انا قلت اقول تجربتي في تاخر الحمل...يمكن تدي أمل لاي حد اتاخر في الحمل........بس ياريت تدعولي ان ربنا يشفي بنتى ويبارك في اولادي....
انا تزوجت من عام 2006.....وطبعا زي اي عروسة بتبقى مشغوله من اول الجواز بالحمل.....قررت بعد 4 شهور ان ادور على موضوع الخلفه....وابتديت بجوزي الاول ولما حلل طلعت النتيجه كويسه حمدت ربنا وفضلت بعدها حوالي 3 شهور من غير ما اكشف انا على امل ان ربنا يمن عليه بالحمل.....ولما محصلش حمل قررت ابتدي المشوار....وحللت الاول تحاليل هرمونات..وطلع التبويض ضعيف..فاخدت حبوب منشطه تلات شهور بس بردك محصلش حمل....فغيرت الدكتور وروحت لدكتور تاني....فقالي راي تعملي اشعه الصبغه افضل....وكانت البداااايه....بعد الصبغه الدكتور قالي...ان اللي ظاهر في الصبغه انبوبه واحده بس وده معناه واحد من الاحتمالين.....
اما حاجز في الرحم....وده اللي نتمناه...وسكت..قلتله ولو مكنش حاجز يبقى ايه؟؟؟؟مرضاش يقول بس انا اصريت عليه..قالي..يبقى معناه رحم وحيد القرن....ولاني مكنتش فاهمه ده معناه ايه..متاثرتش اووي بالرد.....ولما شرحلي المعني....ندمت اشد الندم اني عرفت.....وقرر عمل منظار بطن لتحديد الحاله....ومش عايزه اقولكم قضيت الليل بطوله شكله ايه؟؟؟
ولما عملت المنظار طلعت النتيجه اسوا مما توقع....
قالي الرحم وحيد القرن فعلا...يعني نصف رحم وانبوبه واحده ومبيض واحد...بس مش بس كده...قالي الاسوا اني في رحم طفيلي لازق في الرحم الاصلي وده كمان واخد من تجويف الرحم وكمان الانبوبه الموجوده كفاءتها بس 70%....ومعنى ده ولاده مبكره كم مره لغيت ما الرحم يحصلو تمدد يوازي حجم الرحم الطبيعي مع احتماليه بردك ولاده مبكره بسبب الرحم الطفيلي...ومنعرفش للاسف نشيله لان في جدار مشترك بين الرحمين.....
مهما اقول واوصف وقع الكلام في نفسي مش هقدر اقول..شكل الليالي والايام اللي عشتها...والله اني متهيالي اني كنت هموت من كتر البكاء ووجع القلب...وذهبت الى الدكتوره مره اخرى وسالته طيب نبتدي منين؟؟؟

قالي ناخد منشطات ابر وبعد ما يحصل حمل ربنا يفرجها ونشوفو ازاي نحافظ عليه جوه.....واستعنت بالله ودعوت الله ان لا يخيب رجائي فيه....وانه وحده الواهب....وفعلا اخدت منشطات ابر وربنا اكرمنى وحملت...وكنت في اشد الفرح والسعاده مع ذلك كنت خايفه من تبعات الحمل....بس قلت اتوكل على الله ولما روحت اكشف لاول مره كان نفسي اشوف كيس الحمل...كنت اموت واشوفه جو بطنى...بس كانت المفاجاه....ان الحمل خارج الرحم....ايوه خارج الرحم وده معناه الانبوبه الوحيده اللي املكها راحت... وشلت الانبوبه وبكده يكون الحمل الطبيعي اصبح مستحيلا.....ياااااااااااااااااااااااااه والله ايام وليالي بعدها قضيتها بين بكاء وتحسر ووجع في القلب مكنتش قادره اصدق ان خلاااص مش ممكن احمل طبيعي.....خدت تلات شهور لغيت ما استوعبت الوضع وكنت بقول في نفسي يعني مفيش حمل طبيعي وكمان حقن وكمان استمراريته لا تتجاوز 20% .....بس بردك قررت ابتدي الحقن وليقضي الله امرا كان مفعولا......

عملت 6 عمليات حقن مجهري كلها باءت بالفشل.....مش بس كده الا ان في المره الخامسه في الحقن حملت ولم تسعني الدنيا فرحا...الا ان المفاجاه كانت حمل خارج الرحم في اول سم من الانبوبه المستاصله وكنت اول حاله يراها الدكتور حمل خارج الرحم من غير انبوبه كامله.....بس تبقى مشيئه الله...
بعد كل هذه العمليات كان مر على زواجي اربع سنين ونصف...كنت زهقت ويأست وكرهت حياتي كلها..مفيش لي هدف غير اني اجمع فلوس علشان اعمل عمليات واستنى النتيجه....ملييييييت من حياتي فقررت اغيرها...واقنعت نفسي سالفا لن اموووت بلا اطفال ....بل وعرضت على زوجي ان كان له غايه في الاطفال فلن اعارض زواجه ولن اتركه وله ان يتزوج....كل من حولي اتهمنى باني اتهبلت مع العلم لم يكن احد يعلم حالتي غير امي وابي فقط......ولكن الحمد الله زوجي لم يكن له غايه في الذريه الا منى وانه سيرضى بقضاء الله اي ما كان....

الحمد الله فعلا غيرنا حياتنا وتركنا العمليات....حفظنا ما يقرب نصف القران والحمد الله اقمنا الليل واتفسحنا وقررت ان اكمل دراستي واعمل ما جستير وكذلك زوجي.....وقررنا ان نحج في هذا العام ولكن لم يشا الله ان تاتي اسمائنا وسبحان الله الدوره كان حصل فيها مشكله لاني كنت اخذت حبوب لمنع نزولها وذهبت للدكتور لمعرفه السبب...والحمد مكنتش حاجه جامده بس هو قالي ايه رايك نرجع المجمد اللي موجود عندنا ما دام مش هتسافري الحج...بصراحه تردد كثييييييييييييييرا بجد كنت كرهت العمليات والانتظار والنتائج بس جوزي قالي نجرب المره ده....وربنا اراد....

وشاء المولى ان احمل حمل داخل الرحم لاول مرة في حياتي واري كيس الحمل باحشائي.....بس مسلسل الولاده المبكره لم يغب عنا يوما....ومهما اقول مش هقدر اقول الكلام اللي قالو الدكتور عن استحالة استمرارية الحمل اول مره بكيس واحد فمابالك بتوام....وبقى قرار اختزال احد الاجنه وبقاء الاخر على امل ان يكمل الحمل بجنين واحد في رحمي واحترت كثيرا وصليت استخاره واخذت القرار اني لن اختزل احد الاجنه...لاني كنت دعوت الله ايام ارجاع الاجنه ان يبقى في رحمي من الاجنه ما هو اصلح لها....معظم الدكاتره اجمعو ان استمراريه حملي ضعيييييييييييييفه جدااا نظرا لوضع الرحم...والله ما ياست قط...وكنت اقوم الليل وانا حامل وادعو الله ان لا يفجعني في حملي ابدا فهذا فوق ما اطيق....قالي الدكتور لو وصلتي للسابع يبقى ربنا كرمك اخر كرم واكيد هتولدي في السابع....وعندما وصلت السابع اتاني طلق مبكر واعطاني الدكتور ورقه للمستشفى احتياطي.....وكل زياره يقولي لو جيت الاسبوع الجاي ومولدتيش ابقى تعالي...وبفضل من الله وكرمه ورحمت وصلت الشهر التاسع وولدت....ورزقني الله بانس وحبيبه..........
والدكتور يومها قالي كرم ربنا عليكي ملوووووووش حدود.....

عايزه اقول لكل واحده متفقدش الامل مهما قال الدكاتره...فربك وحده الرزاق الرحيم....قربي الى الله هو ما صبرني على ابتلائه.....وهو ما اكرمنى بانس وحبيبه.....

متنسوش الاستغفار والصدقه وقيام الليل فكلها بركه وات تدعو لاخواتي في ملف العمليات ان يكرمهم ويكرم كل من اراد من بنات المسلمين.....ورجائي ان تدعو الله ان يبارك فيهم ويشفي بنتى شفاء لا يغادر سقما

بسم الله ما شاء الله لا قوة الا بالله
ربنا كريم وعطائه ماله حدود
اهم شئ الصبر
الله يرزقنا الصبر والذرية الصالحة ياااااااااااارب
ربنا يبارك لك في اولادك ياااااااااااااااارب

يا الله تأثرت و دمعت عيني لقصتك
كرم ربنا قعلا ليس له حدو" ولا تقنطوا من رحمة الله"
بس ما شاءالله عليكي كنتي مثابرة و ما ياستي و خليتي ثقتك في الله كبيرة
اللهم بارك لها في أولادها و زوجها و احفظهم

ماشاء الله لا قوة الا بالله
سبحان الله فعلا ربنا كريم سبحانه
احنا اللي بنتعجل
ربي يبارك لك في اولادك يارب ويرزقك برهم
شكرا جدا على عرضك تجربتك للافادة وتصبير المشتاقات
ربي يجعله بميزان حسناتك

بسم الله ما شاء الله لا قوة الا بالله

سبحان الله والحمد لله

ما شالله والله فرحتلك من كل قلبي رب يجعل اولادك من الصالحين وحفظة كتابه الكريم يارب

الحمد لله حمدا طيبا مباركا كما ينبغي لجلال وجهه وعظيم سلطانه

الله يبارك لك في اولادك ويزيدك من نعيمه

بسم الله ماشاء الله و لا حول و لا قوة الا بالله
و الله يا اختي تاثرت كثير بقصتك و دمعت عيوني مما في قصتك من عرض لرحمة ربنا الواسعة الي ما الها حدود و من عدم قنوطك من رحمة ربنا و اصرارك و عزيمتك و قبل كل شيء ايمانك بالواحد القادر الذي امره بين الكاف و النون
سبحانك ربي ما اكرمك اسال الله ان يبارك لك في اولادكو ان يشفيهمو يحفظهم الك و ترينهم من حفظة كتابك و الحاملين للواء الحق
و اسال الله ان يرزقني باخ لبنتي و يرزق كل مشتهية الحمل انه و لي ذلك و القادر عليه

لنعلم ان الله رحيم بعباده

كتابتك للقصة ولتجربتك في تاخر الحمل ومعاناتك خلال تلك الفترة

رائعة وتظهر مدى قوة ايمانك بالله ماشاء الله

ثبتك الله وكتب اجرك واسعدك في الدارين .

سبحان الله الرحمن الرحيم واسع الكرم
مافي شي صعب على رب العالمين
الله يحفظلك اولادك و تفرحي قيهم