السلام عليكم ورحمةالله وبركاته

انا محتاجة رايكم ومشورتكم للاني فعلا محتارة ومش عارفه اعمل ايه؟؟
انا عملت عمليتين حقن مجهري وربنا ما ارادش لسه...
اول عملتين عند د حسام زكي والعمليتين الاخيرتين عند د عمادالدين خليفه..وبصراحه انا بسكن في منطقه بعيده عن القا هره واسكندريه اقرب
وبصراحه انا متابعاكم من زمان اوي وكنت مشتركه في الملف ولما قرات عن موضوع التجلط ده عملت التحاليل اللي كتبتها ربي كريم(ربنا يكرمها ياارب)في موضوعها..بس قبل ما اعمل التحاليل رحت لدكتورة امراض دم(رئيسة قسم امراض الدم بحامعة الاسكندريه) علشان لو طلع التحليل في مشكله ابقى اتابع معاها
.بصراحه الصدمة انها ما اقتعتش بكلامي نهائيا ورفضت كمان اني اعمل التحاليل على الرغم اني معاي التحاليل مسبقا بصراحه مسمعتش الكلام وعملت التحاليل وطلعت التحاليل فيها مشكله في جين التجلط وبروتينc ومش عارفه اروح فين ..
لو رجعت للدكتوره بصراحه انا حاسه انها مش هتفدني في حاجه لانها اصلا مش مقتنع بالموضوع كله..
وانا قلت مش مشكله احجز عند هادي جبران(رغم المسافه )بس بصراحه بيشتغل متاخر واول معاد في 4 واحد فكده مش هعرف اروحله..
وعرضت الموضوع على الدكتور عماد الدين خليفه بصراحه قالي ميعرفش حاجه في الموضوع ده...
انا عايزه اعرف هو حد يعرف دكتور يعالج المسأله ده في اسكندريه..
انا مقدرش اروح لحسام تاني لاني اسعاره غاليه عليه دلوقتي بس لو الدكتور اسماعيل ابو الفتوح بيعالج الحالات ده ممكن اروحله..
انا عرفه رغييت كتيير بس انا عارفه انكم مش هتخذلوني ان شاء الله وتقدرو تقولولي اعمل ايه؟؟؟

ربنا يكرمك يا حبيبتي
بس انا من القاهره و مش عارفه ادلك علي مين بالظبط
وان شاء الله البنات تدلك علي دكتور كويس في الاسكندريه

ربنا يكرمك ياااارب يا ميويا وربنا يقر عينك برؤية اولادك ياارب
متشكرة على اهتمامك..وانا منتظرة البنات

حبيبتي سجلي هنا في الموقع ده وان شاء الله الدكتوره هناك تدلك على موضوع جين التجلط ده وما شاء الله ترد عليكي على طول وبالتفصيل عيادة النسائية والعقم - ::ARABW-PEARL FORUM::

ربنا يرزقك يااااااااااااااارب بالذرية الصالحة عاجلا غير اجلا

بصى المهم انك عملتى التحليل واكتشفتى المشكلة وان شاءالله العملية الجاية تكون ناجخة
هو علاجها بسيط وهو حسب ما ميرو بتقول حقن للسيولة
يعنى ممكن تتابعى مع عماد خليفة مدام اقرب لك
وتقوليله يزودلك جرعه حقن السيولة بدل ما يكتبلك بيبى اسبرين عادى


وان شاءالله المرة الجاية ربنا يرزقك بتوائم حلوين يعوضك تعبك اللى فات

جزاك الله خيرا د ايمي
ومتشكره خااالص يا ام توته...ربنا يباركلك في توته انا متابعاك من من ايام الملف الاول ومنين ما تكتبي موضوع بقعد اقراه ..وراكي وراكي ياملك.
بس انا مش عارفه اخد ابر السيوله امتى وهي الهيبارين بس ولا الكلكسان و من اول الترجيع ولا بعد الحمل؟؟
تانيا انا مش عارفه امتى بياخدو الفوليك اسيد بجرعه عاليه ومعاه جاسبرين؟؟
ياريت ميرو تتدخل وتقولي اعمل ايه؟

انا بردوا زييك الدكتور مش عايزنى اعمل التحليل ده رغم انى مريت بتجربتين اجهاض ....اما اشوف الواحد حيعمل ايه الله يعينا...ويكرمك حبيبتى

حبيبتى اكيد طبعا الموضوع ده محتاج علاج ولازم جرعة العلاج اللى يحددها الدكتور بتاع امراض الدم
انا فى اخر اسقاط كنت متابعة مع دكتور ممتاز وهو دكتور هشام العنانى صاحب موقع خصوبة وقلى ان معظم اطباء النسا مش بيكون عندهم فكرة عن الموضوع ده وحولنى على دكتور هادى جبران وبالرغم ان الحجز كان عن طريق الدكتور هشام الا ان اخدت ميعاد بعد 3 شهور من الحجز وهو عنده عيادتين عيادة الصبح وعيادة بالليل وعيادة الصبح فى المهندسين وهو اللى قرر لى جرعة الكلكسان والاسبرين بعد ما شاف نتيجة التحليل عشان كدة اوعى تاخدى علاج من نفسك او تخلى دكتور نسا هو اللى يقررلك العلاج لانه مش خبير وده كلام من دكتور نسا موثوق قال ان كل واحد وليه تخصصه
مع تمنياتى لك بالذرية الصالحة فى القريب العاجل ان شاء الله

جزاك الله خيرا يا يمنى وبصراحه من راي انك تعمليه حتى لو معترض لان بردك دكتوري اعترض وحتى دكتوره امراض الدم كانت ردت فعلها غريبه..ربنا يكرمك ياارب
هوبا..طب ما انا رحت لدكتورة امراض الدم وكان ردها غريب قبل ما اعمل التحليل وبصراحة خايفه اروح لها متقدرش تفيدني..وانا كنت عايزه دكتور امرض دم في اسكندريه كويس..اصل هادي جبران بعيد عني جدا ..تانيا انا ملقتش ليه تلفون غير عيادته اللي بالليل ممكن تبعتي التلفون التاني..؟؟
وياريت حد يقولي على دكتور في اسكندرية اذا امكن...

راجبة رضا الله
اولا ربنا يكرمك المرة الجاية ان شاء الله

بصي انا عايزة اسألك اولا علي د حسام زكي علشان انا بتعامل معاه دلوقتي ولسة خارجة من تجربة حقن مجهري والحمد لله علي كل حال محصلش نصيب والمفروض اني مكملة معاه

انا اول ما رحتله طلب مني تحاليل التجلط ده وطلع فعلا في النتيجة ان عندي نسبة تكون جلطات وقالي اني لازم اخد فوليك اسد 5 مج بنسبة عالية 3 مرات في اليوم + الجاسبرين مرة في اليوم + حقن الكلكسان اللي اخدها بعد ما بدأت التنشيط

اللي انا عايزة اسألك عليه ازاي دكتور حسام مش اهتم بالموضوع ده ، دي اول حاجة دايما بيعملها وخصوصا انك عملته معاه محاولتين

ياريت تحكيلي بالتفصيل عمل معاكي ايه وخصوصا بعد فشل المحاولة الأولي علشان انا في الوضع ده دلوقتي

وربنا يوفقك للي فيه الخير يا رب