اهلا اخواتى الاعزاء اقدم لكم اليوم الديك الرومى او الحبش او التركى كلها اسماء لنفس الشىء واقدمه باحدى الطرق من الطرق المتنوعه لطهى الديك الرومى
هذا هو الديك الرومى وكان وزنه 3 كليو و 600 جرام صغير نظرا لاسرتى الصغيره
طبعا الديك نقعتو الاول فى ملح وليمون وغسلته مره اخرى بالدقيق
بعد كده عملت الخلطه دى
عباره عن بصل وثوم وجنزبيل طازه وفرمتو فرم خشن مش ناعم و ضفت عليه الملح والفلفل وبردقوش وبهارات مشكله ومسحوق قرنفل وحبهان ولورا وخل
ودعكت الديك من جوه من كل الاتجاهات وعملت شقوق فى الديك بالشكل
والشقوق دى عملتها من جانبى الصدر من الاتجاهين ومن أعلى الصدر كمان وحشيت الديك بالخلطه اللى عملتها والشقوق دى فى رائى افضل من انى اشيل جلد الصدر واحشى تحته لاكثر من سبب لو فصلت الجلد عن الديك بعد السوا الجلده هتكش ووتراجع لورا وهتظهر لى لحم الديك والسبب التانى ان كده التتبيله هتبقى اعمق فى داخل اللحم نفسه
وكده انا تبلت الديك كويس ودعكته بالتتبيله
تركت الديك فى الثلاجه طول الليل وهو بالشكل ده مقلوب عشان ادى فرصه للتبيله انها تتغلغل فى منطقه الصدر اللى هى انشف منطقه فى الديك وبتبقى محتاجه للطعم اكثر من اى منطقه
فى الصباح طلعت الديك طبعا وازلت من الشقوق ومن القلب كل الحشوه اللى انا حشيتو بيها واللى كنت فرماها فرم خشن لسهوله ازالتها
بعد ماازلت التتبيله من كل جزء فى الديك
استعملت قوالب الزبده الصغيره جدا ووضعت فى الشقوق من اعلى الصدر واسفله قطع الزبده وهى متماسكه ودى مهمه جدا عشان تعمل على تطريه لحم الصدر
بعد كده مسكت الديك وربطتو بشده بالشكل ده عشان بعد الاستوائ يحافظ على شكله ورجله متريحش وتفتح
بعد كده
سيحت قطعه زبده كبيره ووضعت فيها معلقه بهار مشكله ورشه ملح وبابريكيا بالشكل ده
وادهن بيها الديك الرومى كويس
والجزره دى خدعتى ههههههههه بحطها بالشكل ده عشان امنع التصاق الفويل فى جلد الديك الرومى ويبوظ لى شكله
ودى الصنيه اللى سويت فيها الديك حطيبت فيها الجزر والطماطم والبصل سليم والبطاطس مقطعه سميك جدا عشان الخضار ميتهريش لان الديك بياخد سوا ورشيت عليهم رشه فلفل وبهار وورق لورا وحبهان و2كوب ماء
وده الديك بعد ما اخد وضعه
وده بعد مالفيتو بالفويل
وضعت الديك فى فرن ساخن جدا جدا وكنت مولعه الفرن قبلها بربع ساعه والديك اخد حوالى ساعتين ونصف لحد ماستوى
وهنا الديك استوى لكن لسه متحمرش
وفى المرحله دى رفعت الفويل عن الديك واخذت من الصوص اللى تحت ورشيته على الديك من كل الاتجاهات وتركته فى الفرن بدون الفويل حوالى ربع ساعه لحد ماتحمر تماما وده الشكل النهائى
طبعا انا بعد كده شلت الخيط بمنتهى السهوله عند التقديم
الخضار اللى تحت الديك انا مكنتش عملاه للاكل كنت عملاه تحت الديك حمايه ليه ويدى طعم لكن الحقيقه انه ماشاء الله اتاكل كله
وارجو يكون عجبكم
ودعواتكم لى
الروابط المفضلة