LinkBack URL
About LinkBacks
*طبق متميز*صيادية السمك من مطبخي
السلام عليكم ورحمة الله وبركاته
امبارح يوم الجمعة يوم اللمة والعائلة كلها بتكون
موجودة في البيت
فلازم يكون الغذا مرتب
قمت طبخت
صيادية سمك
نبدأ بالسمك أولا
أنا أخترت فيليه سمك هامور مقطع
بعد ما نظفته
حطيت عليه ليمون وملح وبشرت توم مع بهارات خاصة بالسمك
وتركته للصبح بالتلاجة لحتى يتشرب الخلطة
طلعته من التلاجة وحضرت صحن في طحين مع شوية ملح وفلفل أسود
ودرت زيت قلي في القلاية لغاية ما سخن الزيت ، بلشت أحط السمك
بصحن الطحين واقلي فيه
لغاية ما خلصت السمك كله
كنت مجهزة صحن وعليه ورق لإمتصاص الزيت
وهاي السمك جاهز
والان دور تجهيز الرز
أستخدمت 4 كاسات رز غسلته ونقعته بمي دافئة مع ملح حوالي 3 ساعة
وبلشت أحضر حشوة الرز
قطت بصل شرائح وشوحته عالنار وبشرت 2 سن تومه وقطعت حبة فلفل حلو شرائح وحطيتها عليهم وتركتهم لغاية ما يذبلو .
رشيت عليهم ملح ونص ملعقة هيل ونص ملعقة قرفة وشوية كزبرة خضرا وملعقة صغيرة كركم ،نص ملقة فلفل أسود
وقلبتهم مع بعض وغطيتهم شي 5 دقائق حتى يتجانسوا
معلش نسيت أصور الحشوة وهي جاهزة
جبت طنجرة وحطيت الحشوة بالقاع ودرت الرز عليهم
وصبيت مية سخنة وتركتهم عالنار لحتى يغلو
بعدين وطيت النار عليهم وتركتهم لحتى يستوي الرز
وحطيت شوية سمنة على الرز حتى يعطي لمعة ونكهة
وهاي صورة الرز بعد ما جهز ( بكون مجهزة لوز مقلي للزينة )
والان دور الدقوس اللي بدونه ما بتتاكل الصيادية
مكونات الدقوس بندورة + بصلة مبشورة+ 3 فصوص ثوم _ قرن قلفل أخضر
معجون بندورة _ حبة لومي + 3 مسمار قرنفل+ ملح + رشة فلفل أسود
الطريقة :
ببشر البصلة مع التومة وبحوسهم عالنار مع شوية زيت قلي لغاية ما بدبلو
بقطع قرن الفلفل وبحط عليهم وبحرك ، وبكون مقطعة البندورة ناعم وبديرها
عليهم وبحرك وبحط حبة اللومي والقرنفل وبغطي الطنجرة لغاية ما تذوب
بحط معجون البندورة وكاستين مي وبتركهم يغلو لغاية ما يتسبك .
وهون بعد ما سكبت بالصحووووون
صورة الدقوس أغراء لأم مالك عشان بتحبه
أتمنى انه طريقتي بعمل الصيادية عجتكم
والمعذرة لأني بحب أشرح بدون لغة فصحى
رد مع الاستدلال
كتبت بواسطة زهره النارنج
الروابط المفضلة