صينية سمك انما ايه واحكموا
السلام عليكم ورحمة الله وبركاتة
ازيكو يااحلى عضوات النهاردة جايبالكو معايا احلى صينية سمك تريحكو من الشوى والقلى وخفييفة وسهلة فى عملها تناسب الصيام
الصراحة لما بنعملها بتتمسح من على السفرة
اتمنى تجربوها بس على شرط تقولوا رايكو فيها
طولت عليكو
طب ندخل فى المهم
المقادير وطريقة العمل
1 كيلو سمك ماكريل
للحشو >>>>>3 -4 حبات طماطم
حزمة بقدونس اخضر مقطع صغير
حزمة كسبرة خضرا مقطعه صغيرة
بصلة متوسطة
معلقة كبيرة توم مدقوق ا(مهروس)
3-4 (حسب الحجم) فلفل الوان مقطع صغير او مدقوق
3 لمون
ملح كمون(نص معلقة كبيرة)
نجيب السمك وننضفه >>>>نشيل الراس والاحشاء والزعانف ومننساش سلسلة الدم اللى فى شوكة البطن لانها بتكون زفرة
نغسله كويس جدا بالملح والخل وبعدين نقطعه جزل ونتبلها بالكمون وعصير لمونة ورشة ملح
زى الصورة كده
نحضر الخلطه او الحشو>>>>>>
فى طبق نبشر الطماطم (بمبشرة البصل) ونبشر عليها البصله ونضيف الكسبرة والبقدونس المقطعين ونضيف الفلفل والتوم وعصير لمونتين ونظبط الملح والكمون
ونخلط كله كويس زى الصورة
هنجيب الصينية اللى هنعمل فيها نحطها على النار ونحط معلقتين كبيره زيت
لما يسخن هنضع السمك المقطع على بطنه لما ياخد لون دهبى نقلبه بحذر على ظهره
نشيله من النار ونرصه حلو وبعدين نجيب الخلطه ونضع على كل قطعه كمية مناسبة من الخلطه
ولما نخلص نوزع عليه شوية زيت حوالى ربع كوب او اكتر حسب الرغبة
وعلى الفرن علطول او على نار هادية لو من فوق
نلاحظ ان له صوص بتاع الخضار نخليه تقيل مش ناشف ولا خفيف
وبالهنا والشفا
وبقدمه مع الارز البنى او الاحمر مع السلطه الخضرا وسلطة الطحينة اللذيذه
وادى طبقى وياسلام عليه مع كوباية التمر هندى او عناب بيطرى على المعده خالص
معلش ياجماعة لو الصور صغيرة شويه معرفتش اكبرها بس بيتهيألى واضحة شويه
رد مع الاستدلال
السمكمك
الروابط المفضلة