السلام عليكم ورحمة الله وبركاته

أخواتي .....
محتاجة طريقة الأرز الأبيض (طريقة طيبة جدا جدا جدا) ، يعني مش "البلاو" لا لا لا ، الأبيض الي يكون بجنب صينية الشربة أو الطبيخة الليبية .. والله يكتب لكم الأجر.

جربي الرز الأبيض المطبوخ في مرقة الدجاج مع الشعيريه"المكرونه الرقيقه أو لسان العصفور "حبوب الشربه " وقطع الدجاج والبصل المقلي حلووووووووو

وأي توضيح حاضره

بس ممكن إنتي ما تقصديش اللي مع الدجاج !!

هلا بام يزن احنا في انتظار التورتة درتيها ولا مازال
يلا المهم بالنسة لي افضل نوع ارز ابيض هو الحبة الطويلة التي تميل الي السمرة مثلا زي sos البرتقالي او ابو بنت طبعا الكمية اللي انت حابة تطبخيها نقعها في الماء مدة نص ساعة وبعدين حطي طنجرة فيها قليل من السمن اوالزيت وضيفي الارز وقلبي لحد ماتحسي ان كل حبة بروحها ضيفي الماء او مرقة الدجاج ويكون الماء فوق الارز بشوية بعد حوالي 12 دقيقة حتتكون عيون فوق الارز حركي بملعقة خشبية وزيدي 5 دقائق اولما تحسي الارز استوي طفي النار وماتنسيش اضيفي الملح مع الماء والنار تكون في الاول عادية وبعدين نوطي النار علي الاخر ان شاء الله نكون افدتك

نضع السمن او الزيت على النار ومعه ملعقتين لسان عصفور اوشعيريه ونقلب لغايه ماتتحمر وبحذر نضيف الماء او المرق يغلى ونضيف الملح والارز ويقلب ويغلى ونهدىء النار وصحه على قلبك

السلام عليك ورحمة الله وبركاته
شن رايك نعطيك طريقة ارز اسهل والذ منها ما فيش
خوذي مقدار الارز كيليه ونقعيه في المياه علشان تتخلصي من بعض النشا اللي فيه او لو مستعجلة اغسليه وخلاص وخوذي كياله مياه او على حسب نوع الارز اللي تستعملي فيه من حبه طويلة الى حبه قصيرة او المصري المهم تاخذي كياله مياه وتحطيها ع النار لين تغلي وتصبيله شوية زيت وخليك مع الصحي لا تستحقي سمن لا زبدة وتحطيله ملح وحبات حب هان ومرات نحطله ورق لاورو، لما تغلي المياه حطي فيها الارز وخليها تغلي مع الارز حركيه و نقصي النار ع الاخر وخليه يطيب براحته
النتيجة
يجي ارز ابيض ناصع زي الثلج وسادة وهنا الفايدة انه يمشي مع اي صلصة او طبيخة بازيليا او فاصوليا او قلايه دجاج وسااااااااااااااااهل مااااااااهل وصحتين ليك ولعائلتك

انا طريقتى وهى طريقة ماما

تحطى زيت فى الطنجره ولما يسخن تحطى له لسان عصفور او مكرونه تبويخ مكسره(شوى منها بس)
وبعدين تحطى الرز وتقلبيه شويا فى الزيت وتصبى عليه ماء وتحطى ملح ولما الرز يمص الماء تنقصى عليه للاخر

وصحتين

ماشاء الله البنات ماقصروا
واذا حبيتى اضيفى نكهه استعملى مرق او مكعبات دجاج وممكن بهارات اىنوع

ما شاء الله ما شاء الله ، زاد حبي للمنتدى والله بردودكم ومساعدتكم ليَّ ، ربي يكتب لكم كل خير يا طيبات ..

أم عبدالمعز ، والله ضحكت ضحك غريب لما شفت ردك ، ما شاء الله عليك ما تنسيش ، أنا لما وضعت الموضوع هذا قعدت نفكر ونقول يا رب يا رب أم عبد المعز ما تشوفش موضوعي بعدين تشدني في التورتة !!! ..
وبصراحة درتها بعد ما شريت طاجين صغيروون قلت نجربها قبل ، وحتى خالي لينا فترة طويلة ما شفناه قلت يوم اللي نعزموه ع العشاء نجهزهاله، وما شاء الله اللي جربتها طلعت روعة ، والله لو ما كنت متحشمة من الكلمة اللي كتبتها عليها كنت حطيتها في المنتدى ، وزيادة الصورة مش بالجودة العالية (نوكيا E50) و كان تبيها والله نعطيهالك ع الخاص لكن تبقى عندك هاه!

قصة طويلة صح؟

هههههههههه
عارفتني نستنا فيك صار وخايفة انشوف موضوعك اكيد حتلقيني في موضوعك ونسأل علي التورتة ابعثي ابعثي انا راضية بها المهم انشوفوا عمايل ايديك

ماشاء الله بارك الله بالاخوات ما قصروا بالرد

ان شاء الله نشوف تطبيقك يا غالية