*طبق متميز*الحمام المحشي بخلطة مصريه سريه ....من مطبخ ام الحلوين
السلام عليكم ورحمه الله
عزيزاتي سيدات وبنات لك
وحشتوني
النهارده جيبالكم الحمام المحشي
بالرز
بس الخلطه الي فيه يمكن مش كل المصريين بيعملوها لان على قول حماتي
انها خلطه مخصوص بعيلتهم
وسريه مش اي حد يعرفها
فالاول هنجيب الحمام وننضفه كويس ومن عند الرقبه منقطعش الجلد الي عند الرقبه علشان ده هيتحشي
وكمان نفصل الجلد الي عند الصدر عن اللحم علشان كمان هنحشي تحته
وننقعه بشويه لمون ودقيق وملح
ونغسله كويس ونسيبه يتصفى
دلوقتي نيجي للخلطه
هنفرم بصلتين صغير ونحطهم على النار انا بعملهم بالزيت بس اهل جوزي طبعا بالسمنه البلدي
ونسيبه لما يدبل ويبتدي يحمر
نكون مقطعين القوانص والكبد بتاعة الحمام ونحطهم عليه ونقلبهم كويس
ولما تنشف الميه
نحط البهارات
ملح فلفل اسود نعناع حوالي معلقتين كبار ورشه حبهان
طبعا في عائلات كتير بتعملها بقرفه وجوزة الطيب وكده
بس همه بيحطوا نعناع
وسدقوني يابنات الطعم حلو اوي ومميز
وبعدين نحط الرز المغسول والمنقوع
ونقلبه ونحط نص كميه الميه الي مفروض تتحط
ونسويه نص سوا
انا هنا بزود الكميه
علشان اسويه فالاخر واقدمه جنب الاكل
بعد ميستوي نحشي الحمام ونقفله
بس منملهوش علشان لسه الرز هيكمل سوا فمتتفقعش الحمامه منك
ونحطه فحله كبيرة لازم يكونواقاعدين براحتهم
ونسلقهم على النار ونحط طبعا معاهم بصله وحبهان وفلفل اسود وقطعه جنزبيل
دلوقتي الرز الي فاض
هنحط عليه من الشوربه ونكمل سواه ونقدمه مع الحمام
فالعاده الحمام بيتحمر فالسمنه لكن
انا بحطه فالفرن فبيتحمر وبيطلع حلو اوي
وبعدين هوه ماشاء الله في نسبه دهون حلوة مش محتاج لزياده
وبنقدمه طبعا مع الملوخيه الي بتتعمل من شوربه الحمام برده
وممكن الشوربه تتقدم كدا او نعملها شوربه لسان عصفور
وده شكل الاكل النهائي
اتمنى انه يعجبكم
ولااااااتنسوا الدعاء لأولادي
.
رد مع الاستدلال
كتبت بواسطة حنان(البحرين)
الروابط المفضلة