مجبوس اللحم اللذيذ وصل روووووووووووعة

**أم صابرين** · 10-02-2009, 10:22 AM

السلام عليكم صبايا
هذه أول مشاركة لي معاكم في هذا المنتدى واتمنى تعجبكم إنشاء الله

اليوم سويت غذانا مجبوس لحم وبصراحة أنا ما أقدر أقاوم هذه الطبخة وحبيت انكم تشاركوني المجبوس

المقادير
لحم قطع بالعظم
رز بخاري الكمية اللي تستخدميها عادةً (يكون منقوع)
بصل مفروم
فليفلة مقطعة مكعبات
1 طماطم مقطعة مكعبات
جزرة حلقات بطاطس حلقات
شبنت مفروم
ثوم مهروس
ملح
ملعقة طعام صلصة طماطم
بهارات (سنوت مهم جدا ما استغني عنه - دارسين (قرفة) مطحونة - ليمون أسود مطحون - كركم - فلفل أسود مطحون - عود دارسين _ حبتين هيل - ورق غار طازج)

الطريقة:
- أول خطوة أنا اخلي اللحم ينسلق مع حبات هيل وعود دارسين مدة ساعتين في هذي الساعتين احط فيه شوي ملح.
- اخذ البصل المفروم واخليه على نار متوسطة بدون زيت واكون واقفة جنبه ومجهزة كمية من الماء إذا بدأ البصل يلصق شوي في القاع اصب عليه شوي ماء واخليه لحد ما ينشف مرة ثانية واكرر خطوة صب الماء كذا مرة حتى اوصل إلى اللون البني المطلوب
- اخفف النار واحط شوي زيت واحمس البصل وفي هذا الوقت اضيف له الثوم وورق الغار والطماطم المكعبات واحركهم شوي وبعدين احط جميع البهارات واحركهم مجرد ينخلطون واغطيهم دقيقتين.
- احط عليهم الطماطم الصلصة واخلي معاهم كمية من الماء لأني راح انزل في هذا الوقت الجزر والبطاطس والشبنت واللحم المسلوق واخليه فترة حتى ياخذ الحم طعم باقي النكهات والجزر والبطاطس يستوون.
- اصفي الرز من الماء واحطه على باقي المقادير والاحظ كمية المرق الموجود لازم يكون أعلى من الرز بشكل بسيط إذا كان أكثر من اللازم اخذ من المرق بملعقة حتى اضبط الكمية.
اغطي القدر بالقصدير واخليه على نار هادئة جداً مدة نصف ساعة.

ومعزومين

وبالهنا والصحة والعافية