بسم الله الرحمن الرحيم
السلام عليكم ورحمة الله وبركاته
مقلوبة شقلوبة من لموسة النموسة
اليوم رح اقدم لكم مقلوبتي المتشقلبة من الماسة المتألمسة
هذا الويك اند هذا يعني يوم الجمعة
خطرت في بالي اعمل المقلوبة وكان زوزي جاي الخميس الله وكيلكو وقال شو جايب كل اشي لاغراض المقلوبة ما عدى الكوكو واوا
يا حبيبي وشلون رح تزبط الطبخة؟
هو بنفع بلحمة
بس انا بحبها بجاج
اطرى والذ
والله يرضى عليه حمل حالة الساعة 11 بالليل ورجع جابلي الجاجة ورجع على السريع
ونويت النية ونمت نومتي الهنية والجمعة فقت على الصبحية وبلشت بطبختي الالماسية
الباتنجان نقشرة
ونقطعة ونرش عليه شوية ملح عشان اذا في شوية مرارة ولا مية تنزل وما يشرب مية كتير بس نقلية
ونقطع فليفلة وبطاطا كمان
وهلاء نقلي الجاج بس اشوية يعني يادوب ياخد لون ونشيله
على قولة زوزي قال هيك ازكى
بس اذا بدكوش تقلوه عادي بصير
نحضر الجاجة للسلق ونرش عليها رشة ملح عشان اذا طلعت الزفرة تطلع شقفة وحدة وتسهل عليها شيلها
ونضيفلها المطيبات
عود قرفة حب هيل فلفل حب اسود بصلة وعرق ميرمية اتعلمته من الاخت تغريد2007 وفعلا بعطي نكهة حلوة للمرقة
نقلي الفليفللات حمرة وصفرة وبرتقالي وخضرة اللي موجود عندك
والباتنجات ونحطهم على ورق مطبخ يمتص الزيت الزايد
ونفس الاشي للبطاطا
وهلاء بقاع الطنجرة نصف البطاطا وشوية فليفلة وبعدين الباتنجان عشان لا سمح الله لو لزقت الطبخة تلزق البطاطا ونكون حمينا الباتنجانات من اللزق بقاع الطنجرة
وهاي الجاج استوى ننشله ونصفه فوق الباتنجان
ونحط كمان طبقة باتنجان وفليفلة
ونحضر الرز بعد ما ننقعه ونغسلة...نضيفلة الملح والفلفل والبهار والقرفة ...نخلطهم ونضيفهم فوق الجاجات
هاي المرقة بعد ما صفيناها نديرها فوق الرز بحنية وشوية شوية خوف لتخرب الطبقات اللي عملناها
ونختبر الوضع اذا الملح مزبوط نمشيها واذا لاءا نعدل الطعمة بزيادة البهارات واللي ناقصها
يعني انا طلعت معي شوية دلعة فضفتلها كمان نص معلقة من كل نوع بهار وملح
وتركتها تغلي على نار عالية اول اشي وبعد عشر دقايق بس بلش الرز ينشف هبط الغاز على آخر شعرة
وتركتها شي ربع ساعة او لحتى يفتح الرز معك
وعشان اضمن انها تطلع شكل مقلوبة عنجد بترك الطنجرة مشقلبة شي 10 دقايق كمان على الصينية بدون ما ارفعها
ياللا نستنى عشر دقايق
الروابط المفضلة