عزومتى التانيه لمامتى بالصور طبعا
السلام عليكم ورحمه الله وبركاته
كل سنه وانتم طيبيين
العزومه ده كانت لماما
عملت اصناف حلوة اووى وسهله
كمان والحمد لله الاكل عجبهم اووووووى
احنا كنا 6 افراد
شوفوا كده شكل السفره الاول
عملت الاصناف ده
فراخ مشويه بالفرن نفس طريقتى السابقه
بس نسيت اصورها لوحدها هتشوفوها على السفره
عملت لحم بعجين او فطائر باللحمه
وعملت جلاش بالجبنه البيضاء والفلفل الرومى
وبفتيك مقلى
كفته بطاطس باللحمه المفرومه
ارز بالكبد والقوانص
والحلو كان مهلبيه بالجيلى
نبدا الاول بالارز بالكبد والقوانص
المكونات ارز بسمتى نصف كيلو
نصف كيلو كبد وقوانص او ممكن كبده بس
ملح وفلفل وقرفه للارز
حطيت الزيت وضفت عليه بصله مفرومه وتوم نفروم
وحطيت الكبده عليهم وشوحتها شويه وبعدين حطيت ملح وفلفل
وكمون وعصره ليمون وبس وسبتها لغايه ما استوت
الارز
حطيت السمن على النار وضفت الارز المغسول وبعدين ضفت
الملح والفلفل والقرفه وسقيته بالماء المغلى لغايه ما استوى
وعند التقديم حطيت عيليه الكبد على الوش
طريقه الجلاش بالجبنه
وده الحمد لله عجبتهم اووى وكان طعمه خفيف ورائع
جلاش نصف كيلو
جبنه بيضاء اى نوع
فلفل رومى مقطع
زيت لدهن الطبقات
الطريقه افرد الجلاش واحط بين كل طبقه والتانيه
زيت وبعدين فى النصف احط الجبنه والفلفل
وفى الاخر اضيف كبايه لبن مع بيضه
ورشه فلفل اسود
واحطه فى الفرن
اللحم بعجين او فطائر اللحمه
العجينه
3 اكواب دقيق
نصف كوب زيت
ماء للعجن
خميره جافه معلقتين
2 معلقه لبن بودره
الحشو
لحمه مفرومه
بصل مفروم
بقدونس مفروم
فلفل مقطع
ثوم مفروم
طماطم مقطعه
توابل ملح وفلفل وسماق وبهارات
الطريقه اخلط العجينه واسيبها ترتاح وتخمر
وبعيدين اقطعها حوالى 15 قطعه
وكل قطعه افردها واحط عليها الحشو واسيبها تخمر تانى
وبعدين احطها فى الفرن
البفتيك
لحمه اسكالوب
تتبل ببصل وتوابل ملح وفلفل
وبهارات وبعدين احطها فى البيض والبقسماط
وتحمر فى الزيت
كفته البطاطس
عباره عن بطاطس مهروسه
بصل مفروم
بقدونس مفروم
معلقتين بقسماط
بيضه
ملح وفلفل وبهارات
الطريقه
اخلط كل المكونات واصبعها صوابع
وبعدين احطها فى البقسماط
وتحمر فى الزيت
وده صوره تانيه للسفره
وده من قريب شويه
اعذرونى لاننى بصور من الموبايل
ويا رب تعجبكم اكلاتى البسيطه واى سؤال انا تحت امركم
الروابط المفضلة