بنات وأمهات السلام عليكم .. انا اترددت أكتب الموضوع بس حسمت امري أني لازم أكتبه لأني فعلا محتاجة لدعائكن
أنا قبل الزواج كنت آخد دواء لمعالجة حب الشباب اسمه ريتان .. ومكتوب بالنشرة تبع الدواء أنه لازم يتوقف قبل الحمل بشهر لأنه بيعمل تشوه للجنين .. وخبرت زوجي .. واتأكدت من الطبيب وقالي انه حضر مؤتمر في ألمانيا عرف من خلاله أنهن ممكن يخفضوا مدة منع استعمال الدواء لمدة أسبوعين مو شهر .. والدكتور معروف وشاطر .. ومع ذلك قررنا أنا وزوجي زيادة في الاحتياط نطول المدة وخليناها 3 شهور وبعد التلات شهور تركنا حالنا وصار حمل والحمد لله .. بعد ما صار الحمل خبرتني أختي أنه واحدة بتعرفها أخدت نفس الدواء قبل عرسها والدكتور قالها لازم ما يصير حمل غير بعد 6 شهور من إيقاف الدواء .. وقتها كتير انهرت وقضيت الشهور الأولى بحالة نفسية متعبة وكل ما أشغل حالي وغير جو أرجع اتذكر وتخنقني العبرة مع أن كلام هالدكتور ما لاقيت إله أساس بس كتير خفت عالبيبي وحسيت بتأنيب ضمير قوي .. مع أني أخدت بالأسباب وأخدت مدة أمان أكتر من اللي مذكورة بالنشرة واللي قالي عليها الدكتور .. ومن وقتها والشيطان بيوسوسلي .. وعم فكر كتير بسلامة البيبي وأيام لما باختلي بنفسي ببكي وبادعي من جوا قلبي أنه ربي يطمني عليه يا رب.. وكتير باشفق عليه هالبيبي الصغير وبدعي الله مايصيبه أي مكروه ولو صغير لأنه ما إله ذنب .. كتييييييييير شعور صعب أكيد بتتخيلوا ولو جزء منه .. المهم رجائي أنكن تدعوا للبيبي أنه يكون سليم معافى تام الخلق والخلقة وحسنهما .. ياريت أخواتي ما تنسوا تدعولي
وبذكركن بحديث الرسول صلى الله عليه وآله وسلم
دعاء المرء المسلم مستجاب لأخيه بظهر الغيب عند راسه ملك موكل به كلما دعا لأخيه بخير قال الملك:آمين ولك مثل ذلك"
أنا محسنة الظن برب العالمين .. لكن ما عم أقدر شيل القلق من تفكيري وأنا مؤمنة بانه دعاء المؤمن للمؤمن مستجاب .. ولهيك كتبت الموضوع
وطلبي أن كل واحدة تقرأ الموضوع ما تنسى البيبي من دعوة صغيرة .. وما تنساه من دعوة كل ما يخطرلها وبإذن الله رب العالمين رح يرزقها المثل
والله يطمن كل حامل على جنينها ويقر عينها به سليم معافى تام الخلق والخلق
اللهم أقر عيني برؤيته تام وحسن الخلق والخلق من غير زيادة ولا نقصان
الروابط المفضلة