*طبق متميز*دجاج بالفطر والكريما...........ااه عفوا قشطة
بسم الله الرحمن الرحيم
السلام عليكم ورحمة الله وبركاته
طول عمري بسمع عن طبخة الدجاج بالكريمة والفطر
وبشوفها بالمواقع وبكتب الطبخ
حتى بالدعايات بجيبوها الله وكيلكو
شوفو ها التقديم ما احلى
وبصراحة دقتها انا وزاكية كتيير
بس يا عمي ها الكريمة انا من وين اضلني اجيبها؟
اي والله علبة صغيرة من كريمة الطبخ بجوز يوصل حقها عنا 5 دنانير
اغلى من الجاجة نفسها الله وكيلكو
فقلت لازم افكرلي بش طريقة عشان اطلع نفس الطعمة وفعلا هيك صار
جبت علبة قشطة بدينار وعلبة لبن رايب بنص دينار ولما دمجتهم مع بعض طلعت معي نفس الطعمة متل ما رح تشوفو كمان اشوية
ياللا البسنا المراييل وشمرنا عن سواعدنا وبسم الله نبدأ
قلينا البصل لحتى يحمر
كويس وبعدينا وبنفس المقلا حطينا فليفلة حمرة وصفرة وخضرة وقليناهم برضه
ومن ثم حطيناهم على جنب المقلاة وضفنالهم الفطر
وهلاء دور البهارات ( ملح وفلفل وبهار وجوزة الطيب)
وبس تسبكو منيح شلناهم بصحن على جنب
وحضرنا شرحات الدجاج انا هون استعملت سفينة الدجاج بلاقيها ازكى وبتستوي بسرعة
وشلناهم برضه من المقلاة عشان نحضر الصوص هلاء
كاستين لبن رايب مع معلقة نشا صغيرة وعلبة قشطة نضل نحركهم لحتى يغلو
د
وبس يغلو نعاود نضيفلهم الخلطة السابقة
ونحركها وان كانت جامدة فينا نضيفلها مرقة او متل ما انا عملت حطيت المية اللي كان فيها الفطر منقوع
ونتركها تغلي على الهدوء وغطي القدر لحتى تستوي
اي والله انه شكلها بشهيييييييييي
هلاء دور الرز
رز مبهر (بهار حلو وفلفل وقرفة) مع بازيلا
والازكى انه فلفله بمرقة مش بمية
وهيا اول سكبة للي اجى موعد غداهم
هم هم
هههه مين يفتح تمه يدوق ها اللقمة من ايدي؟
ريته صحة وهنا وعافية على قلوبكو
وبشوفكو المرة الجاية بطبخة تانية
تحياتي واحتراماتي
الماسة
ام سهام واسيل
رد مع الاستدلال
الروابط المفضلة