طبق متميزالحمام المحشي من مطبخ رضوى

**radwa1981** · 23-07-2009, 06:02 PM

الحمام المحشي

أهلا حبيباتي في أحلى منتدى ومهرجان صيفنا إبداع الرائع والمفيد، بقالي اكتر من شهر للأسف منقطعة عشان امتحاناتي اللي مش بتخلص كالعادة بس الحمد لله نجحت في الجزء الثاني من الدكتوراة وبامتياز كمان الحمد لله وهانت باقي جزء واحد الحمد لله وتخلص على خير، مش عاوزة أطول عليكم عزمت صديقة ليا على حمام محشي لأنها في أجازتها السنوية وكل سنة متعودة اعزمها عندي على حمام زي ما هيه بتحب، وبعد ما جهزت فاجأتني وبلغت 2 أصحابنا تانيين بموضوع الغدا إنها هتاكل عندي حمام ومحشي ولاقيت الباقيين عاملين احتجاج وعاوزين ينضموا وكنت خلاص جهزت والعزومة تاني يوم اتصرفت وكلمت الفرارجي بعتلي الحمام اللي عنده وكان حجمه صغير بس كنت مضطرة لان اللي كان عندي جوزين بس وكنت بالصدفة مجهزة محشي يكفيني انا وامي الغالية فالمحشي كان كفاية الحمد لله، المهم ندخل في الموضوع:
ينظف الحمام جيدا ونجهزه للحشو بالتسفيق او فصل الجلد عن لحم الصدر بهدوء باطراف الاصابع حتى يجهز ثم ينقع في ماء وملح وخل ودقيق لدة لا تقل عن نصف ساعة لاخراج الزفارة.

يجهز ارز الحشو كالتالي وطبعا طريقته بتختلف من حد للتاني بس دي طريقتي اللي اتعلمتها من امي الغالية ويا ريت تجربوها وهتعجبكم انشاءالله:
يغسل الارز جيدا ويفره 2 بصلة ناعمة او حسب كمية الارز لان البصل لازم يكون كميته كويسه لانه مهم للطعم ويدعك بملح وفلفل ثم يقلب جيدا مع الرز المغسول جيدا ثم في حلة تيفال نضع 2 ملعقة سمن بلدي لتسيح ثم نضيف خليط الارز والبصل ونقلب حتى يخشخش الارز ثم نضيف الماء والملح او شوربة حسب الرغبة وتكون في مستوى الارز لان الرز نريده نصف سوا بس للحشو ويجهز بالطريقة العادية ودي بتكون صورته

يحشى الحمام بالأرز كما بالصورة ومن أسفل من الداخل أيضا يحشى بقليل من الأرز ونسده بالقونصة كما بالصورة.

ثم في حلة كبيرة نغلي بها ماء ونسلق الحمام بالطريقة المعروفة ويجب نزع الريم جيدا لإزالة أي زفر وبعدها نضيف البصل وورق اللورا والحبهان والفلفل الأسمر ولا نضيف الملح إلا في النهاية بعد أن يبدأ الحمام بالنضج
وينشل الحمام ويدهن بخليط ( معجون طماطم- ملح –فلفل- ليمون) وده حسب الرغبة ويحمر بسمن نباتي ويقدم وهتدوقوا احلى واطعم حمام انشاءالله.
ودي صورته

ودي صورة الاكل كله

بس معلش تصوير على السريع قبل اي تزيين او تظبيط للاطباق اصحابي كانوا جعانين من الروايح واتكسفت اصور السفرة في الاخر ادامهم، يا رب يعجبكم وتجربوه وينول رضاكم.