ... اقولها خليه يزول انا ظهري يعورني هههههه


ويوم سرت الحمام افرغ .. كل شوي تدق الباب تقول خلصي .. وانا اقولها بعدني محد قالج تحطين التحميله الحين ... زين ما ضربتها ...


وامي وحليلها قاعده تقرا علي طول هذي الفترة وتمسح على ظهري ... وزوجي شكله خايف علي خاصه بعد ما شافني اتضارب مع اللمرضات ههههههه


انا بطبعي دوم استحي من الناس وما اقول اللي بخاطري بس عاد الممرضات نرفزوني


عموما نزلوني غرفة الولادة ... وامي ماسكتني لاني ما قادره امشي .. اما الويع صار من 3 دقائق الى الم مستمر ما ينقطع تخيلوا ما اقدر اتنفس ولا اتحرك ... وانهرت بغرفة تبديل الملابس ونمت على الارض ... الارضيه كانت بارده .. وكل شوي اللمرضات يدقون الباب يقولون خلصي وانا اتنافض وامي وحليلها تلبسني ...


حزتها اونه بنكت اقول لامي ما ابي اطلع ... الغرفة والارض باردة .. الجو حلو هني خخخخخخ


وحليلها امي مسكتني لي ما طلعت على السرير ... ونمت على جنب .. لانه ظهري يعورني بشكل فضيع وهم يهزبوني الا تنامين على ظهرج وانا اقولهم لا ما اقدر ... وينازعوني وانا اقول لا .. امي فديتها تقول حاولي .. قمت اصيح لها اقولها يعورني ما اقدر ... امي قالت عيل طيف بتربين جي تحملي شوي


كانت الساعه حزتها 10.30 بلليل ومسكت على عمري شوي ونمت على ظهري .. يا بنات ما تتصورون الويع ... انا بدون ولادة ما اقدر انام على ظهري كيف عيل مع الويع زاد الالم حسيت روحي بتطلع ومارايمه اتنفس .. تخيلوا اكسجين ما عطوني ..


عموما يوم نمت على ظهري حسيت اني بصارخ ... اقول لامي ابي اصارخ ما اقدر امسك عمري .. قلت مالي غير اتشهد .. وقمت اتشهد بصوت عالي .. والله ارتحت بس عاد شليت الدنيا بصوتي العالي هههههههه على قولت امي صايره مصرية تولول خخخخخخخخخ


المشكله عشان اربي لازم ارقع ريولي وانا ما اقدر بسس الطيحات .. وهم قاعدين يهزبوني اقولهم ما اقدر شو قاعد اقص عليكم ..


شوي الا واحس اني بدفع .. اقولهم بربي .. وما عطوني ويه ... وقمت ادفع بروحي واقولهم .. يوم شافوني لقوني خلاص ولادة .. بس المشكلة يوم ادفع احس بحرقة تحت فطلبت منهم يوسعون ، بس ما رضوا .. اقولهم كل عيالي وسعوا فيني لانه راسهم كبير ... ويالله تميت ادفع لي ما الله سهلي وربيت ويبت ولدي محمد


عاد من ربيت قمت ازاعق واقول الحمد لله الحمد لله مب مصدقه وحليلي


حظي كانت غرفة الولادة باردة ولا كنت بموت


وبعدها يت الدكتور تخيط من تحت ... تخيلوا شو قالت الدكتور ... الكل كان يحسبني اربي للمره الاول .. قالوا للدكتورة في بنت اول مره تربي وقاعده تتدلع .. تخيلوا انا تعبانة وبموت وهم يقولون اتدلع .. ويوم شافوا الملف انصدموا انها ثالث ولاده لي


والله لولا الم ظهري لكنت اتحملت .. انا يبت اثنين قبل بس ما حسيت بويع مثل جي


ومن شفت ولدي ضربته على مؤخرته عقاب له خخخخخخ لانه تعبني بحمله وولادته


ربيت بتاريخ 14 / 1 / 2010


وهذي قصة ولادتي الطويلة هههههههههه

الحمد لله على سلامتك
وربنا يجعله ولد صالح
بس انا حاسة ان دى قصة رعب مش قصة ولادة ههههههههههه
ربنا يرزق الجميع الولادة اليسيرة والذرية الصالحة

الحمد لله على سلامتك حبيبتي وربنى يخليلك عيالك وأهلك يا رب و الله المستشفيات اليومين دول صارت زي حديقت الحيوان مفيش رحمة ولى شفقة على المرضى والله مرة في ست راحت تولد لمسكينة مرضيوش يدخلوها عشان معندهاش فلوس مع إنو المشتشفى عمومي ولدت في باب المستشفى وماتت هي وإبنها وهما بيشوفو فيها ومرحموهاش أسفة طولت عليكي ألف مبروك حبيبتي

الله يوفقك جد ولادتك و حملك بخوفوا
خاصه انك وقعتي اكتر من مرة بالحمل
الله يخليلك اولادك

الله يخليلك اولادك يارب بس والله قصتك ديه كلها عذاب خوفتينى لانى باولد الشهر الجاى والحمد لله انك قومتى بالسلامه

ههههههه والله ضحكتيني طلعات ونزلات ومطبات ..

مرة ثانية اذا حملت لاتخبري حد .

قصـــة ممتعـــة

الف الف مبروك يتربى في عزك يارب

الله يخلية لك يارب العالمين

الحمدلله ع سلامتك انتي وابو حميد
موتيني ضحك طريقة سردك للقصه بتجنن
الله يباركلك في البيبي واخوانه يارب