*وصفات مصوره *كرشه وفشه وممبار ولحمه رأس كله كله من مطبخى ادخلوا بسرعه
السلام عليكم ورحمه الله وبركاته
ازيكم يا اجمل واشطر سيدات
اكلتنا انهارده
احم احم كله يوسع
اكله مصريه شعبيه
او بالاصح كانت شعبيه دلوقتى
بقت غاليه مش رخيصه
ههههههه ما علينا
وبما اننى مليش فى الاكله ده
بس جوزى بيحبها
اطله خالف تعرف مش بياكل
المحشى وبياكل الكرشه
والفشه والممبار ولحمه الرأس
هههههههه متتخضوش
هى ده اكلتنا انهارده
نستعين على الشقى بالله
هههههههه اه كله يشمر ايده
ويستعد هههههههه
الاول اهم حاجه فى الاكله ده
التنظيف ثم التنظيف ثم التنظيف
يعنى مهما عملتى وحطيتى وزودتى
وهى مش متنظفه كويس
يعععععععع مش ممكن
والحمد لله فى تقدم برضه يعنلا بقوا يبعوها اقصد الكرشه متنظفه
يعنى متشال عنها الجزء الاسود
وبيضاء خاااااالص وده طبعا بيسهل كتير جدا
لتنظيف الكرشه لو هاتجبيها بيضاء زى ما قلت تتنقع بمايه وخل
وملح وتكرر العمليه وتشطف كذا مره وممكن كمان تضيفى ليمون فى اخر شطفه وتسبيعا بيه شويه
اما لو هتدبحى مثلا فى العيد
او مش لقيتى المتنظفه هقولكم على سر خطير
تجيبى مايه وتحطيها على النار وتسخن تحطى عليها شويه بيكربونات وتنزلى قطع الكرشه فيها لثوانى وتكحتى بالسكينه هتلاقى كل السواد والاوساخ
رررررررررررراحت خالص
تنظيف الممبار
الممبار اول ما تجبييه هتحطى عليه شويه خل وملح كتير وتسبيه
نصف ساعه او ساعه كده
هتلاقييه نزل كل الماده اللزجه منه
تغسلييه برضه كويس اووى
كذا مره وبعدين تقلبييه تحت الحنفيه
يعنى تحطيه يتملى مايه هيبقى سهل انك تقلبييه لان الجزء الى جواه طبعا هى الى بيبقى متوسخ
بعد ما تقلبييه يتكحت بالسكينه كويس وتشيلى اى دسم ودهون
موجوده فيه وبرده يشطف كذا مره
لغايه ما تلاقييه بقى ابيض وملهوش اى ريحه خاااااااالص
تنظيف الفشه ولحمه الراس
برده هتغسليهم زى ما قلت بالملح والخل كويس كذا مره
والفشه تحاولى تشوفى الثقوب الى فيها بيبقى فيها دم تطلعييه
وتحطيهم على النار مع شويه مايه
يغلوا تطفى عليهم وترمى المايه
وتشطفيهم برده تانى
برده لغايه ما تلاقى مفيش ريحه
خاللللللللللص
الطريقه و السوا
الممبار
هنحشييه خلطه عباره عن
ارز مصرى
طماطم معصورة وصلصه طماطم
شبت وبقدونش وكسبره
بصل مفروم
فلفل مقطع
توابل ملح وفلفل وكمون وشطه
وشويه نعناع ناشف
هنقلب كل الخلطه مع بعض
ونحشى المببار بعد تقطيعه لقطع
متوسطه وننزل بيه فى ماء مغلى
حتى يستوى تماما وبعد كده نصفييه كويس ويتقلى فى زيت حتى نحصل على لون وردى جميل
الكرشه
تقطع قطع صغيره ونعمل تسبيكه
عباره عن بصل مفروم يتشوح حتى يبقى لونه ذهبى نضيف صوص الطماطم وملح وشطه وكمون وبهارات اما تتسبك نضيف قطع الكرشه ونزودها مايه شويه بشويه حتى تستوى
الفشه ولحمه الرأس
احنا بنعملها اننا بضيف عليهم بصل
وطماطمايه وفلفلايه
وتوابل ملح وفلفل وبهارات واسيبهم يستوا كويس فى التتبيله ده وبعدين اصفيهم واقطعهم قطغ صغيره
واحمرهم فى الزيت
قدمت معاهم كفته مدورة
محمره عباره عن لحمه مفرومه
عليها بصله وملح وتوابل واكورها كور صغيره وبعدين تحمر فى الزيت
وعاده بنحمر كل حاجه لوحدها
وبعدين نضيفهم على بعض
تبقى تشكيله كويسه
بالمناسبه فاض مننى شويه ارز من الممبار حشيت كوسه بيهم
وقدمتهت معاهم
اسيبكم مع الصور
ده الكفته قبل السوى
وده الفشه بعد ما استودت وقبل التحمير
وده لحمه الراس بعد ما استوت وقبل التحمير
وده الممبار قبل التحمير
وده الكرشه بعد ما استوت
وده الممبار بعد التحمير
الكفته
الفشه
لحمه الراس
وطبعا المخلل باذنجان بالخل والتوم
وده صورة للاكل كله
وده كمان
يا رب تعجبكم يا حبايبى
واى سؤال انا تحت امركم
والسلام عليكم
رد مع الاستدلال
الروابط المفضلة