مسائكم فل ونرجس يارب
من فتره شاركتكم بأكلت ورق عنب في ملف الغاليه ام وسيم
واليوم جايبه ليكم كمان أكلة ورق بس شو دمار شامل
وصواريخ أرض جو
الجمعه طلعنا للبر او متل ما بنحكي بفلسطين طلعنا للخلى
وبما انه الفتره هذه كلها رحل ومشواير بالواحد زهق الشوي بصراحه
وهالمره حبيت نغير ونعمل شيء زمان ما اكلناه بالبر طالخلى"
ورق عنب مع دجاج وقطع لحمة قص
طريقتي في تحضير الورق موجوده علىالرابط التالي
واتركم مع صور اكلتنا المميزة
واول شيء لازم نلقط ورق العريش
يسعدوه ملوكي ما قصر واشتغل بذمه وضمير لانه بحب الورق كتير
بعدين سلقناهم وحضرنا الحشوا وحشيناهم
ورتبنا الجاجات واللحمات وتحتهم البطاطا والبندوره وبعدين الورق
وحضرنا الطبخه لتاني يوم
وتاني يوم طبعا شدينا الرحال على الخلى على ارضنا الصغنونه في منطقة رام الله
اول شيء تركنا الطبخه على نار حاميه وقويه لحتى غليت
وجنبها ركوة القهوة يا سلاام ما في اطيب منها اكيد على النار
وبعد ما غليت شيء نص ساعه
تركنا النار تهدى وتركناها على الجمر بحدود ساعه ونص او اكتر بصراحه مو متذكره
يعني بدكم تحكوا نسيناها علىالنار وانشغلنا بالقهوة والشاي والمكسرات
وهون لستوى الورق تمام التام وتحتيه المدسمات من دجاج ولحم
وطبعا الكل كان بستنى بالطبخه لتنزل عن النار
والحمد لله الي عرفت اسرق صورتين قبل ما يبدأ الهجوم ههههههههههه
شو رأيكم اكيد الريحه وصلت لعندكم
وهي اكم صورة من الخلى التقطتهم الكم لتشاركونا جمال الطبيعه
وهاي صورة دالية العنب للقمر وعود
شايفه لسه صغنونه داليتنا ان شا ءالله السنه الجاي بنلقط عنها ورق عنب
شوفوا الاولاد مبسوطين كتير لانه ما بصدقوا المشوار كل نهاية اسبوع
بكونوا زهقانين من حبسة البيت وبدهم بر يلعبوا فيه
شلة حسب الله هههههه
طبعا اولادي وابن سلفي
اتمنى يكون مشوارنا عجبكم وطبختنا كمان
ونلتقي ان شا ءالله في مشوار اخر قريبا
ودمتم
الروابط المفضلة