كفتة الفراخ
طبق اقتصادى و لذيذ
اقتصادى مش عشان البانيه رخيص
لاء عشان النص كيلو بالاضافات بيدينا كميه حلوة تكفى ناس كتير
المقادير بسرعة
نص كيلو صدور بانيه
بطاطستين او تلاته متوسطين "مسلوقين و مهروسين"
بيضه
معلقتين كبار بقسماط ناعم
بصلة مفرومة
ملح فلفل ملعقة صغيرة جنزبيل مطحون
للتغطية بيض و كوب كبير بقسماط ناعم مخلوط مع كوب كبير دقيق
ممكن كمان نضيف كيس فيجيتار
,,,,
الطريقة ببساطة شديدة
ناخد صدور الفراخ المقطعة ضغنن و معاها البصلة و البطاطس
و البيضة و التوابل و نروح على الكبة
نلفهم مع بعض لغاية ما صدور الفراخ تتفرم و تتجانس مع البطاطس
بعد كدا نقلبهم فى طبق و نضيف معلقتين البقسماط
و نعجنهم كويس
بعد كدا بنصبعهم يعنى نعملهم صوابع او نكورهم كور صغننة او نعملهم زى اقراص البرجر الصغيرة
زى ما تحبوا
ممكن لو فى قطاعات معينة نعمل بيهم قلوب او نجوم زى الناجتس الجاهزة عشان الاطفال بيحبوها
المهم انه فى الاخر بنحطها فى البيض ومنه الى البقسماط
و نحطها فى التلاجة نص ساعة و بعدين نقليها فى زيت غزير على درجة حرارة متوسطة
لا عالية فتتحرق من دون سوى ولا منخفضة فتفتت التغطية بتاعتنا
تقدم بجانب بطاطس محمره او مكرونة او بطاطس بيوريه
والف هنا وصحة على قلوبكم
الروابط المفضلة