شوية اسئلة ياريت تشاركوا

**rony-79** · 22-05-2008, 03:20 AM

هاى ازيكم؟؟

انا عندى شوية استفسارات عشان انا قربت خلاص اولد فضاللى اسبوع كدة ادعواللى

انا هولد قيصرى فياترى اقول للدكتور يدينى بنج كلى ولا نصفى؟؟ انهى الاحسن واية مخاطر دة ودة؟

وياترى بعد الولادة ممكن احط حزام البطن ولا مش ينفع؟؟

وياترى البييى يلبس اية وخصوصا ف مصر هنا حر اوى ؟؟

وياترى الحامل لازم تشرب لبن حتى وهى ف التاسع؟؟؟ اظن ان عضم الجنين اتكون خلاص ولا اية؟ظ

ياريت يا جماعة تفدوينى وثانكس ليكم

**امورة مصر** · 22-05-2008, 03:34 AM

السلام عليكم يا روني اولا ربنا يقومك بالسلامه يا رب و تشوفي ابنك او بنتك بين ايدكي في اتم الصحه يا رب
بصراحه انا عارفه اجابة سؤالين بس من واقع تجارب الناس اللى حواليا لان دا اول حمل ليا
اولا انا هولد قيصرى فياترى اقول للدكتور يدينى بنج كلى ولا نصفى؟؟ انهى الاحسن واية مخاطر دة ودة؟

بصي حبيبتي هو الاحسن البنج الكلي لاني اسمع ان البنج النصفي اللى هي ابرة الضهر بتاثر بعد كده و بتتعب بس دا كمام بيحددو معاكي الدكتور حسب حالتك بس انتي قوليلو انك مش عاوزه ابرة الضهر
ثانيا وياترى بعد الولادة ممكن احط حزام البطن ولا مش ينفع؟؟

متهيالى مينفعش تلبسي حزام بطن على طول بعد الولاده علشان انتي هتولدي قيصري فلازم ترتاحي فتره الاول و بعد كده يا ستي متخافيش ان شاء الله يرجه جسمك زى الاول دا بيبقا خوفنا كلنا
اما بالنسبه للبس البيبي في موضوع منزلاه صديقتنا ازميرالدا هحطلك الرابط بتاعه علشان هى كانت والده فى الصيف و كانت في مصر برضوهي دي الروابط
تجهيزات البيبى المشاركة من الجميع (فرصة للمصريات) الجزء التانى
تجهيزات البيبى المشاركة من الجميع (فرصة للمصريات)
يارب اكون افدتك

**دودو كريم** · 22-05-2008, 03:37 AM

ربنا يقومك بالسلامه يا رب

ومبروك مقدما

بصى يا ستى

ياترى اقول للدكتور يدينى بنج كلى ولا نصفى؟؟ انهى الاحسن واية مخاطر دة ودة؟

اعتقد ان موضوع البنج ده يرجع للدكتور يعنى مش بأختيارنا ولو فى اختيار طبعا بنج كلى لان دى عمليه فتح بطن يعنى مش سهله اكيد وطبعا ده تفادى لاى الم ممكن تتعرضى له

وياترى بعد الولادة ممكن احط حزام البطن ولا مش ينفع؟؟

بتحطى حزام البطن بس مش قبل فك السلك يعنى مش قبل اسبوع او 10 ايام وطبعا الافضل انك تسألى الدكتور هو ادرى مننا

وياترى البييى يلبس اية وخصوصا ف مصر هنا حر اوى ؟؟

لبسى البيبى اى حاجة قطن وبكم يعنى سالوبيت او فى جلاليب للاطفال حديثى الولاده بس اهم حاجة بكم وده طبعا بخلاف الطقم الداخلى القطن ....خلى بالك البيبى لسه ضعيف مهما كان الجو حر اوعى تنسى انه نونو اوعى تخففى له اوى

وياترى الحامل لازم تشرب لبن حتى وهى ف التاسع؟؟؟ اظن ان عضم الجنين اتكون خلاص ولا اية؟

طبعا لازم تستمرى على الالبان وعلى نفس نظامك فى الاكل لاخر يوم فى الحمل

يا رب اكون قدرت افيدك حبيبتى وربنا معاكى وتولدى وتقومى بالسلامه

**rony-79** · 22-05-2008, 04:14 AM

ميرسى ليكم بجد نورتواللى التويبك

بس انا بسمع ان البينج الكلى لة مخاطر وكدة واللة اعلم بقة

كمان يا بنات انا ناوية البس البيييى اول مينزل يعنى جلابية اطفال مع فانلة حمالات وطبعا البارمبيز وطبعا الكوفيرتة تمام كدة ولا اية؟؟

thamxxxxxxx alllllllllllll

**om ganna** · 22-05-2008, 05:04 AM

البنات افادوكى طبعا..لكن لى تجربة مثلك وحبيت افيدك
انا ولدت قيصرى والبنج كان كلى واعتقد انة افضل فلا تشعرى بشئ وايضا ممكن خوفك وقلقك يسبب توتر للدكتور اثناء اجراء العملية
اما بالنسبة لربط البطن انا ما ربطش بطنى لكن الدكتورة اعتطنى تمارين ساعدتنى على تخفيف الالم بعد الولادة وايضا عادت بطنى كما هىوكمان زال الالم من ظهرى وده افضل
وعن لبس البيبى انا ودلت فى اخر شهر 4وكانت حرارة الجو اقل من هزة الايام والدكتورة قالتلى لبسى جنة فانلة حملات وجلابية حديثى الولادة وطبعا بنطلون ثم لفيه فى الكبرته وطبعا ما تنسيش القماط مهم جدا

شرب اللبن مهم جدا لانك سوف تنتقلى من الحمل الى الرضاعه وهى تحتاج تغزيه اكتر وكل البيبىما يكبر احتياجة للغزاء يزيد وطبعا ياخده منك وايضا ممكن تتناولى كالسيوم عندما يبدا مرحلة التسنين ان شاء الله

ربى يتم لك على خير ويقر عينك به ويرزق كل مشتاق,,

***YSmsma*** · 22-05-2008, 06:08 AM

انا البنج النصفى بهدلنى وكان هيموتنى وجبلى صداع 6 ايام كاثر جانبى له
الافضل واللى الكل بيقوله انه افضل هو البنج الكلى
وفى الاول والاخر ربنا بيقدر الخير وان شاء الله تقومى بالسلامه
ولو ولدتى قيصرى لا قدر الله الا الخير انسى حزام البطن