السلام عليكم ورحمة الله وبركاته
أولا كل سنة و إنتو طيبين و تنعاد عليكم الأيام بالخير يا رب
كلكم وحشتوني جدا جدا
كنت في أجازة في مصر 3 شهور و رجعت في نص رمضان
يمكن في منكم يعرف إني كنت ناوية أروح مركز جنين و أعمل عملية حقن مجهري
و الحقيقة لما شوفت موضوع ربي كريم ربنا يعوض عليها و يرزقها عن قريب يا رب
قررت إني أبقى أحكي تجربتي أنا كمان
أولا أنا لما رحت المركز كنت مقررة بنسبة كبيرة إني أعمل العملية
أول لما رحت مليت إستمارة علشان أفتح ملف
و كتبت فيه كل التاريخ المرضي بتاعي
و طبعا بعد إنتظار حوالي 7 ساعات دخلت للدكتور
إتناقش معايا في اللي مكتوب في الملف و قالي مبدئيا نحدد إيه سبب تأخر الحمل و من بعده الإجهاض
عملي سونار و قال إن الحمد لله بطانة الرحم و تجويف الرحم كويسين و مفيهومش مشاكل لكن المبايض هي اللي متكيسة و حالتها مش أد كده
و طلب مني تحاليل و قالي علشان حدد سبب التكيس لإنه بيكون بسبب واحد من التلاتة إما البرولاكتين أو الغدة الدرقية أو الأنسولين
و أنا مشكلتي كانت في الأنسولين و قالي إن ده بيسبب التأخير و لو حصل الحمل بيحصل إجهاض
و طبعا طلب تحليل جوزي و بعدين نقعد قعدة تانية
و لما جوزي نزل مصر عمل التحليل
و برضه بعد إنتظار 5 ساعات دخلنا
و قال إن الحمد لله نتيجة جوزي كويسة
و قالي إني أحاول أخس بأكبر قدر ممكن و أخد جلوكوفاج و أعيد التحاليل تاني بعد شهر
و سألته مش محتاجة منظار قال هيقلنا إيه طالما إنك حملتي معنى كده إن الأنابيب مفيهاش مشاكل
طيب و تحاليل الأجسام المضادة قال لو كانت موجودة كانت هتكون موجودة من الأول و مكنتيش خلفتي
قولتله و بالنسبة لعملية الحقن أعملها دلوقتي
قالي لو كان سنك 36 أو أكبر كنت قلتلك متستنيش بس إنتي لسة عندك 30 سنة و مفيش سبب كبير يمنع الحمل و أنا شايف إنك تدي نفسك فصة السنة دي كمان مع الخسسان إن شاء الله يكون في نتيجة و لو لا قدر الله مفيش نتجه للحقن
هي دي كل تجربتي مع المركز لأني بعدكده سافرت و مكملتش متابعة
واللي أنا شفته إن الدكتور هادي جدا و متأني و بصراحة فاهم أوي و بيشتغل على أساس و كمان بيتقبل أي أسئلة على الرغم من الزحمة الرهيبة اللي عنده
و كمان أدوني إهتمام و يتصلو بيا يقولولي على نتايج التحاليل و أي إستفسار كانو المنسقات مش بيتأخرو عليا خالص و بقعد معاهم زي ما أنا عاوزةمع إني معملتش عملية و لا حاجة يعني مش بيهتمو بس باللي بيعمل عملية و يدفع فلوس كتير زي ما أنا كنت متخيلة
أما بالنسبة للسلبيات فالحاجة الوحيدة اللي شفتها هي الزحمة الرهيبة و الإنتظار الطويل جدا
أخر حاجة عاوزة أقولها لكم إني عملت حجامة قبل رمضان
و كمان دلوقتي باخد فيتامينات من جي إن سي إسمها ألترا أرجنين يا رب تيجي بفايدة
و طلبي منكم في الأخر إنكم تدعو لبنتي تكون من الصالحات يا رب و إن ربنا يرزقنا بأخ و لا أخت ليها و إني يا رب يا رب أخس
رد مع الاستدلال
كتبت بواسطة rasha tarek
الروابط المفضلة