برام اللحم المصرى بنكهة مميزة من مطبخى
النهاردة جيت ومعايا طبق بجد تحفة وريحته تشدك وطعمه مممممممم لذيذ،ومع ان ناس كتير بتعمله جاهز عند بعض الجزارين/لحامين إلا انه سهل جداً وطعمه بيكون مميز عن الجاهز ومش هيكلفك كتير وممكن تعمليه بخضار،ومن غير خضار،وممكن بلسان العصفور ....يعنى اللى تحبيه.
نبدأ بسم الله:
المكونات:
· لحم قطع/الكمية اللى تناسبك
· خضار/أنا استعملت البطاطس
· بصل مقطع شرائح/أساسى ولا غنى عنه
· طماطم مقطعة شرائح/أساسى ولا غنى عنها
· ملح
· فلفل أسود
· بذور حبهان/هال+ورق لورى/أساسى ولا غنى عنهم كتوابل
· جوزة الطيب/إذا حبيتى
· عن نفسى استخدم لكل كيلو لحم 6 بصلات متوسطة و6 حبات طماطم متوسطةو10حبات هال و 5 ورقات لورى وربع حبة جوزة الطيب وبكتر الفلفل عشان يكون حااار.
الطريقة:
افتحى كل حبة هال واحصلى على البذور وكسرى ورق اللورى لقطع صغيرة مع قطعة جوزة الطيب مبشورة وضيفيهم على البصل مع الفلفل الأسود.
..........
افركيهم بيدك حتى تتفكك حلقات البصل ويتشبع البصل بنكهة التوابل ثم غطى إناء البصل لكى تختمر الرائحة أكثر..وهذا هو سر النكهة المميزة.
.........
ضيفى كمية الملح المناسبة للطبق كله على شرائح الطماطم للحصول على مائها قلبيها واتركيها جانباً.
........
بعد مرور 10 دقائق على اختمار البصل مع التوابل ،وإضافة الملح على الطماطم احضرى برام وضعى اول طبقة وهى الطماطم ثم البطاطس أو نوع الخضار اللى تستخدميه.
........
ثم طبقة بصل.
.......
ثم طبقة لحم.
........
كررى نفس العملية لحين انتهاء الكمية بشرط ان تكون آخر طبقة هى مزيج من البصل والطماطم،سوف يتبقى لديكى ماء فى إناء الطماطم ضيفى له نصف كوب ماء وضعيه على البرام وغلفيه بورق الفويل وأدخليه فى فرن عالى الحرارة لمدة 15 دقيقة ثم اجعلى النار هادئة واتركيه ينضج لمدة ساعة ونصف أخرى.
......
لو حبيتى انزعى الفويل بعد النضج واتركيه يأخذ لون وقدميه بالهنا.
........
يؤكل بالخبز او بالأرز.
........
وصورة اقرب عشان خاطر عيونكم يا قمرات.
.......
ملاحظات:
· يستحسن تكون اللحمة المستخدمة مشابة بالدهن يعنى مش حمرة تماماً لأننا مش بنضيف لا سمن ولا زبدة،ولو كانت حمرة وبدون دهن يستحسن اضافة سمن أو زبدة او حتى زيت..ويا سلام لو كانت لحم خروف..مممم يم يم..مش هقولك على طعمها..بس جربيها.
· لو تطحنى اللورى والحبهان وجوزة الطيب فى المطحنة اللى بتكون مع الخلاط/ البلندر يكون أفضل ويستحسن طحنهم قبل بدء التحضير مباشرةً..ريحتهم بتكون اقوى..اما بالنسبة للفلفل فلا توجد مشكلة.
· اكتر خضروات بتعطى نتيجة حلوة هى البطاطس والجزر والبسلة/بازلاء.
· اذا حبيتى تجربيه بلسان العصفور، تحمرى اللسان فى الزبدة او السمن اولاً كأنك بتعملى شوربة لسان عصفور ،مع زيادة كوب ماء إضافى للبرام..لأن اللسان يتشرب الماء عكس الخضروات.
· اجتنبى اضافة الملح للبصل لأنه بيدبله ويدوبه ..فقط ضيفيه للطماطم.
· اكتفى بالتوابل المذكورة فقط..هتكفى وتوفى.
· ممكن تجهزيه من بليل وتدخليه الفرن تانى يوم...اقتراح للعزومات أو للمرأة العاملة.
بتمنى أكون وفقت فى تقديم الطبق وبتمنى تجربوه وإن شاء الله مش هتندموا واتفضلوه بالهنا.
إذا كنتى زائرة او عضوة وأردتى نشر الموضوع فى منتدى آخر فأرجو من الله ألا تنسى وتكتبى أنه منقول.
الروابط المفضلة