السلام عليكم
الحمد لله ولدت يوم 31-7 -2008 كان اخر يوم بالتاسع قبلها بيوم رحت الدكتورة موعد عادي وحكتلي انه الرحم لازم يكون اكبر روحي اعملي صورة مشان نتاكد انه المية مش ناقصة رحت على طول حكولي المية ناقصة كتير لازم تضلي عنا وتولدي، عملولي فحص شافو انه ما في توسع بالمرة وانه رح يحطولي دوا مشان يساعد رجعو علي بعد شوي لاقو فيه توسع 2.5 سم الحمد لله ما احتجت الدوا لانه بوجع الفحص الداخلي حطولي طلق صناعي وسالوني بدي الابرة تاعت الضهر حكيت اه حكولي لما ما تتحملي الوجع احكيلنا وكان الساعة خمسة ونص العصر بدا الطلق خفيف اتحملته ما كان بوجع بعدها صارو يزيدولي ياه شوي شوي وبدو الطلقات حاميات كتيييير وورا بعض وصرت ارجع وما تحملت طلبت الابرة عطوني ياها بعد ساعة تقريبا مش متذكرة والحمد لله ما حسيت فيها وراااحة الحمد لله وكان التوسع وقتها 6 سم بعد الابرة صار 8 وبسرعة صار 10 الحمد لله الساعة 5 بلشت ادفع ساعتين كاملات ما حسيت وجع بس كان ضغط كتير وطلع البيبي الحمد لله بس جرحني مشان كان مش فارد ايديه وقطبوني كتير ، بس والله الولادة تعب شو ما كانت يعني اولها كانت الحركة كتييير صعبة من القطب بس الحمد لله هلا احسن بكتير والواحد بحكي مش رح اعيدها لانه تعب والله
اسفة عالاطالة بس كنت بحب اقرا قصص الولادة بالتفصيل قبل ما اولد فكتبت قصتي هيك وان شاء الله يا رب عقبال عند الجمييييع يقومو بالسلامة والي حابين يحملو ان شاء الله قريبا
والسلام عليكم
رد مع الاستدلال
الروابط المفضلة